ຄວາມທ້າທາຍໃໝ່ຂອງ ທ່ານ ບຸນລັບ ຮັບໜ້າທີ່ນໍາທີມລຸຍລີກສູງສຸດຂອງລາວອີກຄັ້ງຮອບ 3 ປີ - Laoedaily

ຄວາມທ້າທາຍໃໝ່ຂອງ ທ່ານ ບຸນລັບ ຮັບໜ້າທີ່ນໍາທີມລຸຍລີກສູງສຸດຂອງລາວອີກຄັ້ງຮອບ 3 ປີ

ເປັນອີກເຫດການທີ່ໜ້າຕິດຕາມ ສໍາລັບ ທ່ານ ບຸນລັບ ເຄນກິຕິສັກ ອະດີດກອງໜ້າທີມຊາດລາວ ທີ່ມີຊື່ສຽງ ແລະ ປັດຈຸບັນກໍເປັນຄູຝຶກລາວ ທີ່ມີຊື່ສຽງເຊັ່ນກັນ, ເຊິ່ງປີນີ້ຫວນຄືນກັບມາຄຸມທີມລຸຍລີກສູງສຸດຂອງ ສປປ ລາວ ອີກຄັ້ງໃນຮອບ 3 ປີ ຮັບຄວາມທ້າທາຍໃໝ່ພາ ຊ້າງນ້ອຍ ເອັຟຊີ ລຸຍເປບຊີ ລາວລີກ 1 ( ລີກສູງສຸດຂອງລາວ ) ພ້ອມກັບເປົ້າຫວັງຄວ້າສິດໄປແຂ່ງຂັນລາຍການລະດັບ ເອເອັຟຊີ ລະດູການໜ້າ.

ດັ່ງທີ່ຮູ້ ທ່ານ ບຸນລັບ ເຄນກະຕິສັກ ເປັນອະດີດກອງໜ້າໃນຕໍານານຂອງວົງການບານເຕະລາວ ທີ່ມີຜົນງານໂດດເດັ່ນ ກ່ອນຈະຫັນມາເປັນຄູຝຶກໃນປີ 1998 ພາທີມສະໂມສອນ ຄຂປກ (ຄົມມະນາຄົມ, ຂົນສົ່ງ, ໄປສະນີ ແລະ ກໍ່ສ້າງ) ຄວ້າແຊັມລີກສູງສຸດຂອງ ສປປ ລາວ ໃນເວລານັ້ນໄດ້ຫຼາຍສະໄໝ ຈົນມາເຖິງປີ 2016 ທ່ານ ບຸນລັບ ກ້າວຂຶ້ນເປັນຫົວໜ້າຄູຝຶກຂອງ ລາວໂຕໂຢຕ້າ ເອັຟຊີ ກ່ອນພາທີມຄວ້າຮອງແຊັມ ແລະ ມາເຖິງປີ 2017 ສາມາດພາທີມຄວ້າແຊັມລາວລີກ ໄດ້ສໍາເລັດ.

ຫຼັງຈາກພາ ລາວໂຕໂຢຕ້າ ເອັຟຊີ ຄວ້າແຊັມລາວລີກ 2017 ທ່ານ ບຸນລັບ ກໍຢຸດຕິດບົດບາດຄູຝຶກໃນລີກສູງສຸດຂອງ ສປປ ລາວ ກ່ອນຫັນໄປປັ້ນທີມເຍົາວະຊົນເປັນຕົ້ນແມ່ນ ວຽງຈັນ ເອັຟທີ ເຂົ້າຮ່ວມການແຂ່ງຂັນລະດັບເຍົາວະຊົນ, ບານເຕະຊີງຂັນ ສຕລ ຮຸ່ນ 15 ປີ ກັບ18 ປີ ລວມເຖິງບານເຕະຮອງຈາກລາວລີກ ກໍຄື ບານເຕະສາຍ ກ ( ລາວລີກ 2 ປັດຈຸບັນ ) ໃນ 2 ປີທີ່ຜ່ານມາ ຫຼ້າສຸດໃນປີ 2020 ທ່ານ ບຸນລັບ ໄດ້ເຊັນສັນຍາໃນຕົ້ນປີທີ່ຜ່ານມາກັບ ຊ້າງນ້ອຍ ເອັຟຊີ ຫວນສູ່ລີກສູງສຸດຂອງລາວ ອີກຄັ້ງ.

ຫຼ້າສຸດ ທ່ານ ບຸນລັບ ເຄນກິຕິສັກ ຫົວໜ້າຄູຝຶກ ສະໂມສອນ ຊ້າງນ້ອຍ ເອັຟຊີ ໄດ້ໃຫ້ສຳພາດວ່າ : ຊ້າງນ້ອຍ ເອັຟຊີ ແມ່ນກະກຽມຄວາມພ້ອມມາຕັ້ງແຕ່ຕົ້ນເດືອນມີນາ ເປັນຕົ້ນມາ ເພື່ອກະກຽມນັກກີລາ ເຂົ້າຮ່ວມ ການແຂ່ງຂັນ ເປບຊີ ລາວລີກ 1 ປະຈຳປີ 2020 ເຊິ່ງໄດ້ຝຶກຊ້ອມມາໄລຍະໜຶ່ງທີ່ສະໜາມບານເຕະຫຍ້າທຽມ ສະຫະພັນບານເຕະແຫ່ງຊາດລາວ ແລະ ສະໜາມຫຍ້າທຽມ ວິທະຍາໄລເຕັກນິກຊັບພະວິຊາ, ແຕ່ຫຼັງຈາກທີ່ໄດ້ຮັບແຈ້ງການ ເລື່ອນການແຂ່ງຂັນລາຍການຕ່າງໆ ເນື່ອງຈາກ ໂຄວິດ-19 ທີ່ມີການລະບາດຢ່າງຮຸນແຮງ ແມ່ນໄດ້ແຈ້ງໃຫ້ບັນດານັກກີລາພັກການຝຶກຊ້ອມ ໂດຍນັກກີລາແຕ່ລະຄົນໄດ້ຝຶກຊ້ອມທາງດ້ານພະລະກຳລັງ ແບບອອນລາຍຢູ່ເຮືອນ ອາທິດລະ 2 ຄັ້ງ ວັນອັງຄານ ແລະ ວັນພະຫັດ ເພື່ອຮັກສາລະດັບຄວາມແຂງແຮງຂອງຮ່າງກາຍໃຫ້ມີການກຽມຄວາມຕະຫຼອດເວລາ, ເຊິ່ງປັດຈຸບັນກໍປະຕິບັດຕາມປົກກະຕິ ແລະ ຖ້າມີການແຈ້ງການໃຫ້ອະນຸຍາດກັບມາຊ້ອມໄດ້ ກໍຈະເອີ້ນນັກເຕະກັບມາຊ້ອມທັນທີ.

“ ນັກກີລາສ່ວນໃຫຍ່ທີ່ຈະໃຊ້ໃນປີນີ້ແມ່ນຈະມີການປ່ຽນແປງນັກກີລາຈຳນວນໜຶ່ງ, ເຊິ່ງນັກກີລາສ່ວນໃຫຍ່ແມ່ນນັກເຕະດາວເດັ່ນ ທີມຊາດລາວ ຂະນະທີ່ ນັກເຕະຕ່າງປະເທດໃນປີນີ້ ຊ້າງນ້ອຍ ຈະເສີມນັກກີລາຕ່າງປະເທດເຂົ້າຮ່ວມທີມນຳ ເຊິ່ງຍັງບໍ່ທັນໄດ້ເຊັນສັນຍາຢ່າງເປັນທາງການ ຄາດວ່າຈະໄວໆນີ້, ແນ່ນອນເປົ້າໝາຍປີນີ້ພວກເຮົາກໍຫວັງຄວ້າສິດໄປແຂ່ງຂັນລາຍການ ເອເອັຟຊີ ຄັບ ລະດູການໜ້າໃຫ້ກັບ ” ທ່ານ ບຸນລັບ ເຄນກິຕິສັກ ກ່າວ.

ສຳລັບ ປະຫວັດ ແລະ ຜົນງານຂອງ ອາຈານ ບຸນລັບ ເຄນກິຕິສັກ ປັດຈຸບັນ 54 ປີ, ເຄີຍເປັນອະດີດນັກເຕະສູນໜ້າຊື່ດັງ ທີມຊາດລາວຫລາຍສະໄໝ ໂດຍສະະເພາະປີ 1998 ກ້າວສູ່ການເປັນຄູຝຶກຄັ້ງທໍາອິດ ແລະ ເປັນທັງນັກເຕະນໍາໃນຕອນນັ້ນ ພາທີມສະໂມສອນ ຄຂປກ (ຄົມມະນາຄົມ, ຂົນສົ່ງ, ໄປສະນີ ແລະ ກໍ່ສ້າງ) ໃນເມື່ອກ່ອນ ຄ້ວາແຊ໋ມຫລາຍສະໄໝ, ສ່ວນໃນເສັ້ນທາງການເປັນຄູຝຶກທີມຊາດແມ່ນຮັບບົດບາດ ໃນປີ 2004 ເຄີຍຄຸມທີມຊາດ ຊຸດບານໂລກ ຮອບຄັດເລືອກໄປແຂ່ງຂັນທີ່ປະເທດອີຣານ, ເຄີຍເປັນທັງຜູ້ຊ່ວຍ ແລະ ຫົວໜ້າຄູຝຶກ ທີມຊາດ ຢູ 20, ຢູ 19 ແລະ ຢູ 16 ໂດຍສະເພາະ ທ່ານ ບຸນລັບ ເຄີຍພາ ຢູ 16 ລາວ ສ້າງປະຫວັດສາດທະລຸເຂົ້າຮອບ 4 ທີມບານເຕະຊີງແຊັມອາຊຽນ 2015 ຮຸ່ນອາຍຸບໍ່ເກີນ 16 ປີ ທີ່ປະເທດກໍາປູເຈຍ ກ່ອນເສຍໃຫ້ ອົດສະຕຣາລີ ຄວ້າອັນດັບ 4 ໄປຄອງ.
(ຂ່າວ: ຄໍາສອນ)
ຮູບຈາກ: ສະຫະພັນບານເຕະແຫ່ງຊາດລາວ ແລະ ອາຈານ ບຸນລັບ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ