ເຈົ້າແຂວງສະຫວັນນະເຂດ ລົງຊີ້ນຳວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ຢູ່ເມືອງວິລະບູລີ - Laoedaily

ເຈົ້າແຂວງສະຫວັນນະເຂດ ລົງຊີ້ນຳວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ຢູ່ເມືອງວິລະບູລີ

ໃນວັນທີ 25 ເມສາ 2020 ນີ້ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມຄະນະ ໄດ້ເດີນທາງລົງຢ້ຽມຢາມ ແລະ ຊີ້ນຳວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກຂອງປະຊາຊົນບ້ານກາຫຼ້າຍ  ໂດຍໄດ້ຮັບການຕ້ອນຮັບຢ່າງອົບອຸ່ນຈາກ ທ່ານ ຄຳຜຸຍ ສີບຸນເຮືອງ ເຈົ້າເມືອງວິລະບູລີ ພ້ອມຄະນະການນຳ ແລະ ພາກສ່ວນຕ່າງໆທີ່ກ່ຽວຂ້ອງພາຍໃນເມືອງ.

ທ່ານເຈົ້າແຂວງສະຫວັນນະເຂດ ໄດ້ລົງຕິດຕາມເບິ່ງສະພາບການກໍ່ສ້າງພື້ນການໂຄງລ່າງຕ່າງໆ ເປັນຕົ້ນ: ການກໍ່ສ້າງເສັ້ນທາງ, ໂຮງຮຽນ, ນ້ຳລິນ ແລະ ອື່ນໆ ທີ່ເປັນເງື່່ອນໄຂສຳຄັນ ແລະ ຈຳເປັນໃນການແກ້ໄຂຄວາມທຸກຍາກຂອງປະຊາຊົນບ້ານກາຫຼ້າຍ.

ພ້ອມນີ້, ທ່ານເຈົ້າແຂວງຍັງໄດ້ມີການສອບຖາມເຖິງສະພາບຂໍ້ສະດວກ, ຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກຂອງປະຊາຊົນພາຍໃນບ້ານກາຫຼ້າຍ ເພື່ອຊອກທິດທາງແກ້ໄຂຮ່ວມກັນ ແນໃສ່ເພື່ອເຮັດໃຫ້ບ້ານດັ່ງກ່າວຫຼຸດພົ້ນອອກຈາກຄວາມທຸກຍາກໄດ້ໂດຍໄວ.

ບ້ານກາຫຼ້າຍ ເປັນບ້ານທຸກຍາກພຽງບ້ານດຽວຂອງເມືອງວິລະບູລີ ພາຍຫຼັງທີ່ເມືອງໄດ້ປະກາດເປັນເມືອງຫຼຸດພົ້ນອອກຈາກຄວາມທຸກຍາກຢ່າງເປັນທາງການໃນປີ 2015 ເປັນຕົ້ນມາ .

ໂອກາດນີ້, ທ່ານ ສັນຕິພາບ ພົມວິຫານ ຍັງໄດ້ເນັ້ນຢ້ຳໃຫ້ພໍ່ແມ່ປະຊາຊົນ ຈົ່ງພ້ອມກັນປົກປັກຮັກສາປ່າໄມ້ ໂດຍສະເພາະໃນເຂດປ່າຍອດນ້ຳເພື່ອໃຫ້ຄົງຄວາມອຸດົມສົມບູນຂອງທຳມະຊາດ, ອັນສຳຄັນແມ່ນແນໃສ່ໃຫ້ປະຊາຊົນມີນ້ຳໄດ້ໄວ້ຊົມໃຊ້ໃນຊີວິດປະຈຳວັນ.

ທ່ານ ຄຳຜຸຍ ສີບຸນເຮືອງ ໄດ້ໃຫ້ສຳພາດວ່າ: ບ້ານກາຫຼ້າຍ ເປັນບ້ານທຸກຍາກທີ່ຍັງເຫຼືອພຽງບ້ານດຽວຂອງເມືອງວິລະບູລີ, ມີ 42 ຄອບຄົວ, ມີປະຊາກອນທັງໝົດ 240 ກວ່າຄົນ ແລະ ເປັນບ້ານທີ່ຕັ້ງຢູ່ໃນເຂດຫ່າງໄກສອກຫຼີກ. ປັດຈຸບັນທາງເມືອງພວມສຸມໃສ່ການກໍ່ສ້າງພື້ນຖານໂຄງລ່າງຕ່າງໆທີ່ຈຳເປັນໃຫ້ແກ່ບ້ານດັ່ງກ່າວ ເປັນຕົ້ນແມ່ນ: ເສັ້ນທາງເຂົ້າຫາບ້ານທີ່ຄາດວ່າຈະໃຫ້ສຳເລັດໃນເດືອນພຶດສະພາ 2020 ນີ້, ການກໍ່ສ້າງໂຮງຮຽນ. ໃນນີ້, ພວກເຮົາກໍມີແຜນສຳຮອງໃນການຫາເອົານັກຮຽນທີ່ຈົບຢູ່ໃນບ້ານເພື່ອສົ່ງໄປຮຽນຄູ ແລະ ໃຫ້ກັບມາສອນຢູ່ໂຮງຮຽນແຫ່ງນີ້. ພ້ອມນັ້ນ, ກໍໄດ້ປຸກລະດົມປະຊາຊົນເຮັດນ້ຳລິນ ເຊິ່ງເປັນນ້ຳລິນເກົ່າຂອງໂຄງການ ທລຍ ເພື່ອມາຟື້ນຟູຄືນໃໝ່ ໂດຍໄດ້ກໍ່ສ້າງອ່າງ ແລະ ຕໍ່ທໍ່ຫາແຕ່ລະຄອບຄົວ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ