ລາວໂຕໂຢຕ້າ ເຮັດເຊີໄພ້ສົ່ງ ໂຮມມະ ລົງສະໜາມນັດທໍາອິດລາວລີກ 1 ຜົນງານໄດ້ປະທັບໃຈ (ມີຄລິບ) - Laoedaily

ລາວໂຕໂຢຕ້າ ເຮັດເຊີໄພ້ສົ່ງ ໂຮມມະ ລົງສະໜາມນັດທໍາອິດລາວລີກ 1 ຜົນງານໄດ້ປະທັບໃຈ (ມີຄລິບ)

ລາວໂຕໂຢຕ້າ ເອັຟຊີ ສ້າງຄວາມຕື່ນເຕັ້ນໃຫ້ກັບ ແຟນບານ ທັງສະໜາມ ແລະ ແຟນບານທີ່ເບິ່ງຖ່າຍທອດສົດ ດ້ວຍການສົ່ງ ກາຊູ ໂຮມມະ ດາວຍິງສູງສຸດ ໃນລີກສູງສຸດຂອງ ສປປ ລາວ ປີ 2019 ໃນນັດຫຼ້າສຸດທີ່ ລາວໂຕໂຢຕ້າ ເອັຟຊີ ຖະຫຼົ່ມ ວຽງຈັນ ເອັຟຊີ ຂາດລອຍ 5-1 ໃນການແຂ່ງຂັນເປບຊີ ລາວລີກ 1 ລະດູການ 2020 ປະຈໍາວັນທີ 2 ສິງຫາ 2020 ທີ່ສະໜາມກີລາແຫ່ງຊາດ ຫຼັກ 16


ນັດດັ່ງກ່າວ ໂຮມມະ ລົງສະໜາມເປັນຕົວຈິງ ໂດຍນັດດັ່ງກ່າວ ແຟນບານສຸດປະທັບໃຈ ເພາະລາວສາມາດສົ່ງບານໃຫ້ເພື່ອນຮ່ວມທີມຍິງໄດ້ 2 ປະຕູ ພາທີມເອົາຊະນະ ວຽງຈັນ ເອັຟຊີ ໄປຂາດລອຍ 5-1 ເກັບເພີ່ມເປັນ 13 ຄະແນນຢຶດທີມນໍາຕາຕະລາງຄະແນນລວມ ໂດຍໜີຫ່າງ ມາສເຕີ 7 ເອັຟຊີ ທີ່ແຂ່ງຂັນໜ້ອຍກວ່າ 1 ນັດໄປ 3 ຄະແນນ.

ກາຊູ ໂຮມມະ ຍິງໄປ 14 ປະຕູເທົ່າກັບ ແກ້ວວຽງເພັດ ຄວ້າດາວຍິງສູງສຸດໃນເປບຊີ ລາວພຣີເມຍລີກ 2019 ເຊິ່ງເປັນດາວຍິງສູງສຸດສະໄໝທີ 5 ຂອງລາວອີກດ້ວຍ ກ່ອນທີ່ຈະຍ້າຍໄປຫຼິ້ນໃຫ້ກັບທີມໃນລີກປະເທດ Bhutan ໃນທ້າຍປີ 2019, ແຕ່ຕົ້ນປີ 2020 ລາວໂຕໂຢຕ້າ ເອັຟຊີ ປະກາດດຶງຕົວ ໂຮມມະ ຄືນຮັງ ກ່ອນທີ່ຈະເປີດຕົວຢ່າງເປັນທາງການໃນມື້ນີ້ ຫຼັງຈາກທີ່ກັກຕົວຄົບ 14 ວັນ ກ່ອນໄດ້ຮັບອະນຸຍາດໃຫ້ລົງສະໜາມໄດ້.

ຂ່າວ: ຄໍາສອນ
ຮູບ: ສອນໄຊ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ