ລັດຖະບານເຢຍລະມັນ ແລະ ລຸຟຮັນຊາ ກຳລັງຫາລືຂັ້ນທ້າຍ ກ່ຽວກັບແຜນຊ່ວຍເຫຼືອທຸລະກິດຂອງສາຍການບິນແຫ່ງຊາດ ທີ່ຕ້ອງໃຊ້ງົບປະມານຟື້ນຟູ ກວ່າ 80 ພັນຕື້ກີບ.
ສຳນັກຂ່າວຕ່າງປະເທດລາຍງານຈາກນະຄອນຫຼວງເບີລິນ ປະເທດເຢຍລະມັນ ເມື່ອວັນພະຫັດ ທີ 21 ພຶດສະພາ ວ່າ ລຸຟຮັນຊາ ຖະແຫຼງການ ເມື່ອວັນພຸດ ວ່າ ກຳລັງຢູ່ລະຫວ່າງ “ການຫາລືຂັ້ນສຸດທ້າຍ” ກັບລັດຖະບານເຢຍລະມັນ ກ່ຽວກັບມາດຕະການ “ສ້າງສະຖຽນລະພາບ” ເຊິ່ງຕ້ອງໃຊ້ງົບປະມານ 9 ຕື້ເອີໂຣ (ປະມານ 88,6 ພັນຕື້ກີບ) ຈາກຈຳນວນດັ່ງກ່າວ ຢ່າງໜ້ອຍ 3 ຕື້ເອີໂຣ (ປະມານ 29,5 ພັນຕື້ກີບ) ຈະຂໍຄວາມຊ່ວຍເຫຼືອໃນຮູບແບບເງິນກູ້ຈາກທະນາຄານເພື່ອການຟື້ນຟູ (KFW) ເຊິ່ງເປັນສະຖາບັນການເງິນທີ່ເປັນລັດວິສາຫະກິດ.
ຂະນະທີ່ໜັງສືພິມທຸລະກິດ ” Handelsblatt ” ລາຍງານຕື່ມວ່າ ໂຄງການຊ່ວຍເຫຼືອສາຍການບິນແຫ່ງຊາດ “ລຸຟຮັນຊາ” ແບ່ງອອກເປັນ 3 ຂັ້ນ ໂດຍນອກຈາກເງິນຊ່ວຍເຫຼືອແລ້ວ ລັດຖະບານເຢຍລະມັນຈະເປັນຜູ້ຖືຮຸ້ນຂອງສາຍການບິນສັດສ່ວນ 25% ແລະ ລັດຖະບານມີໂຄຕາ ຢ່າງໜ້ອຍ 2 ບ່ອນນັ່ງໃນຄະນະບໍລິຫານ “ແຕ່ຈະບໍ່ແມ່ນບຸກຄົນທີ່ມາຈາກລັດຖະບານ ແລະ ນັກການເມືອງ” ໂດຍເມື່ອໃດກໍ່ຕາມທີ່ຄະນະລັດຖະມົນຕີຂອງນາຍົກລັດຖະມົນຕີທ່ານນາງອັງເກລາ ແມເຄິລ ອະນຸມັດແຜນການດັ່ງກ່າວ ສາຍການບິນລຸຟຮັນຊາຕ້ອງຮັບຮອງແຜນການດຽວກັນພາຍໃນ 48 ຊົ່ວໂມງ.
