ສຳນັກຂ່າວຊິນຮວາລາຍງານວ່າ: ທ່ານ ເສິນ ຊາວີ ເຈົ້າໜ້າທີ່ສຳນັກງານຄຸ້ມຄອງຕະຫຼາດແຫ່ງລັດ ເປີດເຜີຍວ່າ: ຈີນ ຈະສັ່ງປິດຕະຫຼາດຂາຍສັດປີກທີ່ຍັງມີຊີວິດຢູ່ທັງໝົດຕາມຂັ້ນຕອນ ເພື່ອຫຼຸດຄວາມສ່ຽງດ້ານສາທາລະນະສຸກ ຫຼັງເກີດການລະບາດຂອງພະຍາດໂຄວິດ – 19 ຮອບໃໝ່ໃນຫຼາຍພື້ນທີ່.
ທ່ານ ເສີນ ຍັງກ່າວວ່າ: ຈີນຈະປາບປາມການຄ້າ – ຂາຍສັດປ່າທີ່ຜິດກົດໝາຍ ແລະ ຫ້າມບໍລິໂພກສັດປ່າ, ພ້ອມທັງກຳນົດຂໍ້ຈຳກັດການຄ້າ – ຂາຍສັດປີກທີ່ຍັງມີຊີວິດຢູ່ຕາມທ້ອງຕະຫຼາດ. ພ້ອມລະບຸວ່າເຈົ້າໜ້າທີ່ກ່ຽວຂ້ອງຂອງລັດ ຈະຍົກລະດັບການຄວບຄຸມຕະຫຼາດກະສິກຳ ເພື່ອຄວາມປອດໄພທາງດ້ານອາຫານ.
ທ່ານ ຫູ ຈ້ຽນຜິ້ງ ເຈົ້າໜ້າທີ່ກະຊວງການຄ້າຂອງ ສປ ຈີນ ກ່າວວ່າ: ຈີນມີຕະຫຼາດກະສິກຳ 44 ພັນແຫ່ງໃນທົ່ວປະເທດ. ໃນນັ້ນ, ຕະຫຼາດຂາຍສົ່ງຫຼາຍກວ່າ 4.100 ແຫ່ງ, ຜົນຜະລິດດ້ານກະສິກຳ ປະມານ 70% ຖືກກະຈາຍຜ່ານຕະຫຼາດຂາຍສົ່ງ ເຊິ່ງເປັນຊ່ອງທາງຫຼັກໃນການຈຳໜ່າຍສິນຄ້າກະສິກຳ.
ແນວໃດກໍຕາມ, ທ່ານ ຫູ ຈ້ຽນຜິ້ງ ຍັງກ່າວເພີ່ມຕື່ມວ່າ: ຕະຫຼາດກະສິກຳທັງຂາຍສົ່ງ ແລະ ຂາຍຍ່ອຍ ຊ່ວຍຮັບປະກັນໃນການສະໜອງສິນຄ້າບໍລິໂພກຢ່າງພຽງພໍກັບຄວາມຕ້ອງການຂອງສັງຄົມ ແລະ ຕະຫຼາດເຫຼົ່ານີ້ຍັງຄົງເປີດໃຫ້ບໍລິການຕາມປົກກະຕິ ທ່າມກາງການແຜ່ລະບາດຂອງພະຍາດໂຄວິດ – 19.