ນ້ອມສົ່ງ ອັດຖິທະຫານອາສາສະຫມັກ ແລະ ຊ່ຽວຊານຫວຽດນາມ 21 ສົບກັບຄືນປະເທດ - Laoedaily

ນ້ອມສົ່ງ ອັດຖິທະຫານອາສາສະຫມັກ ແລະ ຊ່ຽວຊານຫວຽດນາມ 21 ສົບກັບຄືນປະເທດ

ເພື່ອປະຕິບັດຕາມນະໂຍບາຍຂອງສອງພັກ, ສອງລັດລາວ-ຫວຽດນາມ, ກ່ຽວກັບການຊອກຫາ, ຂຸດຄົ້ນ, ທ້ອນໂຮມອັດຖິທະຫານອາສາສະຫມັກ ແລະ ຊ່ຽວຊານຫວຽດນາມທີ່ເສຍສະຫຼະຊິວິດໃນປາງສົງຄາມຢູ່ພື້ນທີ່ຂອງແຂວງສະຫວັນນະເຂດ, ເພື່ອກັບຄືນປະເທດໃນລະດູແລ້ງສົກປີ 2019-2020.

ໃນວັນທີ 3 ພຶດສະພາ 2020 ຄະນະປະຕິບັດງານພິເສດສະຫວັນະເຂດ – ກວາງຈິ ໄດ້ຈັດພິທີເຊັນບົດບັນທຶກມອບ-ຮັບ ອັດຖິທະຫານອາສາສະຫມັກ ແລະ ຊ່ຽວຊານຫວຽດນາມ 21 ສົບກັບຄືນປະເທດ ຢ່າງເປັນທາງການຢູ່ທີ່ກອງຂຸດຄົ້ນ 584 ຕັ້ງຢູ່ບ້ານແກ້ງຄັນເມືອງວິລະບູລີ ແຂວງສະຫວັນະເຂດ ເປັນກຽດເຂົ້າຮ່ວມ ໂດຍສະຫາຍ ພົນຈັດຕະວາ ຈະເລີນ ວົງວິໄຊ ເລຂາຄະນະພັກ ຫົວໜ້າການເມືອງກອງບັນຊາການທະຫານແຂວງ, ຮອງຄະນະປະຕິບັດງານພິເສດແຂວງສະຫວັນະເຂດ, ມີສະຫາຍ ພັນໂທ ຫງວຽນວັນຈ້ອງ ຫົວໜ້າການທະຫານກອງປະຕິບັດງານພິເສດ 584 ພ້ອມດ້ວຍຄະນະວິຊາການສອງຝ່າຍເຂົ້າຮ່ວມ.

ໃນພິທີສະຫາຍ ພັນໂທ ຫງວຽນວັນຈ້ອງ ຫົວໜ້າກອງຂຸດຄົ້ນ 584 ໄດ້ຂື້ນຜ່ານບົດສະຫຼຸບໃນການຊອກຫາ,ຂຸດຄົ້ນ,ທ້ອນໂຮມອັດຖິທະຫານອາສາສະຫມັກ ແລະ ຊ່ຽວຊານຫວຽດນາມທີ່ເສຍສະຫຼະຊິວິດໃນປາງສົງຄາມຢູ່ພື້ນທີ່ຂອງແຂວງສະຫວັນະເຂດເຊີ່ງມີທັງຂໍ້ສະດວກ ແລະ ຂໍ້ຫຍຸ້ງຍາກແຕ່ກໍ່ສາມາດຊອກໄດ້ 21 ສົບໃນລະດູແລ້ງສົກ 2019-2020 ນີ້ ຍ້ອນຄະນະປະຕິບັດງານພິເສດ 2 ແຂວງສະຫວັນະເຂດ-ກວາງຈິໄດ້ເອົາໃຈໃສ່ຊີ້ນຳຢ່າງໃກ້ສິດໃນການຊອກຄົ້ນຕາມຕົວເມືອງທີ່ມີເປົ້າໝາຍ,ອຳນາດການປົກຄອງໃນແຕ່ລະເມືອງທີ່ລົງຊອກຄົ້ນແມ່ນໃຫ້ຄວາມຮ່ວມມື ແລະ ສະໜອງຂໍ້ມູນຂ່າວສານໄດ້ເປັນຢ່າງດີໂດຍສະເພາະແມ່ນກອງບັນຊາການທະຫານເມືອງໃນແຕ່ລະເມືອງ ໃນນັ້ນເມືອງອາດສະພັງທອງມີ 12 ອັດຖິ,ເມືອງຈຳພອນ 2 ອັດຖິ,ເມືອງອາດສະພອນ 7 ອັດຖິລວມເປັນ 21 ອັດຖິ.

ຈາກນັ້ນ ສະຫາຍ ພົນຈັດຕະວາ ຈະເລີນ ວົງວິໄຊ ຫົວໜ້າກອງບັນຊາການທະຫານແຂວງ ຮອງຫົວໜ້າຄະນະສະເພາະກິດແຂວງສະຫວັນະເຂດ ໄດ້ມີຄຳຄິດຄຳເຫັນເຊິ່ງສະຫາຍໄດ້ກ່າວວ່າການມອບ-ຮັບອັດຖິທະຫານອາສາສະຫມັກ ແລະ ຊ່ຽວຊານຫວຽດນາມໃນປີນີ້ແມ່ນບໍ່ໄດ້ເຮັດຄືເກົ່າເພາະອິງໃສ່ສະພາບການແຜ່ລະບາດຂອງພະຍາດໂຄວິດ 19 ຢ່າງຮ້າຍແຮງໃນທົ່ວໂລກກໍ່ຄືໃນປະເທດເຮົາ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ