ແຕ່ງຕັ້ງນາຍຕຳຫຼວດ 3 ສະຫາຍ ເປັນຫົວໜ້າຄະນະຄຸ້ມຄອງດ່ານສາກົນ 3 ແຫ່ງ - Laoedaily

ແຕ່ງຕັ້ງນາຍຕຳຫຼວດ 3 ສະຫາຍ ເປັນຫົວໜ້າຄະນະຄຸ້ມຄອງດ່ານສາກົນ 3 ແຫ່ງ

ໄລຍະນີ້ຫຼາຍເຂດແຂວງກຳລັງມີການປັບປ່ຽນ ໂຍກຍ້າຍເຈົ້າໜ້າທີ່ປະຈຳດ່ານດ່ານສາກົນ ເພື່ອຮອງຮັບໜ້າທີ່ການເມືອງ ແລະແຜນພັດທະນາເສດຖະກິດ-ສັງຄົມໃນໄລຍະໃໝ່, ຫຼ້າສຸດ ວັນທີ 5 ມິຖຸນາ 2020 ໄດ້ມີການປະກາດການຈັດຕັ້ງຫົວໜ້າຄະນະຄຸ້ມຄອງດ່ານສາກົນຂົວມິດຕະພາບ II, ດ່ານສາກົນແດນສະຫວັນ ແລະ ດ່ານສາກົນສະໜາມບິນແຂວງສະຫວັນນະເຂດ.

ພິທີປະກາດການຈັດຕັ້ງຄະນະຄຸ້ມຄອງດ່ານສາກົນຂົວມິດຕະພາບ II ສະຫວັນນະເຂດ – ມຸກດາຫານ,ດ່ານສາກົນແດນສະຫວັນ – ລາວບາວ ແລະ ດ່ານສາກົນສະໜາມບິນແຂວງສະຫວັນນະເຂດ ໄດ້ຈັດຂຶ້ນທີ່ຫ້ອງປະຊຸມຊັ້ນ 4 ຫ້ອງວ່າການປົກຄອງແຂວງສະຫວັນນະເຂດ ໂດຍການໃຫ້ກຽດເຂົ້າຮ່ວມຂອງທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ ແລະ ທ່ານ ຄຳມູນ ວິພົງໄຊ ຮອງລັດຖະມົນຕີກະຊວງພາຍໃນ.


ໃນພິທີ ທ່ານ ສຸດໃຈ ໄຊຍະວົງ ຮອງຫົວໜ້າຄະນະຈັດຕັ້ງແຂວງກໍ່ໄດ້ຜ່ານຂໍ້ຕົກລົງຂອງລັດຖະມົນຕີກະຊວງປ້ອງກັນຄວາມສະຫງົບວ່າດ້ວຍ: ການແຕ່ງຕັ້ງນາຍຕຳຫຼວດທີ່ຂຶ້ນກັບກອງບັນຊາການ ປກສ ແຂວງສະຫວັນນະເຂດ ເປັນຫົວໜ້າຄະນະຄຸ້ມຄອງດ່ານຊາຍແດນຄື: ແຕ່ງຕັ້ງ ທ່ານ ພັທ ສີວານ ສີດາວົງ ເປັນຫົວໜ້າຄະນະຄຸ້ມຄອງດ່ານສາກົນຂົວມິດຕະພາບ II ສະຫວັນນະເຂດ – ມຸກດາຫານ,ທ່ານ ພັທ ກອງມະນີ ຊົມມີໄຊ ເປັນຫົວໜ້າຄະນະຄຸ້ມຄອງດ່ານສາກົນແດນສະຫວັນ – ລາວບາວ ແລະ ທ່ານ ພັທ ພູມີ ຈຳປາແດນສະຫວັນ ເປັນຫົວໜ້າຄະນະຄຸ້ມຄອງດ່ານສາກົນສະໜາມບິນແຂວງສະຫວັນນະເຂດ.

ໂອກາດເຂົ້າຮ່ວມໃນພິທີປະກາດການຈັດຕັ້ງຫົວໜ້າຄະນະຄຸ້ມຄອງດ່ານຊາຍແດນໃນຄັ້ງນີ້ ທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ ກໍ່ໄດ້ໃຫ້ກຽດມີຄຳເຫັນໂອ້ລົມຕໍ່ກັບຜູ້ທີ່ໄດ້ຮັບການແຕ່ງຕັ້ງເປັນຫົວໜ້າຄະນະຄຸ້ມຄອງດ່ານຕ້ອງໄດ້ເອົາໃຈໃສ່ສືບຕໍ່ໃນການປັບປຸງບຸກຄະລາກອນ ພາຍໃນດ່ານເພື່ອໃຫ້ສອດຄ່ອງກັບການພັດທະນາໃນໄລຍະໃໝ່,ສືບຕໍ່ພົວພັນວຽກງານກັບຕ່າງປະເທດ,ເອົາໃຈໃສ່ອຳນວຍຄວາມສະດວກດ້ານການນຳເຂົ້າ – ສົ່ງອອກສິນຄ້າລະຫວ່າງປະເທດ,ບໍລິການດ້ວຍຄວາມຍິ້ມແຍ້ມແຈ່ມໃສ,ໃນເວລາປະຕິບັດໜ້າທີ່ວຽກງານຕ້ອງມີຈັນຍາບັນ,ຈັນຍາທຳ,ຕ້ອງປະຕິບັດຕາມລະບຽບກົດໝາຍຂອງ ສປປ ລາວວາງອອກຢ່າງເຂັ້ມງວດ.

ຂ່າວຈາກ: Media Laos

ໂດຍ: ອັກສອນສິນ ພົມມະຈັນ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ