ການນຳເຂົ້າ - ສົ່ງອອກສິນຄ້າເດືອນເມສາ ມີມູນຄ່າ 529 ລ້ານໂດລາ - Laoedaily

ການນຳເຂົ້າ – ສົ່ງອອກສິນຄ້າເດືອນເມສາ ມີມູນຄ່າ 529 ລ້ານໂດລາ

ມູນຄ່າການນໍາເຂົ້າ ແລະ ສົ່ງອອກຂອງ ສປປ ລາວ ໃນເດືອນເມສາ ບັນລຸໄດ້ປະມານ 529 ລ້ານໂດລາສະຫະລັດ. ໃນນັ້ນ, ມູນຄ່າການສົ່ງອອກມີປະມານ 208 ລ້ານໂດລາ, ຂາດດຸນການຄ້າປະມານ 112 ລ້ານໂດລາ.

ສູນຂໍ້ມູນ – ຂ່າວສານທາງການຄ້າຂອງ ສປປ ລາວ, ກະຊວງອຸດສາຫະກຳ ແລະ ການຄ້າ ເປີດເຜີຍມູນຄ່າການນໍາເຂົ້າ ແລະ ສົ່ງອອກຂອງ ສປປ ລາວ ປະຈໍາເດືອນເມສາ 2020 ບັນລຸໄດ້ປະມານ 529 ລ້ານໂດລາ. ໃນນັ້ນ, ມູນຄ່າການສົ່ງອອກມີປະມານ 208 ລ້ານໂດລາ, ມູນຄ່າການນໍາເຂົ້າມີປະມານ 320 ລ້ານໂດລາ ແລະ ຂາດດຸນການຄ້າປະມານ 112 ລ້ານໂດລາ.

ໝວດສິນຄ້າສົ່ງອອກຫຼັກ ສະເລ່ຍທັງໝົດແມ່ນເປັນເງິນປະມານ 208 ລ້ານໂດລາ ເຊັ່ນ:   ເຫຍື່ອໄມ້ ແລະ ເສດເຈ້ຍ 26 ລ້ານໂດລາ, ໝາກກ້ວຍ 21 ລ້ານໂດລາ, ທອງແດງ ແລະ ເຄື່ອງທີ່ເຮັດດ້ວຍທອງແດງ 21 ລ້ານໂດລາ, ຄຳປະສົມ, ຄຳແທ່ງ 12 ລ້ານໂດລາ, ມັນຕົ້ນ 11 ລ້ານໂດລາ, ໝາກໄມ້       ( ໝາກໂມ, ໝາກໜອດ, ໝາກຂາມ… ) 10 ລ້ານໂດລາ, ກາເຟ ( ບໍ່ທັນໄດ້ປຸງແຕ່ງ ) 10 ລ້ານໂດລາ, ແຮ່ທອງ 10 ລ້ານໂດລາ ເກືອກາລີ 9 ລ້ານໂດລາ, ເຄື່ອງນຸ່ງຫົ່ມ 5 ລ້ານໂດລາ.

ໝວດສິນຄ້ານໍາເຂົ້າຫຼັກ ສະເລ່ຍທັງໝົດແມ່ນເປັນເງິນປະມານ 320 ລ້ານໂດລາ ປະກອບມີສິນຄ້າ ເຊັ່ນ: ອຸປະກອນກົນຈັກ ( ນອກຈາກເຄື່ອງກົນຈັກພາຫະນະ ) 30 ລ້ານໂດລາ, ເຫຼັກ ແລະ ເຄື່ອງທີ່ເຮັດດ້ວຍເຫຼັກ, ເຫຼັກກ້າ 30 ລ້ານໂດລາ, ນ້ຳມັນກາຊວນ 25 ລ້ານໂດລາ, ສັດທີ່ມີຊີວິດ 20 ລ້ານໂດລາ, ເຄື່ອງດື່ມ ( ນໍ້າ, ນໍ້າອັດລົມ, ຊູກໍາລັງ… ) 17 ລ້ານໂດລາ, ພາຫະນະທາງບົກ ( ນອກຈາກລົດຈັກ, ລົດໄຖ ) 14 ລ້ານໂດລາ, ໄຟຟ້າ 13 ລ້ານໂດລາ, ເຄື່ອງໃຊ້ທີ່ເຮັດດ້ວຍພລາສຕິກ 12 ລ້ານໂດລາ, ເຫຼັກເສັ້ນ ແລະ ເຫຼັກຮູບປະພັນຕ່າງໆ 11 ລ້ານໂດລາ, ຊິ້ນສ່ວນອາໄຫຼ່ລົດ      ( ລວມທັງຢາງ, ແວ່ນ, ໂສ້… )    6 ລ້ານໂດລາ.

ທັງນີ້ 5 ປະເທດທີ່ ສປປ ລາວ ສົ່ງອອກຫຼັກ ປະກອບມີ: ສປ ຈີນ ມູນຄ່າປະມານ 79 ລ້ານໂດລາ, ສສ ຫວຽດນາມ 54 ລ້ານໂດລາ, ໄທ 45 ລ້ານໂດລາ, ສະວິດ 12 ລ້ານໂດລາ ແລະ ເຢຍລະມັນ 4 ລ້ານໂດລາ. ໃນຂະນະທີ່ 5 ປະເທດທີ່ ສປປ ລາວ ນໍາເຂົ້າຫຼັກປະກອບມີປະເທດໄທ ມີມູນ    ຄ່າປະມານ 182 ລ້ານໂດລາ, ສປ ຈີນ 72 ລ້ານໂດລາ,          ສສ ຫວຽດນາມ 31 ລ້ານໂດລາ, ຍີ່ປຸ່ນ 10 ລ້ານໂດລາ ແລະ ອາເມຣິກາ 9 ລ້ານໂດລາ ເຊິ່ງມູນຄ່າການນໍາເຂົ້າ ແລະ ສົ່ງອອກຂອງ ສປປ ລາວ ປະຈໍາເດືອນເມສາ 2020 ນີ້ ແມ່ນຍັງບໍ່ກວມເອົາມູນຄ່າການສົ່ງອອກໄຟຟ້າ.

ຂ່າວ: ສັນຕິ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ