ຖວທ ອອກຄຳແນະນຳ! ຜູ້ປະກອບການດ້ານການບໍລິການຕ້ອງຮັບປະກັນຄວາມປອດໄພຈາກໂຄວິດ - Laoedaily

ຖວທ ອອກຄຳແນະນຳ! ຜູ້ປະກອບການດ້ານການບໍລິການຕ້ອງຮັບປະກັນຄວາມປອດໄພຈາກໂຄວິດ

ກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ(ຖວທ) ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ໄດ້ອອກຄຳແນະນຳ ສໍາລັບຜູ້ປະກອບການໂຮງແຮມ, ຣີສອດ, ເຮືອນພັກ, ຮ້ານອາຫານ, ຮ້ານກາເຟ, ຮ້ານຕັດຜົມ, ຮ້ານເສີມສວຍ ໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ສະບັບເລກທີ 142/ຖວທ ລົງວັນທີ 3 ພຶດສະພາ 2020, ຕ້ອງປະຕິບັດມາດຕະການປ້ອງກັນຢ່າງເຄັ່ງຄັດດັ່ງນີ້:

ພາບປະກອບ

1 ສໍາລັບຜູ້ປະກອບການໂຮງແຮມ, ຣີສອດ, ເຮືອນພັກ, ຮ້ານອາຫານ, ຮ້ານກາເຟ, ຮ້ານຕັດຜົມ, ຮ້ານເສີມສວຍໃຫ້ປະຕິບັດດັ່ງນີ້:

1) ຕ້ອງແທກອຸນຫະພູມພະນັກງານ ກ່ອນເຂົ້າເຮັດວຽກ ຖ້າພົບວ່າມີອຸນຫະພູມ ສູງກວ່າ 37,5 ອົງສາ ໃຫ້ໂທຫາສາຍດ່ວນ 165 ຫຼື 166 ເພື່ອຂໍຄໍາປຶກສາ ;

2) ຕ້ອງໃຫ້ຂໍ້ມູນ, ຄວາມຮູ້ ແລະ ຄໍາແນະນໍາ ກຽ່ວກັບການປ້ອງກັນການລະບາດພະຍາດ ໂຄວິດ-19 ເປັນຕົ້ນການລ້າງມືໃຫ້ຖືກວິທີ, ອາການ ແລະ ວິທີປ້ອງກັນຕົນເອງ ແກ່ຜູ້ມາໃຊ້ບໍລິການ ແລະ ພະນັກງານທຸກຄົນຕ້ອງໃສ່ຜ້າອັດປາກ-ດັງ.

3) ຈັດອ່າງລ້າງມືພ້ອມສະບູ່ ຫຼື ເຈວລ້າງມື ຫຼື ເຫຼົ້າ 70% ຂື້ນໄປ ສໍາລັບຂ້າເຊື້ອ ໄວ້ປະຕູທາງເຂົ້າຮ້ານ, ຫ້ອງນ້ໍາ, ບໍລິເວນໂຕະຈ່າຍເງິນ ເພື່ອໃຫ້ບໍລິການແກ່ຜູ້ມາໃຊ້ບໍລິການ ລວມທັງພະນັກງານໃນຮ້ານ;

4) ຕ້ອງຈັດຫາຖົງມື, ນ້ໍາຢາຂ້າເຊື້ອ ຫຼື ເຫຼົ້າ 70% ຂື້ນໄປ ຫຼື ນ້ໍາແຟັບ ແລະ ອື່ນໆ ສໍາລັບອະນາໄມ ອຸປະກອນແລະ ເຄື່ອງໃຊ້ທີ່ມີຜູ້ສໍາຜັດຈໍານວນຫຼາຍ ເປັນຕົ້ນ ປຶ້ມລາຍການອາຫານ, ໂຕະອາຫານ, ບ່ອນຈັບປະຕູເຂົ້າ-ອອກ, ບ່ອນໄຂປະຕູຫ້ອງນ້ໍາ, ອຸປະກອນຕັດຜົມ ແລະ ເສີມສວຍ ;

5) ສໍາລັບອຸປະກອນເຄື່ອງໃຊ້ໃນຫ້ອງນອນ,ໃນຫ້ອງນ້ໍາ, ອຸປະກອນຕັດຜົມ, ອຸປະກອນເສີມສວຍ ຕ້ອງໃຫ້ມີການອະນາໄມດ້ວຍນ້ໍາຢາຂ້າເຊື້ອກ່ອນ ແລະ ຫຼັງໃຊ້ທຸກຄັ້ງ.

ພາບປະກອບ

2 ສໍາລັບຜູ້ໃຫ້ບໍລິການໃຫ້ປະຕິບັດຄື:

1) ຕ້ອງແທກອຸນຫະພູມພະນັກງານ ກ່ອນເຂົ້າເຮັດວຽກ ຖ້າພົບວ່າມີອຸນຫະພູມສູງກວ່າ 37.5 ອົງສາໃຫ້ໂທຫາສາຍດ່ວນ 165 ຫຼື 166 ເພື່ອຂໍຄໍາປຶກສາ;

2) ຕ້ອງຮັກສາຫຼັກການອະນາໄມເປັນຕົ້ນ:ໃສ່ຜ້າອັດປາກ-ດັ່ງ, ໃສ່ຖົງມື, ຫມວກຄຸມຜົມ, ການນຸ່ງຖືສະອາດ ແລະ ຫມັ່ນລ້າງມືໃສ່ສະບູເປັນປະຈໍາ;

3) ຕ້ອງຮັກສາໄລຍະຫ່າງ ຢ່າງຫນ້ອຍ 01 ແມັດ ຂື້ນໄປ; 4) ຕ້ອງຮັກສາມາລະຍາດໃນການໄອ-ຈາມ.

ພາບປະກອບ

3 ສໍາລັບຜູ້ມາໃຊ້ບໍລິການ (ລູກຄ້າ) ຕ້ອງເປັນເຈົ້າການໃນການປ້ອງກັານພະຍາດຄື:

1) ທຸກຄົນທີ່ເຂົ້າມາໃນຮ້ານ ຕ້ອງໄດ້ຮັບການແທກອຸນນະພູມ ຖ້າພົບວ່າມີອຸນຫະພູມສູງກວ່າ 37,5 ອົງສາ ແມ່ນບໍ່ອະນຸຍາດໃຫ້ເຂົ້າໃນຮ້ານ ແລະ ໃຫ້ໂທຫາສາຍດ່ວນ 165 ຫຼື 166 ເພື່ອຂໍຄໍາປຶກສາ;

2) ຕ້ອງລ້າງມືດ້ວຍສະບູ່ ຫຼື ເຈວລ້າງມື ຫຼື ເຫຼົ້າສໍາລັບຂ້າເຊື້ອ ທີ່ຮ້ານກະກຽມໄວ້ ກ່ອນເຂົ້າ ແລະ ອອກຈາກຮ້ານ ແລະ ໃສ່ຜ້າອັດປາກ-ດັງ; 3) ຕ້ອງຮັກສາໄລຍະຫ່າງ ຢ່າງຫນ້ອຍ 01 ແມັດ ຂຶ້ນໄປ; 4) ຕ້ອງຮັກສາມາລະຍາດໃນການໄອ-ຈາມ ແລະ ຖິ້ມຂີ້ເຫຍື້ອ ຕາມບ່ອນທີ່ຮ້ານກໍານົດໄວ້.

ພາບປະກອບ

4 ສະຖານທີ່ 1) ຕ້ອງໃຫ້ມີອາກາດຖ່າຍເທດີ ແລະ ບໍ່ແອອັດ; 2) ການຈັດສະຖານທີ່ຕ້ອງຮັກສາໄລຍະຫ່າງ ຢ່າງຫນ້ອຍ 01 ແມັດ ຂື້ນໄປ; 3) ຕ້ອງອະນາໄມທຸກມື້ (ເຊົ້າ ແລະ ແລງ) ເປັນຕົ້ນ: ພື້ນ, ຝາ, ເພດານ, ໂຕະ, ຕັ່ງ, ຫ້ອງນ້ໍາ ດ້ວຍນ້ໍາຢາຂ້າເຊື້ອໂຊດຽມຮາຍໂປກູ້ຣິດ (Sodium Hypochlorite) 0,1%, ນ້ໍາແຟບ, ໄຮເຕີ ຫຼື ເຫຼົ້າ 70% ຂື້ນໄປ ແລະ ອື່ນໆ; 4) ກໍານົດໃຫ້ມີທາງອອກ ແລະ ທາງເຂົ້າ ຢ່າງຈະແຈ້ງ; 5) ບໍລິເວນໂຕະຈ່າຍເງິນ ຕ້ອງມີເຈວລ້າງມື ຫຼື ເຫຼົ້າສໍາລັບອະນາໄມຂ້າເຊື້ອ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ