ຈະຈັດງານມະຫາກຳແຮງງານ(ຊອກວຽກ)ທາງອອນລາຍຄັ້ງທຳອິດໃນລາວໄວໆນີ້ - Laoedaily

ຈະຈັດງານມະຫາກຳແຮງງານ(ຊອກວຽກ)ທາງອອນລາຍຄັ້ງທຳອິດໃນລາວໄວໆນີ້

ຫລັງສະພາບການລະບາດຂອງພະຍາດໂຄວິດ-19 ເລີ່ມຈາງຫາຍ ຫຼາຍທຸລະກິດກໍ່ກັບມາດຳເນີນກິດຈະການ ຈາກທີ່ມີຫຼາຍຄົນຕົກວຽກຕົກງານກໍ່ຈະມີຫຼາຍບໍລິສັດຕ້ອງການແຮງງານເຊັ່ນດຽວກັນ ສະນັ້ນ ເພື່ອເປີດໂອກາດໃຫ້ທັງຜູ້ຕ້ອງການແຮງງານ ແລະ ກຳລັງຫາວຽກເຮັດງານທຳໄດ້ມາພົບພໍ້ກັນ ບໍລິສັດ 108-1009 ກຣຸບ ຈຳກັດ ຈະຈັດມະຫະກຳວຽກເຮັດງານທໍາ ທາງອອນລາຍ ຄັ້ງທໍາອິດ ໃນ ສປປ ລາວ.

ງານດັ່ງກ່າວແມ່ນ ຈະຈັດຂຶ້ນລະຫວ່າງວັນທີ 24-30 ມິຖຸນາ 2020 ໃນຮູບແບບອອນລາຍ 100%, ເຊິ່ງທາງຜູ້ຈັດງານໄດ້ຕັ້ງເປົ້າວ່າຈະມີບໍລິສັດ ແລະ ອົງກອນຕ່າງໆ 50 ກວ່າແຫ່ງເຂົ້າປະກາດຮັບພະນັກງານ ແລະ ຜູ້ຊອກວຽກມາຝາກປະຫວັດ 500 ຄົນຂຶ້ນເມືອ.

ພາບປະກອບຂ່າວເທົ່ານັ້ນ

ໃນວັນທີ 4 ມິຖຸນາ 2020 ທ່ານ ແກ້ວວີສຸກ ດາລາສານ ຜູ້ອໍານວຍການ ບໍລິສັດ 108-1009 ກຣຸບ ຈຳກັດຜູ້ດຽວ ຫລື ທີ່ຮູ້ຈັກກັນໃນນາມ 108Jobs ໄດ້ຖະແຫລງຂ່າວຜ່ານລະບົບອອນລາຍ (ຜ່ານ Zoom) ກ່ຽວກັບການຈັດງານມະຫະກໍາວຽກເຮັດງານທໍາ (Job Fest) ເຊິ່ງການຈັດງານດັ່ງກ່າວດັ່ງກ່າວ ແມ່ນມີເປົ້າໝາຍເພື່ອສົ່ງເສີມການຈ້າງງານ ໃຫ້ແກ່ຜູ້ທີ່ວ່າງງານຢູ່ແລ້ວ ແລະ ຜູ້ວ່າງງານ ທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19, ຜູ້ທີ່ຢາກປ່ຽນວຽກ, ພ້ອມນີ້ຍັງຈະມີການຈັດສຳມະນາ ເຜີຍແຜ່ໃຫ້ຄວາມຮູ້ ແລະ ເສີມສ້າງທັກສະ ແລະ ແງ່ຄິດໃນການພັດທະນາຕົນເອງແກ່ຜູ້ທີ່ເຂົ້າຮ່ວມງານ ລວມເຖິງພໍ່ແມ່ຜູ້ປົກຄອງທີ່ຊອກຮູ້ຫາຂໍ້ມູນເພື່ອວາງແຜນອະນາຄົດໃຫ້ລູກຫລານ ແລະ ນັກສຶກສາຈົບໃໝ່ໃນໄລຍະນີ້.

ພາບປະກອບຂ່າວເທົ່ານັ້ນ

ໃນງານຄັ້ງນີ້ ຈະໄດ້ພົບກັບກິດຈະກຳທີ່ຫລາກຫລາຍ ເປັນຕົ້ນແມ່ນ ຕະຫລາດນັດພົບແຮງງານໃນຮູບແບບອອນລາຍ ເຊິ່ງມີບໍລິສັດຕ່າງໆປະກາດວຽກຫລາກຫລາຍຕໍາແໜ່ງຈາກບໍລິສັດ ແລະ ອົງກອນຕ່າງໆ 50 ກວ່າແຫ່ງ ໂດຍ ຜ່ານ ເວັບໄຊຣ www.JobFest.la. ພ້ອມນີ້, ຍັງມີງານສຳມະນາ: ໂດຍ Live ຜ່ານ Facebook “Job Fest by 108”. ສຳລັບໃຜທີ່ສົນໃຈເຂົ້າຮ່ວມງານພຽງແຕ່ລົງທະບຽນທີ່ www.jobfest.la, ຕິດຕາມການເຄື່ອນ ໄຫວ ແລະ ຂໍ້ມູນລາຍລະອຽດຕ່າງໆຂອງງານໄດ້ທີ່ Facebook Page “JobFest By 108”.

ຂ່າວຈາກ: ຂປລ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ