ການລະບາດຂອງຕັກແຕນຝູງໄມ້ປ້ອງ ຢູ່ແຂວງຜົ້ງສາລີ ທໍາລາຍເນື້ອທີ່ການຜະລິດຂອງປະຊາຊົນໄປແລ້ວ 4,94 ເຮັກຕາ ຜົນຜະລິດເສຍຫາຍ 24 ລ້ານກວ່າກີບ.
ໃນວັນທີ 26 ມິຖຸນາ 2020 ຜ່ານມາ ອົງການປົກຄອງເມືອງໃໝ່ ແຂວງຜົ້ງສາລີ ໄດ້ຮັບການລາຍງານຈາກຄະນະພັກ ແລະ ປະຊາຊົນບ້ານເພຍລໍໃໝ່ວ່າມີຕັກແຕນຝູງໄມ້ປ່ອງ ເຂົ້າທຳລາຍແນວປູກຕ່າງໆຂອງພໍ່ແມ່ປະຊົນຢ່າງໜັກໜ່ວງ.
ທ່ານ ວຽງສະໄໝ ສີສົງຄາມ ຫົວໜ້າຫ້ອງການກະສິກຳ ແລະ ປ່າໄມ້ເມືອງໃໝ່ ພ້ອມດ້ວຍຄະນະໄດ້ລົງກວດກາສຳຫຼວດຕົວຈິງ ແລະ ໄດ້ລາຍງານໃຫ້ຮູ້ວ່າ: ປະຊາຊົນຢູ່ບ້ານເພຍລໍໃໝ່ ເມືອງໃໝ່ ແຂວງຜົ້ງສາລີ ໄດ້ຮັບຜົນກະທົບຈາກຕັກແຕນຝູງໄມ້ປ່ອງທຳລາຍເຂົ້າໄຮ່ ແລະ ແນວປູກອື່ນໆ ເຊິ່ງໄດ້ສົ່ງຜົນກະທົບໂດຍກົງຕໍ່ພໍ່ແມ່ປະຊາຊົນ ຈຳນວນ 20 ຄອບຄົວ ລວມເນື້ອທີ່ເສຍຫາຍ ທັງໝົດ 4,94 ເຮັກຕາ ປະເມີນມູນຄ່າເສຍຫາຍເບື້ອງຕົ້ນ 24.885.000 ກີບ.
ປັດຈຸບັນທາງຂະແໜງການທີ່ກ່ຽວຂ້ອງ ກໍຄືຫ້ອງການກະສິກຳ ແລະ ປ່າໄມ້ເມືອງ ໄດ້ລົງແຈກຢາຍຢາສີດພົ່ນໃຫ້ກັບພໍ່ແມ່ປະຊາຊົນ ຈໍານວນ 1.000 ຖົງ, 1 ຖົງໃສ່ນ້ຳໄດ້ 20 ລິດ ແລະ ສາມາດສີດໄດ້ໃນເນື້ອທີ່ ປະມານ 0,3 ເຮັກຕາ ແລະ ກໍໄດ້ນຳພາພໍ່ແມ່ປະຊາຊົນລົງພົ່ນສີດຕາມຫຼັກການບ່ອນທີ່ມີຝູງຕັກແຕນຈຳນວນຫຼວງຫຼາຍ.