ຊົມເຊີຍ! ປະຊາຊົນບ້ານດົງໝາກບ້າສາມັກຄີ ສ້ອມແປງເສັ້ນທາງເຂົ້າບ້ານ - Laoedaily

ຊົມເຊີຍ! ປະຊາຊົນບ້ານດົງໝາກບ້າສາມັກຄີ ສ້ອມແປງເສັ້ນທາງເຂົ້າບ້ານ

ຄວາມສາມັກຄີເປັນບໍ່ເກີດແຫ່ງຄວາມສໍາເລັດ ຄໍານີ້ຍັງໃຊ້ໄດ້ສະເໝີ ເພາະເກືອບທຸກໜ້າວຽກທີ່ມີການໃຊ້ແຮງງານ ຍ່ອມຕ້ອງມີຈໍານວນຄົນທີ່ຫຼາຍ ເພື່ອຈະເຮັດໃຫ້ວຽກນັ້ນ ສໍາເລັດລຸລ່ວງໄປໄດ້ດ້ວຍດີ, ດັ່ງພໍ່ແມ່ປະຊາຊົນ ບ້ານດົງໝາກບ້າ ເມືອງເຊບັ້ງໄຟ ແຂວງຄໍາມ່ວນ ໄດ້ຮ່ວມໃຈກັນສ້ອມແປງເສັ້ນທາງເຂົ້າບ້ານ.

ເພື່ອເປັນການສ້າງຂະບວນການ ຕ້ອນຮັບວັນສຳຄັນຕ່າງໆຂອງຊາດ,ຂອງພັກ ທີ່ຈະໝູນວຽນມາບັນຈົບຄົບຮອບອີກວາລະໜື່ງ ດັ່ງນັ້ນ ໃນຕອນເຊົ້າຂອງວັນທີ 21 ກໍລະກົດ 2020 ທີ່ຜ່ານມາ ຊາວບ້ານດົງໝາກບ້າ ເມືອງເຊບັ້ງໄຟ ໄດ້ພ້ອມໃຈກັນສ້າງຂະບວນການສ້ອມແປງເສັ້ນທາງເຂົ້າບ້ານ ເຊິ່ງນຳພາໂດຍ ທ່ານ ໃບພອນ ພິມມະສອນ ເລຂາພັກບ້ານ ດົງໝາກບ້າ, ທ່ານ ປັນຈາ ໄຊມະນີ ນາຍບ້ານໆ ດົງໝາກບ້າ ພ້ອມດ້ວຍອຳນາດການປົກຄອງ ແລະ ພໍ່-ແມ່ປະຊາຊົນພາຍໃນບ້ານ ຈຳນວນ 105 ຄົນ.

ຈຸດປະສົງໃນຄັ້ງນີ້ກໍ່ເພື່ອເປັນການສ້າງຂະບວນການອະນາໄມ 3 ສະອາດ, ເພື່ອເຮັດໃຫ້ການສັນຈອນໄປມາຫາສູ່ກັນຂອງພໍ່-ແມ່ປະຊາຊົນພາຍໃນບ້ານ ແລະ ການສັນຈອນໄປ-ມາລະຫວ່າງບ້ານຫາບ້ານ ໄປມາຫາສູ່ກັນມີຄວາມສະດວກສະບາຍຕື່ມ, ເຊິ່ງການອະນາໄມຄັ້ງນີ້ແມ່ນໄດ້ພ້ອມກັນຖາງປ່າອອກຈາກແຄມທາງ, ສ້ອມແປງເສັ້ນທາງເຂົ້້າບ້ານ ຖົມບ່ອນທີ່ເປັນບວກ, ຂຸມ ມີຄວາມຍາວ 3 ກິໂລແມັດ ແລະ ເພື່ອປ້ອງກັນພະຍາດໄຂ້ຍຸງລາຍທີ່ກຳລັງລະບາດຢູ່ໃນ ຊ່ວງລະດູຝົນນີ້.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ