ຫາກການລະບາດພະຍາດໂຄວິດ - 19 ແກ່ຍາວ ລາວອາດມີອັດຕາການວ່າງງານ 25% - Laoedaily

ຫາກການລະບາດພະຍາດໂຄວິດ – 19 ແກ່ຍາວ ລາວອາດມີອັດຕາການວ່າງງານ 25%

ອາທິດຜ່ານມາ ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ເຂົ້າຮ່ວມກອງປະຊຸມທາງໄກສະໄໝພິເສດຂອງລັດຖະມົນຕີແຮງງານອາຊຽນ ກ່ຽວກັບການຮັບມືຈາກຜົນກະທົບຂອງພະຍາດໂຄວິດ – 19 ຕໍ່ແຮງງານ ແລະ ການຈ້າງງານໃນບັນດາປະເທດອາຊຽນ ໂດຍການເປັນປະທານຂອງ ທ່ານ ດາຕຸກ ເສຣີ ສາຣາວານາ ມູຣູກັນ ( Datuk Seri Saravanan  A/L Murugan ) ລັດຖະມົນຕີກະຊວງຊັບພະຍາກອນມະນຸດປະເທດມາເລເຊຍ ພ້ອມດ້ວຍບັນດາລັດຖະມົນຕີແຮງງານອາຊຽນເຂົ້າຮ່ວມ.

ທ່ານ ຄຳແພງ ໄຊສົມແພງ ໄດ້ກ່າວວ່າ: ໄລຍະຜ່ານມາລັດຖະບານລາວ ໄດ້ເອົາໃຈໃສ່ໃນການສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດໂຄວິດ – 19 ແລະ ໄດ້ພົບຜູ້ຕິດເຊື້ອທຳອິດ ໃນວັນທີ 23 ມີນາ 2020 ມາຮອດປັດຈຸບັນ ລາວມີຜູ້ຕິດເຊື້ອສະສົມທັງໝົດ 19 ກໍລະນີ ປິ່ນປົວດີແລ້ວ 10 ກໍລະນີ ແລະ ບໍ່ມີຜູ້ເສຍຊີວິດ. ເຖິງແມ່ນວ່າຈຳນວນຜູ້ຕິດເຊື້ອພະຍາດຢູ່ລາວບໍ່ມີຫຼາຍ ແຕ່ຜົນກະທົບທີ່ມີຕໍ່ເສດຖະກິດ – ສັງຄົມ ເປັນຕົ້ນການປິດຫົວໜ່ວຍແຮງງານ ແລະ ຫົວໜ່ວຍທຸລະກິດ ເຮັດໃຫ້ແຮງງານຈຳນວນຫຼາຍຕ້ອງໄດ້ພັກວຽກ ລວມເຖິງຍົກເລີກສັນຍາແຮງງານ.

ພ້ອມກັນນັ້ນ, ແຮງງານລາວຈໍານວນ 1 ແສນກວ່າຄົນ ໄດ້ເດີນທາງກັບຈາກຕ່າງປະເທດ ເຮັດໃຫ້ມີຜົນກະທົບຕໍ່ລາຍຮັບ ແລະ ຊີວິດການເປັນຢູ່ຂອງເຂົາເຈົ້າ ເຊິ່ງນີ້ເປັນພຽງຜົນກະທົບໃນໄລຍະເບື້ອງຕົ້ນເທົ່ານັ້ນ ຖ້າຫາກສະພາບການແຜ່ລະບາດຂອງພະຍາດໂຄວິດ – 19 ຍັງແກ່ຍາວໄປຕື່ມຈະມີສິ່ງທ້າທາຍອັນໃຫຍ່ຫຼວງໃຫ້ແກ່ລັດຖະບານທີ່ຈະຕ້ອງໄດ້ຫາວິທີການແກ້ໄຂ ເຊິ່ງຕາມການຄາດຄະເນໃນເບື້ອງຕົ້ນເຫັນວ່າຜົນກະທົບຂອງພະຍາດໂຄວິດ – 19 ໃນປັດຈຸບັນຫາກມີການແກ່ຍາວຈະເຮັດໃຫ້ອັດຕາການວ່າງວຽກພາຍໃນປະເທດ ເພີ່ມຂຶ້ນຈາກອັດຕາປົກກະຕິ 2% ຂຶ້ນເປັນ 25%.

ໃນໄລຍະຜ່ານມາລັດຖະບານກໍໄດ້ມີນະໂຍບາຍປົກປ້ອງແຮງງານ ແລະ ການຈ້າງງານ ໂດຍອີງໃສ່ກົດໝາຍວ່າດ້ວຍແຮງງານ ແລະ ກົດໝາຍວ່າດ້ວຍການປະກັນສັງຄົມ ທີ່ກຳນົດກ່ຽວກັບການແກ້ໄຂບັນຫາດ້ານແຮງງານໃນພາວະເກີດເຫດການສຸກເສີນ ໂດຍປະຕິບັດນະໂຍບາຍການອຸດໜູນຕ່າງໆຕໍ່ຫົວໜ່ວຍແຮງງານທີ່ຈຳເປັນຕ້ອງໃຫ້ຜູ້ອອກແຮງງານພັກວຽກ ໂດຍສະເພາະແມ່ນໃຫ້ຜູ້ໃຊ້ແຮງງານຈ່າຍຄ່າແຮງງານປົກກະຕິໃຫ້ຜູ້ອອກແຮງງານຕາມຄວາມສາມາດແຕ່ບໍ່ໃຫ້ຫຼຸດຄ່າແຮງງານຂັ້ນຕໍ່າ, ມີນະໂຍບາຍໃຫ້ຜູ້ໃຊ້ແຮງງານ ແລະ ຜູ້ອອກແຮງງານໂຈະ ຫຼື ເລື່ອນເວລາໃນການຈ່າຍເງິນສົມທົບປະກັນສັງຄົມ.

ສໍາລັບຜູ້ເປັນສະມາຊິກກອງທຶນປະກັນສັງຄົມ ທີ່ໄດ້ຮັບຜົນກະທົບແມ່ນຈະໄດ້ຮັບການພິຈາລະນາແກ້ໄຂເງິນອຸດໜູນການວ່າງງານຕາມກົດໝາຍ ວ່າດ້ວຍການປະກັນສັງຄົມ. ສຳລັບແຮງງານນອກປະກັນສັງຄົມ ແລະ ແຮງງານນອກລະບົບທີ່ໄດ້ຮັບຜົນກະທົບຮຸນແຮງ ກໍໄດ້ຮັບການພິຈາລະນາບັນເທົາທຸກຕາມຄວາມເໝາະສົມ.

ນອກນັ້ນ, ທ່ານ ຄຳແພງ ໄຊສົມແພງ ຍັງໄດ້ສະເໜີໃຫ້ບັນດາປະເທດອາຊຽນ ສະເພາະແມ່ນໃນເງື່ອນໄຂທີ່ການແຜ່ລະບາດຂອງພະຍາດໂຄວິດ – 19 ຍັງບໍ່ຮູ້ຈະສິ້ນສຸດຍາມໃດ, ບັນດາປະເທດສະມາຊິກອາຊຽນທີ່ມີຜູ້ອອກແຮງງານລາວໄປເຮັດວຽກຢູ່ປະເທດສະມາຊິກໃດໜຶ່ງທີ່ຍັງຢູ່ ຫຼື ກັບຄືນປະເທດແລ້ວ, ຂໍໃຫ້ມີການປະຕິບັດນະໂຍບາຍການອຸດໜູນຕ່າງໆຕາມກົດໝາຍທີ່ກ່ຽວຂ້ອງຂອງປະເທດນັ້ນ. ພ້ອມກັນນັ້ນ, ສະເໜີອົງການແຮງງານສາກົນພິຈາລະນາແນະນໍາດ້ານນະໂຍບາຍ ແລະ ການຊ່ວຍເຫຼືອດ້ານເຕັກນິກວິຊາການ ແລະ ແຫຼ່ງທຶນເພື່ອແກ້ໄຂຜົນກະທົບດ້ານແຮງງານຈາກພະຍາດໂຄວິດ – 19 ໃຫ້ມີປະສິດທິຜົນດີຂຶ້ນ.

ຂ່າວ: ກາວຊົ່ງ, ຂໍ້ມູນຈາກກະຊວງແຮງງານ ແລະ ສະຫວັດດີການສັງຄົມ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ