ສະຫວັນນະເຂດ ປະກາດສ້າງຕັ້ງກຸ່ມໂຮງຂ້າສັດ ແລະ ຂາຍຊີ້ນ - Laoedaily

ສະຫວັນນະເຂດ ປະກາດສ້າງຕັ້ງກຸ່ມໂຮງຂ້າສັດ ແລະ ຂາຍຊີ້ນ

ອາທິດຜ່ານມາ ພະແນກອຸດສາຫະກຳ – ການຄ້າ ແຂວງ ໄດ້ຈັດພິທີປະກາດການຕັ້ງກຸ່ມໂຮງຂ້າສັດ ແລະ ຂາຍຊີ້ນ ຂຶ້ນຢ່າງເປັນທາງການ ໂດຍການເຂົ້າຮ່ວມເປັນສັກຂີພິຍານຂອງ ທ່ານ ໂພສີສ້ອຍ ກຸທິລາດ ຮັກສາການຫົວໜ້າພະແນກອຸດສາຫະກຳ – ການຄ້າແຂວງ, ທ່ານ ລັດຕະນະບັນເລິງ ໄກສອນ ຮອງຫົວໜ້າພະແນກພາຍໃນແຂວງ, ມີບັນດາຂະແໜງການອ້ອມຂ້າງພະແນກ, ພ້ອມດ້ວຍຜູ້ປະກອບການ, ລູກຂຽງຈາກຕະຫຼາດຕ່າງໆ ພາຍໃນເທສະບານແຂວງເຂົ້າຮ່ວມ.

ໃນພິທີ ທ່ານ ສີທັດຖະ ພອນສະຫວັນ ຮັກສາການຫົວໜ້າຂະແໜງການຄ້າພາຍໃນ ໄດ້ຂຶ້ນຜ່ານຂໍ້ຕົກລົງຂອງທ່ານເຈົ້າແຂວງສະຫວັນນະເຂດ ສະບັບເລກທີ 836/ຈຂ.ສຂ ລົງວັນທີ 1 ເດືອນພຶດສະພາ 2020 ວ່າດ້ວຍການສ້າງຕັ້ງກຸ່ມໂຮງຂ້າສັດ ແລະ ຂາຍຊີ້ນຢູ່ແຂວງສະຫວັນນະເຂດ. ໃນນັ້ນ, ໄດ້ຕົກລົງແຕ່ງຕັ້ງ ທ່ານ ນາງ ລັດດາວັນ ຄິວສິດທິເດດ ຜູ້ອຳນວຍການໂຮງຂ້າສັດດອນເຊັງ ເປັນປະທານ, ທ່ານ ນາງ ເພັດສະໝອນ ສີຫາລາດ ອຳນວຍການໂຮງຂ້າສັດທ່າຊະໂນ ເປັນຮອງປະທານ. ຈາກນັ້ນ, ກໍປະກອບມີກຳມະການອີກ 3 ທ່ານ, ພ້ອມດ້ວຍທີ່ປຶກສາ 1 ທ່ານ ເພື່ອພ້ອມກັນຊີ້ນຳ – ນຳພາໃນການບໍລິຫານຈັດຕັ້ງກຸ່ມ, ເພື່ອໃຫ້ສອດຄ່ອງໃນການຮັບຊື້, ແປຮູບ ແລະ ຂາຍຍ່ອຍ. ທັງນີ້, ກໍເພື່ອ ຄວາມເປັນເອກະພາບ, ຄວາມເປັນທຳ.

ໃນພິທີຄັ້ງນີ້ຍັງໄດ້ມີການເຊັນສັນຍາຊື້ – ຂາຍໝູລະຫວ່າງ ທ່ານ ຄຳຟອງ ວໍລະບຸດ ຜູ້ອຳນວຍການ ບໍລິສັດ ມີໄຊຟາມ ແລະ ທ່ານ ນາງ ລັດດາວັນ ຄິວສິດທິເດດ ປະທານກຸ່ມໂຮງຂ້າສັດ – ຊື້ຂາຍຊີ້ນ ເຊິ່ງທາງ ບໍລິສັດ ມີໄຊຟາມ ຈະຕອບສະໜອງໝູໃຫ້ພຽງພໍກັບຄວາມຕ້ອງການຕົວຈິງໃນແຕ່ລະວັນ ໂດຍນ້ຳໜັກໝູທີ່ຂາຍຢູ່ໜ້າຟາມສະເລ່ຍຢູ່ໃນລະຫວ່າງ 95 – 110 ກິໂລກຣາມຕໍ່ໂຕ, ສ່ວນລາຄາອີງຕາມການຄິດໄລ່ໂຄງສ້າງລາຄາຕົ້ນທຶນການຜະລິດ, ສ່ວນຝ່າຍຊື້ຕ້ອງໄດ້ຊື້ຕາມຈຳນວນ, ລາຄາທີ່ໄດ້ຕົກລົງກັນໃນລາຄາໜ້າຟາມ, ສິ່ງສຳຄັນຕ້ອງຄຳນຶງເຖິງຕ່າງຝ່າຍຕ່າງມີຜົນປະໂຫຍດ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ