ຈົກ 4,8 ຕື້ກວ່າກີບ ສ້າງ ສະຖາບັນຍຸຕິທໍາພາກໃຕ້ - Laoedaily

ຈົກ 4,8 ຕື້ກວ່າກີບ ສ້າງ ສະຖາບັນຍຸຕິທໍາພາກໃຕ້

ໃນຕອນເຊົ້າວັນທີ 18 ມິຖຸນາ 2020, ທີ່ເຂດພັດທະນາ ບ້ານຄອນໄຫຼ ນະຄອນປາກເຊ ແຂວງຈໍາປາສັກໄດ້ມີພິທີວາງສີລາລຶກໂຄງການກໍ່ສ້າງອາຄານສະຖາບັນຍຸຕິທໍາພາກໃຕ້ ຢ່າງເປັນທາງການ, ໂດຍການໃຫ້ກຽດເຂົ້າຮ່ວມຂອງ ທ່ານ ໄຊສີ ສັນຕິວົງ ລັດຖະມົນຕີກະຊວງຍຸຕິທໍາ, ທ່ານ ເມກສະຫວັນ ພົມພິທັກ ຮອງເລຂາພັກແຂວງ ປະທານສະພາປະຊາຊົນແຂວງ, ພ້ອມພາກສ່ວນກ່ຽວຂ້ອງເຂົ້າຮ່ວມ.

ໂຄງການກໍ່ສ້າງອາຄານສະຖາບັນຍຸຕິທໍາພາກໃຕ້ທີ່ຈະກໍ່ສ້າງນີ້ມີຂະໜາດກວ້າງ 10 ແມັດ, ຍາວ 68 ແມັດ, ເປັນອາຄານ 2 ຊັ້ນ, ປະກອບດ້ວຍ 10 ຫ້ອງຮຽນ, ນອກຈາກນີ້ກໍຈະມີຫ້ອງການ, ຫ້ອງປະຊຸມ ສິ່ງອໍານວຍຄວາມສະດວກອື່ນໆ. ເຊິ່ງມີມູນຄ່າການກໍ່ສ້າງທັງໝົດ 4.898ລ້ານກີບ ໂດຍແມ່ນກະຊວງຍຸຕິທໍາເປັນເຈົ້າຂອງໂຄງການ ແລະ ຮັບເໝົາກໍ່ສ້າງໂດຍ ບໍລິສັດກໍ່ສ້າງຂົວ- ທາງ ແລະຕິດຕັ້ງໄຟຟ້າຄົບວົງຈອນ ໄຊສົມບູນ, ຕາມແຜນການ ແລະສັນຍາຈະກໍ່ສ້າງໃຫ້ສໍາເລັດພາຍໃນ 12 ເດືອນ ຫຼື 1 ປີ ນັບແຕ່ມື້ວາງສີລາລຶກກໍ່ສ້າງເປັນຕົ້ນໄປ.

ແນວໃດກໍ່ຕາມ ຫາກການກໍ່ສ້າງໂຄງການດັ່ງກ່າວສໍາເລັດຈະອໍານວຍຄວາມສະດວກໃຫ້ແກ່ການຮຽນ-ການສອນ ກໍຄືການກໍ່ສ້າງບຸກຄະລາກອນທາງດ້ານກົດຫໝາຍໃຫ້ແກ່ແຂວງຈໍາປາສັກ, ສາລະວັນ, ເຊກອງ,ອັດຕະປື ເວົ້າລວມກໍຄື 4 ແຂວງພາກໃຕ້ຫຼາຍຂຶ້ນ.

ຂໍ້ມູນຈາກ: Champasak RADIO Station100,7 Mhz

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ