ເມືອງສິງ ພົບຮ້ານຄ້າລັກລອບຂາຍສິນຄ້າຕ້ອງຫ້າມ, ເສື່ອມຄຸນນະພາບ 12 ລາຍການ - Laoedaily

ເມືອງສິງ ພົບຮ້ານຄ້າລັກລອບຂາຍສິນຄ້າຕ້ອງຫ້າມ, ເສື່ອມຄຸນນະພາບ 12 ລາຍການ

ຄະນະສະເພາະກິດອາຫານ ແລະ ຢາ ເມືອງສິງ ແຂວງຫຼວງນໍ້າທາ ລົງພື້ນທີ່ກວດກາສິນຄ້າຢູ່ບັນດາຕະຫຼາດພາຍໃນເມືອງ ພົບສິນຄ້າຕ້ອງຫ້າມ ຖືກນໍາມາວາງຂາຍຮ້ານຂາຍເຄື່ອງຍ່ອຍ ເຖິງ 12 ລາຍການ ມູນຄ່າ 4 ລ້ານກວ່າກີບ.

ໃນໄລຍະວັນທີ 10 ຫາ 12 ມິຖຸນາ 2020 ຄະນະສະເພາະກິດອາຫານ ແລະ ຢາຂັ້ນເມືອງ ໄດ້ລົງກວດກາສິນຄ້າທີ່ໝົດອາຍຸຢູ່ຕະຫຼາດ ແລະ ບັນດາຮ້ານຂາຍຍ່ອຍພາຍໃນເມືອງສິງ ແຂວງຫຼວງນໍ້າທາ.

ພາບປະກອບຂ່າວເທົ່ານັ້ນ

ການກວດໃນຄັ້ງນີ້ ໄດ້ພົບຮ້ານຂາຍເຄື່ອງຍ່ອຍຈຳນວນໜຶ່ງຍັງຈຳໜ່າຍສິນຄ້າທີ່ຕ້ອງຫ້າມເຊັ່ນ ຢາປິ່ນປົວພະຍາດ, ຢາສູບທີ່ຫ້າມນໍາເຂົ້າ ຢາສູບຫວຽດ, ຢາສູບຈີນ, ອາຫານສຳເລັດຮູບ, ເຄື່ອງດື່ມທີ່ໝົດອາຍຸ ແລະ ເສື່ອມຄຸນນະພາບລວມ 12 ລາຍການ, ລວມມູນຄ່າ 4.100.000 ກີບ.

ພາບປະກອບຂ່າວເທົ່ານັ້ນ

ການລົງພື້ນທີ່ໃນຄັ້ງນີ້ ກໍ່ເພື່ອເຮັດໃຫ້ຮ້ານຂາຍເຄື່ອງຕ່າງໆພາຍໃນເມືອງມີຄວາມເປັນລະບຽບ ບໍ່ໃຫ້ນໍາເອົາເຄື່ອງດື່ມທີ່ໝົດອາຍຸ, ເສື່ອມຄຸນນະພາບມາຈໍາໜ່າຍຢູ່ໃນທ້ອງຕະຫຼາດ ແລະ ຮ້ານຂາຍຍ່ອຍ, ທັງນີ້ກໍ່ເພື່ອປົກປ້ອງຜູ້ຊົມໃຊ້ໃຫ້ໄດ້ຮັບອາຫານ, ເຄື່ອງດື່ມທີ່ມີຄຸນນະພາບ ແລະ ປອດໄພ.

ຂໍ້ມູນຈາກ: ຂ່າວສານຫຼວງນໍ້າທາ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ