ເຖິງແມ່ນວ່າປັດຈຸບັນ ສປປ ລາວ ຈະໄດ້ຮັບການຊ່ວຍເຫຼືອຈາກພາກສ່ວນຕ່າງໆໃນສັງຄົມທັງພາຍໃນ ແລະ ຕ່າງປະເທດຢູ່ຕະຫຼອດ ບໍ່ວ່າຈະເປັນເງິນສົດ ຫຼື ອຸປະກອນການແພດຕ້ານໂຄວິດ-19 ບວກກັບເປັນເວລາ 20ກວ່າວັນທີ່ລາວເຮົາບໍ່ມີຜູ້ຕິດເຊື້ອໂຄວິດ-19 ເພີ່ມ, ແຕ່ລັດຖະບານກໍ່ບໍ່ໄດ້ນິ້ງນອນໃຈ ຍັງໃຫ້ປະຊາຊົນສືບຕໍ່ປະຕິບັດມາດຕະການຕ່າງໆຕໍ່ໄປ ພ້ອມບໍ່ປະໝາດ ພ້ອມດຽວກັນນີ້ຍັງຄົ້ນຄວ້າຈັດຊື້ອຸປະກອນການແພດເພີ່ມ ເພື່ອກຽມພ້ອມຮັບມືໃຫ້ທັນກັບສະພາບການຫາກເກີດການລະບາດຮອບໃໝ່.
ທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ ໄດ້ເປີດເຜີຍໃນວັນທີ 6 ພືກສະພານີ້ວ່າ: ອີງຕາມການຄົ້ນຄວ້າດ້ານວິຊາການເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ເຫັນວ່າເຄື່ອງມືດ້ານການແພດຈໍານວນໜຶ່ງ ຍັງຂາດເຂີນ ແລະ ມີຄວາມຕ້ອງການຈໍາເປັນອັນຮີບດ່ວນເຊັ່ນ: ອຸປະກອນການແພດ, ເຄື່ອງມືປ້ອງກັນການຕິດເຊື້ອ, ພາຫະນະຮັບ-ສົ່ງຄົນເຈັບ ແລະ ຢາປົວພະຍາດ.
ສິ່ງທີ່ຕ້ອງຈັດຊື້ຮີບດ່ວນມີດັ່ງນີ້: ສະເໜີນໍາໃຊ້ເງິນບ້ວງຮັບບໍລິຈາກຂອງສັງຄົມປະມານ 9,54ຕື້ກີບ ເພື່ອຈັດຊື້ ເຄື່ອງຕິດຕາມອາການຄົນເຈັບ ຈໍານວນ 23 ເຄື່ອງ ເພື່ອປະກອບໃຫ້ໂຮງໝໍສູນກາງ; ເຄື່ອງຊ່ວຍຫາຍໃຈຈໍານວນ 14ເຄື່ອງ ເພື່ອໃຫ້ໂຮງໝໍສູນກາງ 7ເຄື່ອງ ແລະ ໂຮງໝໍພາກ 7ເຄື່ອງ; ລົດຮັບສົ່ງຄົນເຈັບແບບລົດຕູ້ທີ່ຮັບໃຊ້ສະເພາະໂຄວິດ-19 ຄົບຊຸດ ຈໍານວນ 1ຄັນ ເພື່ອປະກອບໃຫ້ໂຮງໝໍມິດຕະພາບ; ລົດຮັບສົ່ງຄົນເຈັບແບບລົດຕູ້ ມີອຸປະກອນຄົບຊຸດຈໍານວນ 2ຄັນ ເພື່ອໃຫ້ໂຮງໝໍ 103.
ພ້ອມນີ້ກໍ່ສະເໜີນໍາໃຊ້ເງິນບ້ວງງົບປະມານຂອງລັດ ປະມານ 23,98ຕື້ກີບ ເພື່ອຈັດຊື້ ເຈວລ້າງມື 20.000ກ່ອງ, ເພື່ອແຈກຢາຍໃຫ້ສູນກາງ 3.000ກ່ອງ ແລະ ທ້ອງຖິ່ນ 17.000 ກ່ອງ; ຊຸດ PPE (ຊຸດອາວະກາດ) ຈໍານວນ 20.000ຊຸດ ເພື່ອຢາຍໃຫ້ສູນກາງ 10.000ຊຸດ ແລະ ທ້ອງຖິ່ນ 10.000ຊຸດ; ໜ້າກາກອະນາໄມສໍາລັບແພດ(ຜ້າອັດປາກ-ດັງ) ຈໍານວນ 5ລ້ານອັນ ເພື່ອຢາຍໃຫ້ສູນກາງ 2ລ້ານອັນ, ທ້ອງຖິ່ນ 3ລ້ານອັນ ພ້ອມດ້ວຍລົດຮັບສົ່ງຄົນເຈັບແບບລົດຕູ້ ມີອຸປະກອນພື້ນຖານ ຈໍານວນ 7ຄັນ ເພື່ອປະກອບໃຫ້ໂຮງໝໍແຂວງ.