ແລກປ່ຽນຄວາມຄິດ ທຸກບັນຫາມີທາງອອກ - Laoedaily

ແລກປ່ຽນຄວາມຄິດ ທຸກບັນຫາມີທາງອອກ

ຈາກການລະບາດຂອງພະຍາດໂຄວິດ – 19 ໄດ້ເຮັດໃຫ້ສະຖານະການ ການເມືອງໂລກມີການປ່ຽນແປງໄວສັບສົນບໍ່ສາມາດຄາດຄະເນໄດ້. ສະນັ້ນມັນຈຶ່ງຮຽກຮ້ອງໃຫ້ພວກເຮົາມີສະຕິເວລາເບິ່ງຂ່າວ ຫຼື ຮັບຂໍ້ມູນຈາກແຫຼ່ງຂ່າວຕ່າງໆເປັນຕົ້ນແມ່ນສື່ສັງຄົມອອນລາຍ.

ເປັນຫຍັງຈຶ່ງວ່າແນວນັ້ນ? ກໍຍ້ອນວ່າໃນສື່ສັງຄົມອອນລາຍນັ້ນມັນມີທັງເລື່ອງດີມີປະໂຫຍດ ແລະ ເລື່ອງຫຍໍ້ທໍ້; ທັງມີຂໍ້ມູນທີ່ເປັນເຈດຈຳນົງຂອງອິດທິກຳລັງປໍລະປັກທີ່ຫວັງມ້າງເພທຳລາຍຕໍ່ລະບອບຂອງພວກເຮົາ. ເຊິ່ງເຈດຕະນາທັງຫຼາຍທັງປວງນັ້ນເອີ້ນວ່າ: ຍຸດທະສາດຫັນປ່ຽນໂດຍສັນຕິ.

ຍຸດທະສາດຫັນປ່ຽນໂດຍສັນຕິແມ່ນຮູບການໜຶ່ງຂອງການຕໍ່ສູ້ຊົນຊັ້ນທີ່ຂ້ຽວຂາດເອົາເປັນເອົາຕາຍລະຫວ່າງລັດທິຈັກກະພັດ ແລະ ສັງຄົມນິຍົມໃນເມື່ອກ່ອນ. ຕາມຂໍ້ມູນຂອງຫຼາຍເອກະສານໃຫ້ຮູ້ວ່າ: ໃນເດືອນມັງກອນ 1953 ລັດຖະມົນຕີກະຊວງການຕ່າງປະເທດອາເມຣິກາ ດາແລັດ ໄດ້ຖະແຫຼງວ່າ: “… ການທັບມ້າງປະເທດສັງຄົມນິຍົມສາມາດເຮັດດ້ວຍວິທີສັນຕິວິທີຄື ນຳໃຊ້ວິທີທາງດ້ານແນວຄິດ ແລະ ຈິດຕະສາດເພື່ອບັນລຸເປົ້າໝາຍ; ສົມທົບວິທີການຕ່າງໆນັບທັງດ້ານການທະຫານ…” ນັ້ນຄືຈຸດເລີ່ມຕົ້ນຂອງຍຸດທະສາດຫັນປ່ຽນໂດຍສັນຕິ.

ຈາກນັ້ນບໍ່ພໍເທົ່າໃດປີເຂົາກໍເຮັດທົດລອງກັບປະເທດຮົງກາລີ ( 1956 ), ເຊັກໂກສະໂລວາກີ ( 1968 ), ໂປໂລຍ ( 1980 ), ສະຫະພາບໂຊຫວຽດ ( 1991 ) ແລະ ແລ້ວທັງໝົດລະບົບສັງຄົມນິຍົມໂລກກໍແຕກສະຫຼາຍ.

ຍຸດທະສາດຫັນປ່ຽນໂດຍສັນຕິແມ່ນການຕໍ່ສູ້ທີ່ດຳເນີນຢູ່ພາຍໃນຂອງປະເທດໃດໜຶ່ງທີ່ບໍ່ເດີນຕາມເສັ້ນທາງຂອງມະຫາອຳນາດຕາເວັນຕົກເຊິ່ງວິທີການຕົ້ນຕໍແມ່ນໃຊ້ຈິດຕະວິທະຍາເພື່ອຊວນເຊື່ອໃຫ້ປະລະທາດແທ້ ແລະ ອຸດົມການ; ແບ່ງແຍກຄວາມສາມັກຄີພາຍໃນເຊິ່ງສ່ວນຫຼາຍແມ່ນຜ່ານສື່ຕ່າງໆ; ໂດຍສະເພາະສື່ອອນລາຍ.

ການດຳເນີນຍຸດທະສາດຫັນປ່ຽນໂດຍສັນຕິໃນທີ່ຜ່ານມາຢູ່ແຕ່ລະປະເທດ ສ່ວນຫຼາຍແມ່ນຜ່ານສອງບາດກ້າວເຊັ່ນ: ບາດກ້າວທີ່ໜຶ່ງ: ສ້າງຫັນປ່ຽນແຍກຢູ່ທາງໃນ, ສ້າງວິກິດການທາງດ້ານເສດຖະກິດ – ສັງຄົມກ້າວໄປເຊິ່ງວິທີທາງການເມືອງ ເພື່ອປຸກລະດົມມະຫາຊົນຕໍ່ສູ້ທວງເອົາປະຊາທິປະໄຕຫຼາຍພັກ, ຫຼາຍເຄົ້າ, ທວງໃຫ້ແກ້ໄຂຊີວິດການເປັນຢູ່ອັນເກີນຄວາມສາມາດຕົວຈິງຂອງອຳນາດການປົກຄອງກ້າວໄປສ້າງເສດຖະກິດຕາມທ່າອ່ຽງນິຍົມຂອງປະເທດມະຫາອຳນາດ. ບາດກ້າວທີ່ສອງ: ໃນເມື່ອຫັນປ່ຽນບໍ່ໄດ້ຮັບຜົນ ຫຼື ບໍ່ບັນລຸລະດັບໃດໜຶ່ງເມື່ອມີໂອກາດອຳນວຍຈະປຸກລະດົມຂະບວນການລຸກຮືຂຶ້ນໂຄ່ນລົ້ມລະບອບການປົກຄອງ ຫຼື ດ້ວຍຮູບການລັດຖະປະຫານ.

ເຖິງແມ່ນວ່າສະຖານະການຂອງໂລກຈະປ່ຽນໄປແນວໃດກໍ່ຕາມແຕ່ບັນດາອິດທິກຳລັງປໍລະປັກກໍຍັງຄົງສືບຕໍ່ດຳເນີນຍຸດທະສາດຫັນປ່ຽນໂດຍສັນຕິ ບໍ່ມີຫຍັງປ່ຽນແປງ. ກົງກັນຂ້າມຍິ່ງເພີ່ມທະວີໂດຍແນໃສ່ກໍ່ສ້າງໃຫ້ເກີດປັດໄຈ ແລະ ເງື່ອນໄຂຈາກທາງໃນ ເພື່ອລໍຖ້າໂອກາດອັນສຸກງອມແລ້ວກໍຊຸກຍູ້ປຸກລະດົມການລຸກຮືຂຶ້ນແຫ່ຂະບວນປະທ້ວງ ແລະ ໂຄ່ນລົ້ມຜູ້ນຳ ຫຼື ລະບອບການເມືອງຂອງປະເທດນັ້ນ. ອັນນີ້ແມ່ນເປົ້າໝາຍສູງສຸດຂອງພວກເຂົາເຊິ່ງໄດ້ຮັບຜົນສຳເລັດມາແລ້ວຢູ່ບາງປະເທດໃນເຂດຕາເວັນອອກກາງ ແລະ ອາຟຣິກກາເໜືອ.

ໃນຍຸກແຫ່ງຂໍ້ມູນຂ່າວສານ, ການປະກົດຕົວຂອງສືອອນລາຍຕ້ອງຍອມຮັບວ່າເປັນແຫຼງກະຈາຍທີ່ສຳຄັນຂອງຍຸດທະສາດຫັນປ່ຽນໂດຍສັນຕິ ສະນັ້ນການເສບສື່ໃນປັດຈຸບັນມັນຮຽກຮ້ອງໃຫ້ທຸກຄົນໃນສັງຄົມຕ້ອງມີສະຕິກັ່ນຕອງ ແລະ ພິຈາລະນາວ່າອັນໃດຄວນເຊື່ອ ແລະ ອັນໃດຄວນປະຕິເສດ, ໄປຄຽງຄູ່ກັນນັ້ນກໍ່ຕ້ອງມີການອະທິບາຍຕໍ່ທຸກບັນຫາທີ່ສັງຄົມຕັ້ງຂຶ້ນຜ່ານສື່ອອນລາຍ. ທຸກບັນຫາມີທາງອອກເຮົາບໍ່ອະທິບາຍຜູ້ອື່ນກໍ່ອະທິບາຍ, ເຮົາບໍ່ກຳເອົາຜູ້ອື່ນກໍກຳເອົາ.

ຂໍສະເໜີເປັນການແລກປ່ຽນນໍ !
(ຈົບ)

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ