4 ພາກສ່ວນມອບເຄື່ອງຕ້ານພະຍາດໂຄວິດ-19 ໃຫ້ກະຊວງ ອຄ ລວມມູນຄ່າ 80 ລ້ານກີບ - Laoedaily

4 ພາກສ່ວນມອບເຄື່ອງຕ້ານພະຍາດໂຄວິດ-19 ໃຫ້ກະຊວງ ອຄ ລວມມູນຄ່າ 80 ລ້ານກີບ

ໃນຕອນບ່າຍວັນທີ 19 ພຶດສະພາ 2020 ທີ່ກະຊວງອຸດສາຫະກຳ ແລະ ການຄ້າ (ອຄ)​ ໄດ້ມີພິທີມອບເຄື່ອງໃຊ້ຫ້ອງການ ແລະ ເຄື່ອງຕ້ານພະຍາດໂຄວິດ-19 ຈາກ 4 ບໍລິສັດຄື: ບໍລິສັດ ບຸນສົງ ການຄ້າ ຂາອອກ-ຂາເຂົ້າ ຈຳກັດຜູ້ດຽວ, ບໍລິສັດ ຈີຟີ້ງ ບໍລິການເຊົ່າກົງຈັກ ຈຳກັດຜູ້ດຽວ,​ ບໍລິສັດ ພົງພີພັດ ຂາເຂົ້າ-ຂາອອກ ຈຳກັດ ແລະ ບໍລິສັດ ຫຼຽວຊ່ຽງເກີ້ ລົງທຶນພັດທະນາ ຈຳກັດຜູ້ດຽວໃຫ້ແກ່ກະຊວງ ອຄ ເພື່ອນໍາໃຊ້ເຂົ້າໃນວຽກງານຕ້ານພະຍາດໂຄວິດ-19 ມູນຄ່າ 80 ລ້ານກີບ ຮັບໂດຍ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງ ອຄ.

ທ່ານ ບຸນສົງ ສະຫວັນວາລີ ປະທານບໍລິສັດ ບຸນສົງ ການຄ້າ ຂາອອກ-ຂາເຂົ້າ ຈຳກັດຜູ້ດຽວ ຕາງໜ້າທັງ 4 ບໍລິສັດກ່າວວ່າ: ເຄື່ອງທີ່ມາມອບໃນຄັ້ງນີ້ ປະກອບມີ: ຄອມພິວເຕີ ໂນດບຸດ 1 ເຄື່ອງ ມູນຄ່າ 7.500.000 ກີບ,​ ຄອມພີວເຕີ ຕັ້ງໂຕະ 4 ເຄື່ອງ ມູນຄ່າ 20.000.000 ກີບ,​ ປິ່ນເຕີ 4 ເຄື່ອງ ມູນຄ່າ 8.000. 000 ກີບ,​ ຜ້າອັດປາກ 12.​500 ອັນ ມູນຄ່າ 32.​500.​000 ກີບ ແລະ ເຈວລ້າງມື 240 ກ່ອງ ມູນຄ່າ 12.000.000 ກີບ.

ໂອກາດດຽວກັນ,​ ທ່ານ ນາງ ເຂັມມະນີ ພົນເສນາ ກໍ່ໄດ້ກ່າວຂອບໃຈມາຍັງທັງ 4 ບໍລິສັດ ທີ່ເຫັນໄດ້ເຖິງຄວາມຈຳເປັນ ແລະ ຂາດເຂີນເຄື່ອງມືໃນການຕ້ານພະຍາດໂຄວິດ-19 ຂອງກະຊວງ ອຄ ພວກເຮົາ ແລະ ອວຍພອນໃຫ້ປະທານບໍລິສັດ ແລະ ກິດຈະການທັງ 4 ບໍລິສັດ ຈະເລີນຮຸ່ງເຮືອງ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ