ມອບ - ຮັບ ໂຄງການກໍ່ສ້າງອາຄານສຳນັກງານຫ້ອງການ ແລະ ສະໂມສອນລາວສະກາຍເວ - Laoedaily

ມອບ – ຮັບ ໂຄງການກໍ່ສ້າງອາຄານສຳນັກງານຫ້ອງການ ແລະ ສະໂມສອນລາວສະກາຍເວ

ລັດວິສາຫະກິດ ລາວສະກາຍເວ ພ້ອມນໍາໃຊ້ສໍານັກງານຫ້ອງການ ແລະ ສະໂມສອນລາວສະກາຍເວຫຼັງໃໝ່ ທີ່ສໍາເລັດການກໍ່ສ້າງໂດຍໃຊ້ທຶນ 25,6 ຕື້ກວ່າກີບ.

ທ່ານ ຄຳເຜີຍ ສີລາຊາ ປະທານ ບໍລິສັດ ກຸ່ມດວງຈະເລີນ ພັດທະນາກໍ່ສ້າງຈຳກັດ ກ່າວວ່າ: ໂຄງການກໍ່ສ້າງຕຶກສຳນັກງານຫ້ອງການ ແລະ ສະໂມສອນ ລາວສະກາຍເວ ທາງບໍລິສັດໄດ້ກໍ່ສ້າງສຳເລັດແລ້ວ 100% ໃນມູນຄ່າ 25,6 ຕື້ກີບ ພາຍຫຼັງໄດ້ເຊັນສັນຍາຮັບເໝົາກໍ່ສ້າງ ໃນວັນທີ 4 ທັນວາ ແລະ ໄດ້ວາງສີລາລືກ ໃນວັນທີ 20 ທັນວາ 2018 ໃນໄລຍະເວລາກໍ່ສ້າງ 18 ເດືອນ ນັບແຕ່ມື້ເຊັນສັນຍາເປັນຕົ້ນມາ ເຊິ່ງຜູ້ຮັບເໝົາກໍ່ສ້າງເປັນຜູ້ລົງທຶນກ່ອນ 100%.

ການກໍ່ສ້າງໂຄງການດັ່ງກ່າວ ປະກອບມີ 3 ໜ້າວຽກໃຫຍ່ ລາຍລະອຽດ ມີຄື: 1. ວຽກກໍ່ສ້າງອາຄານຫ້ອງການ 3 ຊັ້ນ ຂະໜາດ 43 ແມັດ x 21 ແມັດ ຈຳນວນ 1 ຫຼັງ; 2. ວຽກກໍ່ສ້າງອາຄານສະໂມສອນ ຂະໜາດ 42,5 ແມັດ x 31 ແມັດ ຈຳນວນ 1 ຫຼັງ ແລະ 3. ວຽກກໍ່ສ້າງເດີ່ນ ແລະ ບ່ອນຈອດລົດໃນເນື້ອທີ່ 1.650 ຕາແມັດ.

ທ່ານ ພັນເອກ ສີວຽງທອງ ກອນນິວົງ ຜູ້ອຳນວຍການໃຫຍ່ ລັດວິສາຫະກິດ ລາວເດີນອາກາດ ກ່າວວ່າ: ຈະນໍາໃຊ້ສໍານັກງານຫ້ອງການ ແລະ ສະໂມສອນແຫ່ງນີ້ໃຫ້ເກີດຜົນປະໂຫຍດສູງສຸດ ທັງເປັນມູນມໍລະດົກອັນລ້ຳຄ່າມອບໃຫ້ພະນັກງານຮຸ່ນຕໍ່ໄປໄດ້ສືບທອດນໍາໃຊ້, ເປັນຊັບສິນຄົງທີ່ຂອງລັດ ກໍຄືກະຊວງປ້ອງກັນປະເທດ ແລະ ຈະປະຕິບັດພັນທະສັນຍາໃນການຊໍາລະສະສາງໃຫ້ໄດ້ຕາມພັນທະສັນຍາກໍານົດໄວ້ຢ່າງເຂັ້ມງວດ.

ບໍລິສັດ ລັດວິສາຫະກິດ ລາວເດີນອາກາດ ໄດ້ຮັບການສ້າງຕັ້ງຂຶ້ນໃນວັນທີ 24 ມັງກອນ 2002 ມາຮອດປີ 2013 ກະຊວງປ້ອງກັນປະເທດ ເຫັນຄວາມສຳຄັນໃນການຂະຫຍາຍທຸລະກິດໄດ້ມອບຍົນ MA 60 ຈຳນວນ 2 ລຳ, ໄດ້ເປີດເສັ້ນບິນໄປ 6 ແຂວງ ພາກເໜືອ ແລະ ໜຶ່ງແຂວງພາກໃຕ້ ພ້ອມທັງໄດ້ຂະຫຍາຍກິດຈະການໆບິນ, ສ້າງຕັ້ງຫົວໜ່ວຍທຸລະກິດປິ່ນອ້ອມມີໂຮງແຮມ ແລະ ການທ່ອງທ່ຽວໄປພ້ອມ ໃນປີ 2017 ເພື່ອຮອງຮັບການຂະຫຍາຍຕົວຂອງບໍລິສັດໃນຕໍ່ໜ້າ.

ພິທີມອບ – ຮັບຈັດຂຶ້ນໃນວັນທີ 29 ມິຖຸນາຜ່ານມາ ທີ່ບ້ານວັດໄຕໃຫຍ່ທົ່ງ ເມືອງສີໂຄດຕະບອງ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະ ຂົນສົ່ງ, ທ່ານ ພົນຕີ ວົງຄຳ ພົມມະກອນ ຫົວໜ້າກົມໃຫຍ່ພາລາທິການກອງທັບ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ