ສາທາແຂວງ ສາລະວັນປະກາດພະນັກງານພັກການ ຮັບອຸດໜູນບຳນານ

120

 

ໃນວັນທີ 7 ສິງຫາ 2020 ນີ້, ພະແນກສາທາລະນະສຸກແຂວງສາລະວັນ ໄດ້ຈັດພິທີປະກາດພະນັກງານລັດຖະກອນພັກການຮັບອຸດໜູນບຳນານ, ຈັດຂຶ້ນຢູ່ທີ່ຫ້ອງປະຊຸມຂອງພະແນກໂດຍການເປັນປະທານຂອງ ທ່ານ ດຣ ບົວໄລ ແສນແກ້ວມີກໍ ຫົວໜ້າພະແນກສາທາລະນະສຸກແຂວງ, ໃຫ້ກຽດເຂັ້າຮ່ວມມີບັນດາທ່ານຄະນະພັກ, ຫົວໜ້າຂະແໜງການຕ່າງໆພາຍໃນພະແນກ, ພ້ອມດ້ວຍຫົວໜ້າສູນ, ຮອງສູນ ແລະອຳນວຍການ-ຮອງອຳນວກຍການໂຮງໝໍ ເຂົ້າຮ່ວມ.


ທ່ານ ໄຊ ຊາພັກດີ ຫົວໜ້າຂະແໜງຈັດຕັ້ງ ພະແນກສາທາລະນະສຸກແຂວງສາລະວັນ ໄດ້ຜ່ານຂໍ້ຕົກລົງເລກທີ 1362/ສທ ນະຄອນຫຼວງວຽງຈັນ ລົງວັນທີ 22 ມີຖຸນາ ປີ 2020 ວ່າດ້ວຍການອະນຸມັດໃຫ້ພະນັກງານລັດຖະກອນພັກການຮັບອຸດໜູນບຳນານ ໂດຍອີງຕາມກົດໝາຍວ່າດ້ວຍພະນັກງານລັດຖະກອນເລກທີ 74/ສພຊ ລົງວັນທີ 18 ທັນວາ 2015, ມາດຕາ 70 ແລະອີງຕາມກົດໝາຍວ່າດ້ວຍປະກັນສົງຄົມ ເລກທີ 54/ສພຊ ລົງວັນທີ 27 ມິຖຸນາ 2018.

ທັງອີງໃສ່ດຳລັດວ່າດ້ວຍການຈັດຕັ້ງ-ການເຄື່ອນໄຫວຂອງກະຊວງສາທາລະນະສຸກເລກທີ 96/ນຍ ລົງວັນທີ 9 ມິຖຸນາ 2017 ແລະແຈ້ງການຂອງກະຊວງພາຍໃນເລກທີ 403/ພນ ລົງວັນທີ 23 ເມສາ ປີ 2020, ພ້ອມດ້ວຍໜັງສືສະເໜີຂອງກົມຈັດຕັ້ງ-ພະນັກງານເລກທີ 0249/ກພງ ລົງວັນທີ 3 ກຸພາ ປີ 2020 ລັດຖະມົນຕີຕົກລົງເຫັນດີອະນຸມັດໃຫ້ ທ່ານ ດຣ ກະເສີມສຸກ ວົງສຸດທິ ຮອງຫົວໜ້າພະແນກສາທາລະນະສຸກແຂວງ ພັກການຮັບອຸດໜູນບຳນານນັບແຕ່ ວັນທີ 1 ກໍລະກົດ 2020 ເປັນຕົ້ນໄປ.


ທ່ານ ດຣ ກະເສີມສຸກ ວົງສຸດທິ ເຂົ້າການປະຕິວັດ ແລະ ສັງກັດລັດ ແຕ່ປີ 1988 ແລະ ລວມປີການ 32 ປີ, ອັດຕາສ່ວນຮ້ອຍບຳນານ 77%, ພ້ອມດຽວກັນນີ້ ທ່ານ ດຣ ບົວໄລ ແສນແກ້ວມີກໍ ຫົວໜ້າພະແນກສາທາລະນະສຸກແຂວງ ໃຫ້ກຽດຂື້ນມອບເງິນອຸດໜູນກ່ອນບຳນານ, ຈາກນັ້ນບັນດາທ່ານຕາງໜ້າສູນ, ໂຮງໝໍ ແລະຂະແໜງການຕ່າງໆອ້ອມຂ້າງພະແນກສາທາລະນະສຸກແຂວງ ກໍ່ໄດ້ມອບກະຕ່າຂອງຂວັນ ເພື່ອສະແດງເຖິງຄວາມຮູ້ບຸນຄຸນຂອງທ່ານທີ່ໄດ້ຊີ້ນຳໆພາໃນໄລຍະຜ່ານມາ.