ນັບວ່າເປັນຂ່າວດີໃຫ້ແກ່ປະຊາຊົນແຂວງໄຊສົມບູນ ທີ່ຈະໄດ້ນໍາໃຊ້ເສັ້ນທາງປູຢາງ ອັນສ້າງຄວາມສະດວກສະບາຍໃນການສັນຈອນໄປມາ ຫຼັງແຂວງດັ່ງກ່າວມີການເຊັນສັນຍາ 2 ໂຄງການກໍ່ສ້າງເສັ້ນທາງປູຢາງ 2 ຊັ້ນ ຄວາມຍາວ 83 ກວ່າກິໂລແມັດດ້ວຍມູນຄ່າການກໍ່ສ້າງ 473 ຕື້ກວ່າກີບ.
ໃນວັນທີ 21 ພຶດສະພາ 2020 ທີ່ແຂວງໄຊສົມບູນ ໄດ້ມີພິທີເຊັນສັນຍາ ລະຫວ່າງ ອົງການປົກຄອງ ແຂວງໄຊສົມບູນ ກັບ ບໍລິສັດຮັບເໝົາກໍ່ສ້າງ ແລະ ບໍລິສັດທີ່ປຶກສາ 2 ໂຄງການກໍ່ສ້າງເສັ້ນທາງປູຍາງ 2 ຊັ້ນ, ໂດຍການເຂົ້າຮ່ວມເປັນສັກຂິພິຍານມີ ທ່ານ ພົຕ ຄໍາລຽງ ອຸທະໄກສອນ ເຈົ້າແຂວງໄຊສົມບູນ, ມີຮອງເຈົ້າແຂວງ, ປະທານສະພາປະຊາຊົນແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ໄຊສົມພັນ ລີເຕັ້ງເບຼ່ຍຈື້ ຫົວຫນ້າພະແນກໂຍທາທິການ ແລະ ຂົນສົ່ງ ແຂວງໄຊສົມບູນ ໄດ້ລາຍງານກ່ຽວກັບຂໍ້ມູນພື້ນຖານຂອງ 2 ໂຄງການ ດັ່ງກ່າວວ່າ: ໂຄງການກໍ່ສ້າງຍົກລະດັບເສັ້ນທາງປູຢາງ 2 ຊັ້ນ ທາງຫຼວງແຫ່ງຊາດ ເລກ 5B ແຕ່ສາມແຍກຂົວນໍ້າຍອນ ຫາ ບ້ານນາໄຊສະຫ່ວາງ (ເຂດແດນແຂວງວຽງຈັນ) ເມືອງລ່ອງແຈ້ງ ແຂວງໄຊສົມບູນ ມີຄວາມຍາວ 66,18 ກິໂລແມັດ, ກວ້າງ 7 ແມັດ, ມີມູນຄ່າໃນການກໍ່ສ້າງ ທັງໝົດ 392,9 ລ້ານກວ່າກີບ, ກໍານົດໄລຍະເວລາການກໍ່ສ້າງ 36 ເດືອນ.
ໂດຍມີ 4 ບໍລິສັດຮັບເໝົາກໍ່ສ້າງ ແລະ 1 ບໍລິສັດທີ່ປຶກສາຄື: ຊ່ວງທີ1 ເລີ່ມແຕ່ ກິໂລແມັດ 0 ຫາກິໂລແມັດທີ 14+125 ແລະ ຊ່ວງທີ 2 ແຕ່ກິໂລແມັດທີ 14+125 ຫາ ກິໂລແມັດທີ 22+500 ແມ່ນບໍລິສັດ ສີສະເກດກໍ່ສ້າງຄົບວົງຈອນ ຈໍາກັດຜູ້ດຽວ, ຊ່ວງທີ 3 ແຕ່ກິໂລແມັດທີ 22+500 ຫາ ກິໂລແມັດທີ 39 ແມ່ນບໍລິສັດບຸຜາ ພັດທະນາກໍ່ສ້າງເຄຫາສະຖານ, ຂົວທາງ ແລະ ສໍາຫຼວດອອກແບບ ຈໍາກັດຜູ້ດຽວ, ຊ່ວງທີ 4 ແຕ່ກິໂລແມັດທີ 39 ຫາ ກິໂລແມັດທີ 53 ແມ່ນບໍລິສັດທະວີໄຊກໍ່ສ້າງ ຈໍາກັດຜູ້ດຽວ, ຊ່ວງທີ 5 ແຕ່ກິໂລແມັດທີ 53 ຫາກິໂລແມັດ 66+175 ແມ່ນບໍລິສັດເອທີໂອໂຕກໍ່ສ້າງຈໍາກັດ ຜູ້ດຽວ ແລະ ບໍລິສັດລາວເອອີຊີ ຄອນຊາວຕິງຈໍາກັດ ເປັນທີ່ປຶກສາ.
ສ່ວນໂຄງການກໍ່ສ້າງເສັ້ນປູຢາງ 2 ຊັ້ນ ແຕ່ບ້ານທົ່ງຄູນ ຫາ ບ້ານທົ່ງຮັກ ແລະ ສາມແຍກພູຄໍາ ເມືອງອະນຸວົງ, ແຂວງໄຊສົມບູນ ມີຄວາມຍາວ 17,565 ກິໂລແມັດ, ກວ້າງ 6 ແມັດ, ມີມູນຄ່າການກໍ່ສ້າງ ທັງໝົດ 80,3 ຕື້ກວ່າກີບ, ກໍານົດໄລຍະເວລາໃນການກໍ່ສ້າງ 24 ເດືອນ ໂດຍແມ່ນບໍລິສັດພີເອັດກໍ່ສ້າງ ແລະ ທ່ອງທ່ຽວ ຈໍາກັດ ເປັນຜູ້ຮັບເໝົາກໍ່ສ້າງ ແລະ ບໍລິສັດພີແສສ ຈໍາກັດຜູ້ດຽວ ເປັນທີ່ປຶກສາ.
ຂໍ້ມູນຂ່າວ: ພາພອນ ນະວົງໄຊ
