ກັບຄືນສູ່ໂມດປົກກະຕິ ເປີດຂະບວນການເສຍຄ່າທໍານຽມທາງ ແລະ ພາສີທີ່ດິນ - Laoedaily

ກັບຄືນສູ່ໂມດປົກກະຕິ ເປີດຂະບວນການເສຍຄ່າທໍານຽມທາງ ແລະ ພາສີທີ່ດິນ

ສືບຕໍ່ຫັນເອົາວຽກງານເກັບລາຍຮັບເຂົ້າງົບປະມານແຫ່ງລັດເຂົ້າສູ່ລະບົບທັນສະໄໝເທື່ອລະກ້າວ ພ້ອມທັງຮັບປະກັນໃຫ້ແກ່ການເກັບລາຍຮັບບັນລຸຕາມແຜນການທີ່ມອບໝາຍ ຫຼື ລື່ນແຜນການ. ຫຼ້າສຸດ, ສ່ວຍສາອາກອນປະຈໍານະຄອນຫຼວງວຽງຈັນ ຮ່ວມກັບ ທະນາຄານການຄ້າຕ່າງປະເທດລາວ ມະຫາຊົນເປີດຂະບວນການເສຍຄ່າທໍານຽມທາງ ແລະ ພາສີທີ່ດິນ ຜ່ານລະບົບທະນາຄານ ປະຈໍາປີ 2020.


ທ່ານ ວົງທອງ ຄໍາກິແກ້ວ ຮອງຫົວໜ້າສ່ວຍສາອາກອນ ປະຈໍານະຄອນຫຼວງວຽງຈັນ ໃຫ້ຮູ້ວ່າ: ການເປີດຂະບວນການເສຍຄ່າທໍານຽມທາງ ແລະ ພາສີທີ່ດິນ ຜ່ານລະບົບທະນາຄານ ປະຈໍາປີ 2020 ເປັນການປຸກລະດົມຂົນຂວາຍ – ກະຕຸກຊຸກຍູ້ ແລະ ອໍານວຍຄວາມສະດວກໃຫ້ທຸກພາກສ່ວນໄດ້ມາເສຍຄ່າທໍານຽມທາງ ແລະ ພາສີທີ່ດິນ ປະຈໍາປີ 2020 ເປັນຂະບວນຟົດຟື້ນ, ສິ່ງສໍາຄັນກໍແມ່ນການສ້າງຂະບວນການໃຫ້ເປັນແບບຢ່າງນໍາໜ້າສະແດງເຖິງສະຕິຕື່ນຕົວ, ຄວາມສະໝັກໃຈທີ່ປະກອບສ່ວນເຂົ້າໃນງົບປະມານແຫ່ງລັດ ກໍຄືການສ້າງສາພັດທະນາປະເທດຊາດ, ເພາະການປະຕິບັດພັນທະເຂົ້າໃນງົບປະມານແຫ່ງລັດແມ່ນໜ້າທີ່ຂອງທຸກພາກສ່ວນ ນັບທັງອົງການຈັດຕັ້ງພັກ – ລັດ, ອົງການຈັດຕັ້ງມະຫາຊົນ, ຫົວໜ່ວຍທຸລະກິດ ແລະ ພົນລະເມືອງລາວທຸກໆຄົນຕ້ອງມີສ່ວນຮ່ວມ.


ສະນັ້ນ, ຂໍເຊີນຊວນອົງການຈັດຕັ້ງທຸກພາກສ່ວນ, ພະນັກງານລັດຖະກອນ, ພໍ່ແມ່ປະຊາຊົນ ພ້ອມກັນປະກອບສ່ວນມອບພັນທະເຂົ້າງົບປະມານແຫ່ງລັດດ້ວຍການເສຍຄ່າທໍານຽມທາງ ແລະ ພາສີທີ່ດິນ, ຮັບປະກັນໃຫ້ໄດ້ໝາກຜົນ ແລະ ຕາມລະດັບຄາດໝາຍ. ສ່ວນແຜນການຕໍ່ໜ້າຈະເປີດຂະບວນການດັ່ງກ່າວນີ້ອີກ 13 ຈຸດທົ່ວນະຄອນຫຼວງໃນປີ 2020 ນີ້.


ພິທີດັ່ງກ່າວຈັດຂຶ້ນໃນວັນທີ 16 ມິຖຸນາ ທີ່ພະແນກການເງິນ ນະຄອນຫຼວງວຽງຈັນ ເຂົ້າຮ່ວມມີ ທ່ານ ສີລິລາດທົງສິນ ທອງເພັງ ຫົວໜ້າພະແນກການເງິນ ນະຄອນຫຼວງວຽງຈັນ, ທ່ານ ວົງທອງ ຄໍາກິແກ້ວ ຮອງຫົວໜ້າສ່ວຍສາອາກອນ ປະຈໍານະຄອນຫຼວງວຽງຈັນ, ມີທ່ານ ຄໍາຕັນ ສີສູນທອນ ຮອງຫົວໜ້າພະແນກບໍລິການລູກຄ້າລາຍໃຫຍ່ ທະນາຄານການຄ້າຕ່າງປະເທດລາວ ມະຫາຊົນ ມີບັນດາພະນັກງານ, ຂະແໜງສ່ວຍສາອາກອນ ນວ, ພະແນກການເງິນ ນະຄອນຫຼວງວຽງຈັນເຂົ້າຮ່ວມ.

ຂ່າວ: ສົມສະຫວິນ;

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ