2 ບໍລິສັດ ຮ່ວມມືເຊັນ MOU ພັດທະນາໂຮງງານຜະລິດຢາເລກ2. - Laoedaily

2 ບໍລິສັດ ຮ່ວມມືເຊັນ MOU ພັດທະນາໂຮງງານຜະລິດຢາເລກ2.

ເພື່ອເປັນການຂະຫຍາຍຖານການຜະລິດຢາໃຫ້ມີຫຼາກຫຼາຍຜະລິດຕະພັນ ແລະ ສະໜອງຢາທີ່ມີຄຸນນະພາບອອກຮັບໃຊ້ສັງຄົມ ດັ່ງນັ້ນ 2 ລັດວິສາຫະກິດ ໂຮງງານຜະລິດຢາເລກ 2 ຮ່ວມກັບ ກຸ່ມບໍລິສັດໂຄລາວ (ແອລວີເອັມຊີ ໂຮນດີ້ງ) ໄດ້ເຊັນບົດບັນທຶກຮ່ວມມືເພື່ອພັດທະນາໂຮງງານຜະລິດຢາເລກ2 ໃຫ້ກາຍເປັນໂຮງງານທີ່ທັນສະໄໝຂຶ້ນກວ່າເກົ່າ.

ໃນວັນທີ 18 ມິຖຸນາ 2020 ລັດວິສາຫະກິດ ໂຮງງານຜະລິດຢາເລກ 2 ຮ່ວມກັບ ກຸ່ມບໍລິສັດໂຄລາວ (ແອລວີເອັມຊີ ໂຮນດີ້ງ) ໄດ້ຈັດພິທີເຊັນບົດບັນທຶກຄວາມເຂົ້າໃຈ ໃນການພັດທະນາໂຮງງານຜະລິດຢາເລກ 2 ຂຶ້ນ, ໂດຍການລົງນາມຂອງທ່ານ ດຣ. ເພັດສະໝອນ ພິລົມລັກ ຜູ້ອຳນວຍການບໍລິສັດລັດວິສາຫະກິດ ໂຮງງານຢາເລກ2 ກະຊວງສາທາລະນະສຸກ ກັບ ທ່ານ ປອ. ຄຳຂັນ ນະພາວົງ ຮອງປະທານໃຫຍ່ກຸ່ມບໍລິສັດໂຄລາວ; ໂດຍການເຂົ້າຮ່ວມເປັນສັກຂີພິຍານຂອງທ່ານ ດຣ. ບຸນຊູ ແກ້ວຫາວົງ ຮອງຫົວໜ້າກົມອາຫານ ແລະ ຢາ ກະຊວງສາທາລະນະສຸກ, ທ່ານ ເຊຢັງໂອ ປະທານໃຫຍ່ ບໍລິສັດ ແອລວີເອັມຊີ, ພ້ອມມີບັນດາຮອງອຳນວຍການ ແລະ ຄະນະທັງ 2 ຝ່າຍເຂົ້າຮ່ວມ. ທີ່ຫ້ອງປະຊຸມບໍລິສັດໂຄລາວ.

ໃນໂອກາດນີ້ ທ່ານ ປອ. ຄຳຂັນ ນະພາວົງ ຮອງປະທານໃຫຍ່ ກຸ່ມມບໍລິສັດໂຄລາວ ໄດ້ກ່າວວ່າ: ການເຊັນບົດບັນທຶກຄວາມເຂົ້າໃຈ ລະຫວ່າງ 2 ບໍລິສັດໃນມື້ນີ້ ຈຸດປະສົງແມ່ນເພື່ອຮ່ວມທຶນກັນໃນການພັດທະນາ ໂຮງງານຜະລິດຢາເລກ2 ເຊິ່ງເປັນບາດກ້າວທຳອິດພວກເຮົາໄດ້ປຶກສາຫາລືກັນ ເພື່ອຈະພ້ອມກັນກ້າວໄປສູ່ການປຶກສາຫາລືກັນຢ່າງລະອຽດ ແລະ ຈະມີສັນຍາຮ່ວມມືກັນຢ່າງລະອຽດໃນຂັ້ນຕໍ່ໄປ.

ສຳລັບດ້ານຈິດໃຈຂອງກຸ່ມບໍລິສັດໂຄລາວ ແລະ ບໍລິສັດລັດວິສາຫະກິດ ໂຮງງານຢາເລກ2 ກະຊວງສາທາລະນະສຸກ ແມ່ນຢາກພັດທະນາໂຮງງານຢາເລກ2 ໃຫ້ກາຍເປັນໂຮງງານທີ່ທັນສະໄໝ ແລະ ມີຜະລິດຕະພັນທີ່ຫຼາກຫຼາຍ ສາມາດຮັບໃຊ້ສັງຄົມ ພ້ອມກັນນັ້ນພວກເຮົາຈະພ້ອມກັນຫາວິທີເຮັດໃຫ້ຜະລິດຕະພັນໃຫ້ມີຄຸນນະພາບສາມາດສົ່ງອອກໄດ້ ແລະ ຫວັງວ່າການຮ່ວມມືລະຫວ່າງ 2 ບໍລິສັດຈະມີຜົນສຳເລັດແນ່ນອນໃນອະນາຄົດ.

ທ່ານ ດຣ. ເພັດສະໝອນ ພິລົມລັກ ຜູ້ອຳນວຍການ ບໍລິສັດລັດວິສາຫະກິດ ໂຮງງານຢາເລກ2 ໄດ້ກ່າວວ່າ: ການເຊັນບົດບັນທຶກໃນມື້ນີ້ແມ່ນເປັນກາລະໂອກາດທີ່ມີຄວາມໝາຍສຳຄັນ ທັງເປັນບ່ອນອີງໃຫ້ 2 ຝ່າຍໃນການກະກຽມການຮ່ວມມື ຕາມທິດທາງນະໂຍບາຍຂອງລັດຖະບານ ເພື່ອພັດທະນາເສດຖະກິດ-ສັງຄົມແຫ່ງຊາດໃຫ້ເຂັ້ມແຂງ ແລະ ຍືນຍົງ, ທັງເປັນການກຽມສ້າງບົດວິພາກເສດຖະກິດເພື່ອນຳສະເໜີການຈັດຕັ້ງຂັ້ນເທິງ, ເຊິ່ງໂຮງງານຢາເລກ2 ເປັນໂຮງງານຜະລິດຢາທີ່ເກົ່າແກ່ມີປະສົບການທີ່ຍາວນານໃນການຜະລິດສິນຄ້າທີ່ເປັນຢາປິ່ນປົວພະຍາດຕ່າງໆ ທີ່ໄດ້ຮັບຄວາມນິຍົມ ແລະ ຄວາມເຊື່ອຖືຈາກສັງຄົມມາໂດຍຕະຫຼອດ ແລະ ກຸ່ມບໍລິສັດໂຄລາວກໍ່ເປັນບໍລິສັດທີ່ໃຫຍ່ໂຕເຂັ້ມແຂງ ມີປະສົບການ ແລະ ມີຄວາມສຳເລັດຢ່າງຫຼວງຫຼາຍໃນການດຳເນີນທຸລະກິດຕ່າງໆທັງຢູ່ໃນ ສປປ ລາວ ແລະ ຕ່າງປະເທດ.

ຂ້າພະເຈົ້າເຊື່ອໝັ້ນວ່າເປັນການລິເລີ່ມທີ່ດີ ແລະ ເປັນຄູ່ຮ່ວມພັດທະນາທີ່ດີໃນອະນາຄົດທີ່ກ້າວໄກ ລະຫວ່າງ ລັດວິສາຫະກິດ ໂຮງງານຜະລິດຢາເລກ 2 ຮ່ວມກັບ ກຸ່ມບໍລິສັດໂຄລາວ (ແອລວີເອັມຊີ ໂຮນດີ້ງ) ທີ່ຈະຮ່ວມມືກັນພັດທະນາ ແລະ ຕໍ່ຍອດເຮັດໃຫ້ໂຮງງານຜະລິດຢາຂອງລາວເຮົາກາຍເປັນໂຮງງານຜະລິດຢາທີ່ທັນສະໄໝ, ມີມາດຕະຖານສູງ, ຕອບສະໜອງໄດ້ຕາມຄວາມຮຽກຮ້ອງຕ້ອງການຂອງລູກຄ້າກໍ່ຄືສັງຄົມ ແລະ ຈະກາຍເປັນໃບໜ້າໃບຕາທີ່ໜ້າພູມໃຈໃຫ້ແກ່ປະເທດຊາດ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ