5 ປີຜ່ານມາ ສາທາລະນະສຸກແຂວງໄຊຍະບູລີ ປິ່ນປົວຄົນເຈັບໄດ້ 2,7 ແສນເທື່ອຄົນ - Laoedaily

5 ປີຜ່ານມາ ສາທາລະນະສຸກແຂວງໄຊຍະບູລີ ປິ່ນປົວຄົນເຈັບໄດ້ 2,7 ແສນເທື່ອຄົນ

ວຽກງານສາທາລະນະສຸກ ເປັນໜ້າວຽກທີ່ໜັກ ແລະ ສໍາຄັນຫຼາຍ, ຜູ້ຮັບຜິດຊອບໜ້າທີ່ນີ້ ຕ້ອງກຽມພ້ອມເພື່ອຮັບມືປິ່ນປົວຄົນເຈັບຈໍານວນບໍ່ໜ້ອຍໃນແຕ່ລະມື້, ດັ່ງແຂວງໄຊຍະບູລີ ທີ່ໃນໄລຍະ 5 ປີຜ່ານມາ ຂະແໜງການສາທາລະນະສຸກ ປິ່ນປົວຄົນເຈັບເຖິງ 277.465ເທື່ອຄົນ.

ພະແນກສາທາລະນະສຸກແຂວງໄຊຍະບູລີ ປະຕິບັດນະໂຍບາຍ 5 ດີ 1 ພໍໃຈ ໃນໄລຍະ 5 ປີຜ່ານມາ ກວດ ແລະ ປິ່ນປົວຄົນເຈັບໄດ້ທັງໝົດ 277.465 ຄົນ, ການຈັດຕັ້ງປະຕິບັດ 10 ຕົວຊີ້ວັດ ແມ່ນປະຕິບັດໄດ້ບັນລຸແຜນການມີ 7 ຕົວຊີ້ວັດ ແລະ ຍັງ 3 ຕົວຊີ້ວັດບໍ່ບັນລຸ.

ກອງປະຊຸມໃຫຍ່ ຄັ້ງທີ I ຂອງຄະນະພັກຮາກຖານພະແນກສາທາລະນະສຸກແຂວງ ໄຊຍະບູລີ ໄດ້ໄຂຂຶ້ນໃນວັນທີ 16 ມິຖຸນາ 2020 ທີ່ຫ້ອງປະຊຸມຫ້ອງວ່າການປົກຄອງເມືອງໄຊຍະບູລີ ໂດຍການເປັນປະທານຂອງ ສະຫາຍ ສິງຄໍາ ຮັກປະເສີດ ວ່າການເລຂາຄະນະພັກຮາກຖານ ຫົວໜ້າພະແນກສາທາລະນະສຸກແຂວງ, ເຂົ້າຮ່ວມມີ ສະຫາຍ ພົງສະຫວັນ ສິດທະວົງ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໄຊຍະບູລີ, ມີເລຂາ, ຮອງເລຂາໜ່ວຍພັກ, ສະມາຊິກພັກສົມບູນ, ສໍາຮອງເຂົ້າຮ່ວມ 150 ກວ່າສະຫາຍ.

ສະຫາຍ ສິງຄໍາ ຮັກປະເສີດ ໄດ້ຜ່ານລາຍງານການເມືອງທັງສອງພາກວ່າ: ຈໍານວນສະມາຊິກພັກມີທັງໝົດ 127 ສະຫາຍ ຍິງ 82 ສະຫາຍ, ມີພະນັກງານລັດຖະກອນທັງໝົດ 217 ສະຫາຍ ຍິງ 144 ສະຫາຍ.

ໃນ 5 ປີຜ່ານມາ ຄະນະພັກຮາກຖານໄດ້ເອົາໃຈໃສ່ວຽກງານການເມືອງເປັນວຽກບຸລິມະສິດ ເພີ່ມທະວີກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນຢ່າງຕໍ່ເນື່ອງ. ຄຽງຄູ່ກັບການ ປະຕິບັດນະໂຍບາຍ 5 ດີ 1 ພໍໃຈ.

ພາບປະກອບຂ່າວເທົ່ານັ້ນ

ໃນໄລຍະ 5 ປີຜ່ານມາ ກວດ ແລະ ປິ່ນປົວຄົນເຈັບໄດ້ທັງໝົດ 277.465 ເທື່ອຄົນ. ໃນນີ້, ກວດເຂດນອກ 222.586 ເທື່ອຄົນ, ນອນໂຮງໝໍ 55.658 ເທື່ອຄົນ, ສະເລ່ຍວັນນອນໂຮງໝໍ 3,52 ວັນ, ອັດຕາການໝູນໃຊ້ຕຽງ 94%, ມີລະບົບປະກັນສຸຂະພາບປົກຄຸມ 100% ຂອງປະຊາກອນທົ່ວແຂວງ. ການຈັດຕັ້ງປະຕິບັດ 10 ຕົວຊີ້ວັດ ແມ່ນປະຕິບັດໄດ້ບັນລຸແຜນການມີ 7 ຕົວຊີ້ວັດ ແລະ ຍັງ 3 ຕົວຊີ້ວັດ ບໍ່ບັນລຸ ຄື: ຕົວຊີ້ວັດທີ 5 ອັດຕາການຕາຍຂອງແມ່, ຕົວຊີ້ວັດ 6 ອັດຕາການເກີດລູກມີແພດຊ່ວຍ, ຕົວຊີ້ວັດ 7 ອັດຕາການສັກຢາກັນພະຍາດ.

ກອງປະຊຸມໄດ້ເລືອກເອົາ ສະຫາຍ ສິງຄໍາ ຮັກປະເສີດ ເປັນເລຂາຄະນະພັກຮາກຖານ, ສະຫາຍ ດຣ. ແກ່ນ ດວງດີ ເປັນຮອງເລຂາຄະນະພັກຮາກຖານທັງເປັນປະທານກວດກາຄະນະພັກຮາກຖານພະແນກສາທາລະນະສຸກແຂວງ.

[ ຂ່າວ: ບຸນທີ ]

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ