ພູຫຍ້າຄາ ຈຸດຊົມວີວທີ່ງົດງາມ ພວມສຳຫລວດແຫລ່ງທ່ຽວໃໝ່ຂອງອຸດົມໄຊ

28

ແຂວງອຸດົມໄຊ ເປັນແຂວງໜຶ່ງທີ່ມີສິ່ງທີ່ໜ້າສົນໃຈຫຼາຍໆຢ່າງ ວັດທະນະທຳ, ຮີດຄອງປະເພນີ, ແຫຼ່ງທ່ອງທ່ຽວຕ່າງໆ ເຊື່ອແນ່ວ່າຫຼາຍທ່ານຍັງບໍ່ທັນໄດ້ໄປສຳຜັດ ຫຼ້າສຸດ ທິມງານວິຊາການຂອງພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງອຸດົມໄຊ ໄດ້ລົງສຳຫລວດແຫລ່ງທ່ອງທ່ຽວບ້ານຫລັກ 32 ກຸ່ມຫົວນ້ຳງາ ເມືອງໄຊ ແຂວງ ອຸດົມໄຊ
ນັບວ່າເປັນຄວາມຫວັງ ຫຼື ບ່ອນທ່ຽວໃໝ່ທີ່ຫາກນັກລົງທຶນທີ່ກຳລັງເບິ່ງຫາເຖິງການທ່ອງທ່ຽວໃນລາວທີ່ສາມາດພັດທະນາໄດ້ ເພາະໃນການສຳລວດຄັ້ງນີ້ມີ ຈຸດຊົມວີວ ພູຫຍ້າຄາ (ພູຫຍ້າຄາ ຄ້າຍບ່ອນຍົນລົງຂອງຝຣັ່ງຕອນສະໄໝສົງຄາມ) ປ່າຫີນ, ຈຸດຊົມວີວ, ຂົວຫີນ, ແລະ ຜາຫີນຄ້າຍຄື ພະ ຍາງູໃຫຍ່ ລາຍລະອຽດມີດັ່ງນີ້:

1 ຈຸດຊົມວີວ: ເລີ່ມຕົ້ນຈາກ ຫ້ອງການບ້ານຫລັກ 32 ກຸ່ມຫົວນ້ຳງາໄປທາງທິດຕາເວັນຕົກ ປະມານ 7 ກິໂລແມັດ ຜ່ານ ສວນ, ນາ ຂອງປະຊາຊົນ ເປັນເສັ້ນທາງທະລຸ ເຊິ່ງສາມາດນຳໃຊ້ລົດຊິ້ງ, ລົດໄຖນາ ໄປໄດ້ແຕ່ຂ້ອນຂ້າງລໍາບາກໜ້ອຍໜຶ່ງ ໃນການຍ່າງສຳຫລວດໃນຄັ້ງນີ້ ໃຊ້ເວລາປະມານ 4 ຊົ່ວໂມງ 30 ນາທີ ຈຶ່ງຮອດຈຸດຊົມວີວ ລະຫວ່າງເສັ້ນທາງຍ່າງຈາກຈຸດສິ້ນສຸດຂອງເສັ້ນທາງລົດ ແມ່ນໄດ້ຍ່າງໄປຕາມເສັ້ນທາງຫາກິນຂອງປະຊາຊົນ ແລະ ທັງເປັນເຂດປ່າສະຫງວນທີ່ອຸດົມສົມບູນໄປດ້ວຍຊັບພະຍາກອນທຳມະຊາດ, ພຶກສາຊາດ, ຊີວະນາໆພັນ ມີຫ້ວຍນ້ຳ, ປ່າໄມ້, ຫີນຜາ ຕົ້ນໄມ້ໃຫຍ່ຫລາກຫລາຍຊະນິດ ຂຽວສົດງົດງາມອາກາດສົດຊື່ນເຢັນດີ ບວກກັບສຽງ ຮ້ອງຂອງສັດປ່າ ນົກຫລາຍຊະນິດຮ້ອງສົ່ງສຽງດັງກ້ອງໄປໄກ ເປັນຕາອອນຊອນ, ກ່ອນຊິຮອດຈຸດຊົມວີວແມ່ນໄດ້ຍ່າງຂຶ້ນພູ ຜາຫີນ ມີຄວາມສູງຊັນເປັນບາງຈຸດ ແຕ່ກໍ່ສາມາດຜ່ານໄປໄດ້, ຈຸດຊົມວີວແຫ່ງນີ້ເປັນພູສູງ ແລະ ມີໂງ່ນຫີນ ສະລັບລຽງກັນ ມີປ່າຫຍ້າຂຽວງາມບໍ່ມີຕົ້ນໄມ້ໃຫຍ່ ສາມາດເບິ່ງເຫັນບ້ານເຂດຫລັກ 32 ໄດ້ ບ່ອນຈອມພູ ເປັນທົ່ງພຽງກວ້າງຫຍ້າຂຽວງາມ ໃນເມື່ອກ່ອນເປັນບ່ອນຍົນລົງຂອງທະຫານປາງສົງຄາມ ຄວາມສູງຈາກລະດັບນ້ຳທະເລ 1,600 ເເມັດ.

Slide
Slide
Slide

2 ເຂດປ່າຫີນທີ່ເປັນເກັດ ແລະ ຈຸດຊົມວີວບ່ອນທີ 2 ເລີ່ມຍ່າງຈຸດຊົມວີວໄປຫາປ່າຫີນເກັດເຊິ່ງຫ່າງຈາກຈຸດຊົມວີວປະມານ 1 ກິໂລແມັດປາຍ ໃຊ້ເວລາໃນການຍ່າງ ປະມານ 1 ຊົ່ວໂມງ ເຂດປ່າຫີນເກັດເປັນເນີນພູມີທົ່ງຫຍ້າຂຽວງາມ ແລະ ກວ້າງຂວາງປະມານ 300-400 ແມັດ ມີກ້ອນຫີນໃຫຍ່ນ້ອຍ ຢູ່ເປັນແຕ່ລະຈຸດ ມີຮູບລັກສະນະເປັນເກັດ ບາງກ້ອນມີຂະໜາດໃຫຍ່ ປະມານ 10 ແມັດ ຫີນຜາບາງໜ່ວຍມີລັກສະນະເປັນຮູບຄ້າຍຄືເຕົ່າ ແລະ ຫລາກຫລາຍຊະນິດ ມີຄວາມສວຍງາມເປັນເອກະລັກອີກຢ່າງໜຶ່ງ ນອກຈາກນັ້ນແລ້ວຫ່າງໄປອີກ 700 ແມັດ ຍັງມີຈຸດຊົມວີວທີ່ສວຍງາມເປັນເນີນພູ ແລະມີຫີນຜາລຽງສະລັບກັນຈຸດສູງສຸດມີເດີນທີ່ຮາບພຽງ ກວ້າງປະມານ 30-50 ແມັດ ເປັນບ່ອນ ເປັນເດີນຍົນປາງສະໄໝສົງຄາມ ຄວາມສູງຈາກລະດັບໜ້ານ້ຳທະເລ ປະມານ 1,800 ແມັດ ເປັນປ່າຫຍ້າຂຽວງາມ ສາມາດເບິ່ງເຫັນ ເຂດບ້ານຫລັກ 32 ໄດ້, ພູພຽງຊົມວີວ ແລະ ເໝາະສົມແກ່ການຕັ້ງແຄ້ມນອນຊົມເດືອນດາວໃນຍາມຄໍ່າຄືນ.

3 ຂົວຫີນ: ຫ່າງຈາກຈຸດຊົມວີວທີ 2 ລົງພູ-ຂຶ້ນພູ ຜ່ານຫ້ວຍ, ປ່າດົງດິບໄປປະມານ 2,5 ກິໂລແມັດ ເປັນເສັ້ນທາງ ລໍາບາກ, ຕຶບຫຼາຍ ໃຊ້ເວລາໃນການຍ່າງປະມານ 2 ຊົ່ວໂມງ ຈຶ່ງຮອດຂົວຫີນ ເປັນກ້ອນຫີນຍາວລັກສະ ນະຄ້າຍຄືຂົວ ຄວາມກວ້າງປະມານ 1 ແມັດ, ຍາວປະມານ 8 ແມັດ ຄວາມໜາປະມານ 30-40 ຊັງຕີແມັດ ເປັນຫີນແຜ່ນດຽວ ທີ່ທໍາມະຊາດສ້າງຂຶ້ນເອງ ດ້ານລຸ່ມມີນ້ຳຫົ້ງຄ້າງບາງຈຸດຂອງຫ້ວຍເລັກນ້ອຍ ໃນລະດູຝົນອາດຈະມີນ້ຳຫລາຍ ສາມາດຍ່າງຜ່ານໄປໄດ້ ບໍລິເວນແຫ່ງນີ້ເປັນປ່າຕຶບໜາ, ບໍ່ມີຕົ້ນໄມ້ໃຫຍ່ຫຼາຍ ມີຫ້ວຍຮ່ອງ ມີຄວາມຫຍຸ້ງຍາກໃນການໄປມາ.

4 ຫີນພະຍາງູໃຫຍ່: ຕັ້ງຢູ່ຫ່າງຈາກຈຸດຂົວຫີນໄປໄກ ປະມານ 2 ກິໂລແມັດປາຍ, ໃຊ້ເວລາຍ່າງ ປະມານ 2 ຊົ່ວ ໂມງ ແລະ ຫ່າງຈາກທີ່ພັກແຮມຄ້າງຄືນລົງພູໄປຫາບ້ານຫຼັກ 32 ປະມານ 200 ແມັດ ກໍ່ຈະພົບເຫັນກ້ອນຫີນຂະໜາດໃຫຍ່ ຍາວປະມານ 8-9 ແມັດ, ກວ້າງ ປະມານ 1 ແມັດ ຢອງເທິງຫີນຜາກ້ອນໃຫຍ່ ມົນມີຂະໜາດປະມານ 4-8 ແມັດ ຮູບຮ່າງທາງຫົວຄ້າຍຄືກັບງູໃຫຍ່ ທາງຫາງຂ້ອນຂ້າງໃຫຍ່ກວ່າທາງຫົວ ລວງຮອບປະມານ 1,20 ແມັດ ທາງພື້ນອ້ອມຫີນຜາມີຫຍ້າປົກຄຸມ ມີຄວາມສວຍງາມ ແລະ ໂດດເດັ່ນ ບໍລິເວນດັ່ງກ່າວອ້ອມລ້ອມໄປດ້ວຍຕົ້ນໄມ້ໃຫຍ່ນ້ອຍຂຽວງາມ ຫີນຜາແຫ່ງນີ້ໃນເມື່ອກ່ອນປະຊາຊົນໄປລ່າເນື້ອໄດ້ພົບເຫັນ ແລະ ເອີ້ນຊື່ວ່າຫີນຍົນ ເບິ່ງອີກມູມໜຶ່ງເປັນຮູບຄ້າຍຄື ຍົນນ້ອຍ ເບິ່ງທາງຫົວຄ້າຍຄືກັບຫົວງູໃຫຍ່.

5 ພູພຽງຊົມວີວ: ຫ່າງຈາກຫີນພະຍາງູໃຫຍ່ລົງໄປ ປະມານ 650 ແມັດ ມີພູພຽງຄວາມກວ້າງ ປະມານ 500 ແມັດ ເປັນທົ່ງຫຍ້າທີ່ຂຽວງາມ ສາມາດເບິ່ງເຫັນຈຸດຊົມວີວທີ 2 ແລະ ປ່າຫີນເກັດໄດ້, ທາງດ້ານລຸ່ມສາມາດເບິ່ງເຫັນບ້ານຢ້າວໃຫຍ່ ແລະ ຫລັກ 32 ທາງດ້ານໜ້າຍັງມີພູຜາທີ່ສູງ ປະມານ 800 ແມັດ ເຂດນີ້ເໝາະສຳລັບການຕັ້ງແຄມຊົມທີວທັດທຳມະຊາດ ແລະ ເບິ່ງຕາເວັນຂຶ້ນ ທາງເສັ້ນນີ້ ສາມາດປັບປຸງ ເປັນບາງຈຸດເພື່ອນຳໃຊ້ລົດຊິ້ງ, ລົດໄຖນາ ໄປໄດ້ ໄລຍະທາງຈາກຈຸດດັ່ງກ່າວມາຮອດທາງລົດ ປະມານ 4 ກິໂລແມັດ.

ເຊິ່ງຈຸດຕ່າງໆທີ່ທາງທີມງານພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງອຸດົມໄຊ ລົງສຳລວດນັ້ນເໝາະແກ່ການສ້າງຈຸດຊົມວີວ ຊົມທຳມະຊາດ ທີ່ມີຄວາມຫຼາກຫຼາຍ ແລະ ໂດດເດັ່ນ ທີ່ທໍາມະຊາດສ້າງຂຶ້ນເອງ ທີ່ຫາຊົມໄດ້ຍາກ. ສາມາດສ້າງເປັນລາຍການຍ່າງປ່າຊົມທຳມະຊາດ 1 ຫຼື 2 ວັນ, ຈາກຈຸດ ຫີນພະຍາງູໃຫຍ່ ລົງຫາເສັ້ນທາງສາມາດບຸກເບີກເສັ້ງທາງທະລຸ ໃຊ້ລົດຊີ້ງ ແລະ ລົດໄຖນາ ສາມາດໄປເຖິງໄດ້ ເພື່ອຫຼຸດຜ່ອນໃນການຍ່າງທີ່ເສັ້ນທາງຍາວໄກ.

ໂດຍປັດຈຸບັນກຳລັງຄົ້ນຄວ້າ, ເກັບກຳປະຫວັດຄວາມເປັນຂອງແຕ່ລະຈຸດ ແລະ ການຕັ້ງຊື່ຕ່າງໆ ຂອງພູຫຍ້າຄາ (ຈຸດຊົມວີວ), ຂົວຫີນ, ຫີນພະຍາງູໃຫຍ່ ຈຸດອື່ນໆ.

ຈາກ: ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງອຸດົມໄຊ