ປະຊາຊົນບ້ານຫາດຄຳຮຽງ ຮ່ວມແຮງຮ່ວມໃຈກັນເຮັດທາງເບຕົງເຂົ້າວັດ - Laoedaily

ປະຊາຊົນບ້ານຫາດຄຳຮຽງ ຮ່ວມແຮງຮ່ວມໃຈກັນເຮັດທາງເບຕົງເຂົ້າວັດ

ວັນທີ 15 ພຶດສະພາ 2020 ຜ່ານມາ ຊາວບ້ານຫາດຄຳຮຽງ ເມືອງເຊບັ້ງໄຟ ແຂວງ  ຄໍາມ່ວນ ໄດ້ພ້ອມໃຈກັນກໍ່ສ້າງທາງເບຕົງ ນຳໂດຍ ທ່ານ ວິໄລ ພົມມະຈັກ ຄະນະປະຈຳພັກເມືອງ, ປະທານກວດກາເມືອງ; ທ່ານ ກອນແກ້ວ ລາໄພວັນ ນາຍບ້ານຫາດຄຳຮຽງ ພ້ອມດ້ວຍອຳນາດການປົກຄອງ ແລະ ພໍ່ – ແມ່ປະຊາຊົນພາຍໃນບ້ານ ຈຳນວນ 211 ຄົນ.

ບ້ານຫາດຄຳຮຽງ ແມ່ນບ້ານໜຶ່ງທີ່ຂຶ້ນກັບເມືອງເຊບັ້ງໄຟ, ປະຊາຊົນໄດ້ຢຶດຖືອາຊີບປູກຝັງ ແລະ ລ້ຽງສັດເປັນສຳຮອງ, ປະຊາຊົນມີມູນເຊື້ອດຸໝັ່ນໃນການສ້າງສາ, ທຳມາຫາກິນ ແລະ ເພື່ອເປັນການສືບຕໍ່ໃນການສ້າງສາພັດທະນາບ້ານ ໂດຍສະເພາະແມ່ການປັບປຸງພື້ນຖານໂຄງລ່າງການກໍ່ສ້າງເສັ້ນທາງເຂົ້າວັດ ເຊິ່ງເລີ່ມລົງມືແຕ່ວັນທີ 12 – 20 ພຶດສະພາ 2020, ການກໍ່ສ້າງໃນຄັ້ງນີ້ແມ່ນມີຄວາມຍາວ 60 ແມັດ, ກວ້າງ 4 ແມັດ, ຄວາມໜາ 15 ຊັງຕີແມັດ, ເປັນທາງເບຕົງ, ທຶນກໍ່ສ້າງໃນຄັ້ງນີ້ແມ່ນໄດ້ມາຈາກການລະດົມນຳພໍ່ – ແມ່ປະຊາຊົນຊາວບ້ານຫາດຄຳຮຽງ ແລະ ເມືອງເຊບັ້ງໄຟ ປະກອບສ່ວນຊ່ວຍເຫຼືອງົບປະມານໃນການກໍ່ສ້າງທາງຄັ້ງນີ້ແມ່ນ 11 ລ້ານກວ່າກີບ.

ການສ້າງທາງນີ້ແມ່ນເພື່ອເຮັດໃຫ້ການໄປ – ມາຫາສູ່ກັນຂອງພໍ່ແມ່ປະຊາຊົນພາຍໃນບ້ານມີຄວາມສະດວກສະບາຍ. ສຳລັບແຜນການໃນຕໍ່ໜ້າແມ່ນຖ້າມີງົບປະມານ ຫຼື ທ່າແຮງຈາກພັກ – ລັດ ຫຼື ເອກະຊົນຈະສືບຕໍ່ເຮັດໃຫ້ສຳເລັດທົ່ວບ້ານ.

ຂ່າວ: ແກ້ວສອນໄຊ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ