ການນຳແຂວງສະຫວັນນະເຂດ ລົງຊຸກຍູ້ການພັດທະນາພື້ນຖານໂຄງລ່າງຢູ່ທີ່ບ້ານກະຫຼ້າຍ - Laoedaily

ການນຳແຂວງສະຫວັນນະເຂດ ລົງຊຸກຍູ້ການພັດທະນາພື້ນຖານໂຄງລ່າງຢູ່ທີ່ບ້ານກະຫຼ້າຍ

ໃນທ້າຍເດືອນເມສາ 2020 ທີ່ຜ່ານມານີ້ ທ່ານ ຄໍາເຜີຍ ຜັນທະຈອນ ປະທານສະພາປະຊາຊົນແຂວງສະຫວັນນະເຂດ ພ້ອມດ້ວຍຄະນະພະແນກການທີ່ກ່ຽວຂ້ອງຂອງແຂວງ ໄດ້ໄປເຄື່ອນໄຫວເຮັດວຽກເພື່ອຊຸກຍູ້ການພັດທະນາພື້ນຖານໂຄງລ່າງຢູ່ທີ່ບ້ານກະຫຼ້າຍ ເຊິ່ງເປັນບ້ານທີ່ຍັງທຸກຍາກຫ່າງໄກສອກຫຼີກຂອງເມືອງວິລະບູລີ ໂດຍໃຫ້ການຕ້ອນຮັບ ແລະ ພາທາງຂອງ ທ່ານ ຄໍາຜຸຍ ສີບຸນເຮືອງ ເຈົ້າເມືອງວິລະບູລີ ພ້ອມຄະນະ.

ບ້ານກະຫຼ້າຍ ແມ່ນບ້ານໜຶ່ງທີ່ຍັງທຸກຍາກຂອງເມືອງວິລະບູລີ, ມີ 42 ຄອບຄົວ, ມີພົນລະເມືອງ 252 ຄົນ ຍິງ 125 ຄົນ, ຕັ້ງຢູ່ເຂດຫ່າງໄກສອກຫຼີກຕາມເນີນພູຮ່ອມພູ, ຫ່າງຈາກເທສະບານເມືອງໄປທາງທິດຕາເວັນອອກສ່ຽງເໜືອປະມານ 43 ກິໂລແມັດ, ເປັນບ້ານຊົນເຜົ່າບຣູ, ປະຊາຊົນມີອາຊີບເຮັດໄຮ່ປູກເຂົ້າເປັນຕົ້ນຕໍ, ປູກຝັງລ້ຽງສັດນ້ອຍຈໍານວນໜຶ່ງ. ໃນໄລຍະທີ່ຜ່ານມາທາງພັກລັດການນໍາຂັ້ນເມືອງ ກໍຄືຂັ້ນແຂວງກໍໄດ້ເອົາໃຈໃສ່ຊອກຫາຊ່ອງທາງແຫຼ່ງທຶນ ເພື່ອມາພັດທະນາດ້ານພື້ນຖານໂຄງລ່າງດ້ານຕ່າງໆຂອງບ້ານດັ່ງກ່າວ ເປັນຕົ້ນແມ່ນ: ການກໍ່ສ້າງໂຮງຮຽນທີ່ໄດ້ມາດຖານ, ກໍ່ສ້າງສ້ອມແປງລະບົບນໍາລິນ, ລະບົບໄຟຟ້າແສງຕາເວັນ ແລະ ກໍ່ສ້າງສ້ອມແປງເສັ້ນທາງເຂົ້າຫາບ້ານ ແລະ ອື່ນໆ ເພື່ອແນໃສ່ເຮັດໃຫ້ບ້ານດັ່ງກ່າວຫຼຸດພົ້ນອອກຈາກ ຄວາມທຸກຍາກເພື່ອໃຫ້ພົ້ນທຸກເທື່ອລະກ້າວ.

ໃນໂອກາດໄປຢ້ຽມຢາມໃນຄັ້ງນີ້ ທ່ານ ຄໍາເຜີຍ ຜັນທະຈອນ ຮອງເລຂາພັກແຂວງ, ປະທານສະພາປະຊາຊົນແຂວງ ພ້ອມຄະນະ ກໍໄດ້ນໍາເອົາເຄື່ອງອຸປະໂພກ – ບໍລິໂພກຈໍານວນໜຶ່ງມອບໃຫ້ປະຊາຊົນພາຍໃນບ້ານກະຫຼ້າຍ ເຊິ່ງປະກອບມີ : ນໍ້າດື່ມຕຸກນ້ອຍ, ປາກະປ໋ອງ ແລະ ໝີ່ໄວໆ ເຖິງວ່າຈະບໍ່ຫຼວງຫຼາຍແຕ່ມັນກໍໄດ້ສະແດງເຖິງ ຄວາມເປັນຫ່ວງເປັນໄຍຂອງການນໍາພັກ – ລັດທີ່ມີຕໍ່ປະຊາຊົນທີ່ຍັງທຸກຍາກຂາດເຂີນ. ຈາກນັ້ນ, ກໍໄດ້ຍ່າງເລາະເບິ່ງສະພາບການພັດທະນາຂອງບ້ານ, ຂຶ້ນພູໄປເບິ່ງອ່າງກັກເກັບນໍ້າຂອງລະບົບນໍ້າລິນ ເຊິ່ງຫ່າງຈາກບ້ານປະມານ 200 ແມັດ, ເບິ່ງການກໍ່ສ້າງໂຮງຮຽນຫຼັງໃໝ່, ການກໍ່ສ້າງເສັ້ນທາງເຂົ້າຫາບ້ານ ແລະ ອື່ນໆ. ໃນນັ້ນ, ທ່ານກໍໄດ້ຊີ້ນໍາໃຫ້ການນໍາຂັ້ນເມືອງ ແລະ ບ້ານຈົ່ງໄດ້ພ້ອມກັນເອົາໃຈໃສ່ໃນການພັດທະນາບ້ານ ໂດຍສະເພາະແມ່ນດ້ານການປູກຝັງ, ການລ້ຽງສັດ ເຊັ່ນ: ລະດົມໃຫ້ເຂົາເຈົ້າເຮັດນາປູກເຂົ້າ, ເຮັດສວນປູກແຂມ, ການລ້ຽງສັດນ້ອຍ, ການເຮັດສວນຄົວ; ໃຫ້ເມືອງແຕ່ງຕັ້ງວິຊາການທີ່ກ່ຽວຂ້ອງເພື່ອນຳພາປະຊາຊົນໃຫ້ເຂົາເຈົ້າສົນໃຈໃນການປູກ – ການລ້ຽງ ແລະ ຕ້ອງເລີ່ມໄປຈາກຄອບຄົວຕົວແບບສາກ່ອນ ຫຼື ຈາກໜ້ອຍໄປຫາຫຼາຍ. ທັງນີ້, ກໍເພື່ອຮັບປະກັນໃຫ້ມີຜົນສໍາເລັດສູງ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ