ຊົມເຊີຍ! ກອງທຶນຮ່ວມໃຈ ທະນາຄານຮ່ວມພັດທະນາ ມອບເຄື່ອງຊ່ວຍເຫຼືອມູນຄ່າ 250 ລ້ານກີບ ໃຫ້ໂຮງໝໍມິດຕະພາບ - Laoedaily

ຊົມເຊີຍ! ກອງທຶນຮ່ວມໃຈ ທະນາຄານຮ່ວມພັດທະນາ ມອບເຄື່ອງຊ່ວຍເຫຼືອມູນຄ່າ 250 ລ້ານກີບ ໃຫ້ໂຮງໝໍມິດຕະພາບ

ກອງທຶນຮ່ວມໃຈ ທະນາຄານຮ່ວມພັດທະນາ ຫຼື JDB ໄດ້ມອບເຄື່ອງຊ່ວຍເຫຼືອອຸປະກອນການແພດ, ຢາປິ່ນປົວພະຍາດໂຄວິດ-19 ແລະ ເງິນສົດ ໃຫ້ໂຮງໝໍມິດຕະພາບ ລວມມູນຄ່າທັງໝົດ 250.000,000 ກີບ ປະກອບມີ: ເຄື່ອງແທກອຸນຫະພູມຈໍານວນ 20 ເຄື່ອງ ມູນຄ່າ 20 ລ້ານກີບ, ຢາປົວພະຍາດໂຄວິດ-19 ຈໍານວນ 10 ຊຸດ ມູນຄ່າ 180 ລ້ານກີບ ພ້ອມດ້ວຍ ເງີນສົດຈໍານວນ 50 ລ້ານກີບ ຈາກກອງທຶນຮ່ວມໃຈຂອງທະນາຄານຮ່ວມພັດທະນາ ເພື່ອເປັນການປະກອບສ່ວນໃຫ້ລັດຖະບານນໍາໃຊ້ເຂົ້າໃນການປ້ອງກັນການລະບາດຂອງພະຍາດໂຄວິດ-19.

ກ່າວມອບໂດຍ ທ່ານ ເອກະພັນ ພະພິທັກ ປະທານສະພາບໍລິຫານ ທະນາຄານຮ່ວມພັດທະນາ JDB ພ້ອມດ້ວຍຄະນະຜູ້ບໍລິຫານ ແລະ ກ່າວຮັບໂດຍ ທ່ານ ດຣ. ສະໜອງ ທອງຊະນະ ຜູ້ອໍານວຍການໂຮງໝໍມິດຕະພາບ ໂດຍໃຫ້ກຽດເຂົາຮ່ວມ ມີ ທ່ານ ຮສ. ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ແລະ ບັນດາທ່ານໝໍ ກໍ່ໄດ້ເຂົ້າຮ່ວມເປັນສັກຂີພະຍານ.

ໃນໄລຍະທີ່ຜ່ານມາ, ທະນາຄານຮ່ວມພັດທະນາ JDB ກໍ່ໄດ້ປະກອບສ່ວນໃຫ້ໃຫ້ຄະນະສະເພາະກິດ ມູນຄ່າ 50 ລ້ານກີບ, ຊ່ວຍເຫຼືອແຂວງຈໍາປາສັກ ມູນຄ່າ 100 ລ້ານກີບ, ຊ່ວຍເຫຼືອພະແນກສາທາລະນະສຸກແຂວງຫຼວງພະບາງ ມູນຄ່າ 30 ລ້ານກີບ ແລະ ຊ່ວຍເຫຼືອມະຫາວິທະຍາໄລ ແຫ່ງຊາດ ( ມຊ ) ນັກສຶກສາລາວ ແລະ ນັກສຶກສາຕ່າງປະເທດ ທີ່ຢູ່ຫໍພັກຊີເກມມູນຄ່າ 15 ລ້ານກີບ.

ໂອກາດນີ້ ທ່ານ ຮສ. ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ໄດ້ມີຄໍາເຫັນໃນພິທີດັ່ງກ່າວ ເຊິ່ງທ່ານໄດ້ສະແດງຄວາມຂອບໃຈມາຍັງທະນາຄານຮ່ວມພັດທະນາ ທີ່ໄດ້ຊ່ວຍເຫຼືອໃນຄັ້ງນີ້ ເປັນການປະກອບສ່ວນອັນມີຄຸນຄ່າ ແລະ ໃຫຍ່ຫຼວງໃນການຊ່ວຍເຫຼືອສັງຄົມລາວ ເວົ້າລວມ, ເວົ້າສະເພາະ ກໍ່ຄືຊ່ວຍເຫຼືອໂຮງໝໍມິດຕະພາບ ເຄື່ອງຊ່ວຍເຫຼືອໃນຄັ້ງນີ້ຈະໄດ້ນໍາໃຊ້ເຂົ້າໃນການສະກັດກັ້ນ ແລະ ຄວບຄູມການແຜ່ລະບາດຂອງພະຍາດໂຄວິດ-19.

ຫວັງວ່າໂອກາດໜ້າຈະໄດ້ຮັບການຊ່ວຍເຫຼືອດ້ານຕ່າງໆຈາກທະນາຄານຮ່ວມພັດທະນາ JDB ຕື່ມອີກ. ພິທີດັ່ງກ່າວ, ຈັດຂຶ້ນໃນຕອນແລງວັນທີ 28 ເມສາ 2020 ຢູ່ທີ່ໂຮງໝໍມິດຕະພາບ ນະຄອນຫຼວງຫຼວງວຽງຈັນ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ