ເມືອງເຊບັ້ງໄຟ ເປີດການຮຽນ – ການສອນຄືນໃໝ່

24

ໃນວັນທີ 18 ພຶດສະພາ 2020 ນີ້ ໂຮງຮຽນ ມສ ບ້ານສັງ, ໂຮງຮຽນປະຖົມສົມບູນ ບ້ານສົ້ມ ໂດຍສະເພາະຊັ້ນປະຖົມສຶກສາ ປີທີ 5, ມັດທະຍົມຕອນຕົ້ນ ປີທີ 4 ແລະ ມັດທະຍົມຕອນປາຍ ປີທີ 7 ໄດ້ເລີ່ມເປີດການຮຽນ – ການສອນຄືນໃໝ່.

ໃນການເປີດການຮຽນ – ການສອນຄືນໃໝ່ນີ້ທາງການນຳຂັ້ນເມືອງ ນຳໂດຍ ທ່ານ ທອງໄຊ ມັງໜໍ່ເມກ ເຈົ້າເມືອງເຊບັ້ງໄຟ  ແຂວງຄຳມ່ວນ, ທ່ານ ລົດວິໄລ ຈັນທະນຸວົງ ຫົວໜ້າຫ້ອງການສຶກສາ ແລະ ກີລາເມືອງ ກໍໄດ້ສະແດງຄວາມເປັນຫ່ວງເປັນໄຍຕໍ່ກັບບັນດານ້ອງນ້ອຍນັກຮຽນ ໂດຍສະເພາະການວາງມາດຕະການຄວບຄຸມ ແລະ ສະກັດກັ້ນຕໍ່ພະຍາດໂຄວິດ – 19 ດ້ວຍການຮັກສາໄລຍະຫ່າງ, ການລ້າງມືໃສ່ສະບູ ຫຼື ເຈວລ້າງມືປະສົມດ້ວຍເຫຼົ້າຂ້າເຊື້ອ, ການກວດອຸນຫະພູມຮ່າງກາຍ ແລະ ສິ່ງສຳຄັນແມ່ນໄດ້ໃສ່ຜ້າອັດປາກ, ອັດດັງທຸກຄັ້ງກ່ອນເຂົ້າຫ້ອງຮຽນ ເຊິ່ງເປັນມາດຕະການໜຶ່ງໃນການປ້ອງກັນພະຍາດດັ່ງກ່າວ.

ຈາກນັ້ນ, ທາງການນຳຂັ້ນເມືອງກໍໄດ້ກວດກາເບິ່ງຄວາມເປັນລະບຽບຮຽບຮ້ອຍ, ການຈັດໂຕະ – ຕັ່ງ, ການຮັກສາໄລຍະຫ່າງ. ນອກນີ້ແລ້ວຍັງໄດ້ມອບປົດສະເຕີ ໂຄສະນາວິທີປ້ອງກັນພະຍາດ ຈໍານວນ 2 ຊຸດ 16 ແຜ່ນ; ຜ້າອັດປາກ – ອັດດັງ, ເຈວລ້າງມືໃຫ້ໂຮງຮຽນ ມສ ບ້ານສັງ ແລະ ໂຮງຮຽນປະຖົມບ້ານສົ້ມ. ຫຼັງຈາກນັ້ນ, ຍັງໄດ້ມອບຂອງຂວັນ, ລາງວັນຈໍານວນໜຶ່ງໃຫ້ນ້ອງນ້ອຍນັກຮຽນເກັ່ງ ປະຖົມປີທີ 5 ໂຮງຮຽນປະຖົມ ບ້ານສົ້ມ ໃຫ້ກຽດມອບຂອງ ທ່ານ ທອງໄຊ ມັງໜໍ່ເມກ ເຈົ້າເມືອງເຊບັ້ງໄຟ.

Slide
Slide
Slide

ຂ່າວ: ແກ້ວສອນໄຊ