ການຄ້າ ປັບໃໝຜູ້ນຳເຂົ້າຜ້າອັດປາກບໍ່ຖືກຕ້ອງ ຂຶ້ນລາຄາສິນຄ້າຕາມລຳພັງໃຈເກືອບ 30 ຫົວໜ່ວຍ - Laoedaily

ການຄ້າ ປັບໃໝຜູ້ນຳເຂົ້າຜ້າອັດປາກບໍ່ຖືກຕ້ອງ ຂຶ້ນລາຄາສິນຄ້າຕາມລຳພັງໃຈເກືອບ 30 ຫົວໜ່ວຍ

ພະແນກອຸດສາຫະກຳ ແລະ ການຄ້າ ນວ ໄດ້ມີການກວດກາປັບໃໝຜູ້ນຳເຂົ້າຜ້າອັດປາກ – ດັງບໍ່ຖືກຕ້ອງ ແລະ ຂຶ້ນລາຄາສິນຄ້າຕາມລຳພັງໃຈ 29 ຫົວໜ່ວຍ; ສ່ວນຕໍ່ໜ້າຈະສືບຕໍ່ກວດກາເຂັ້ມງວດເພື່ອບໍ່ໃຫ້ມີການສວຍໂອກາດຂຶ້ນລາຄາສິນຄ້າຕາມລຳພັງໃຈ.

ໃນກອງປະຊຸມປຶກສາຫາລືການຈັດຕັ້ງປະຕິບັດວຽກງານສົ່ງເສີມທຸລະກິດຂະໜາດນ້ອຍ ແລະ ກາງ, ວຽກງານອຳນວຍ ຄວາມສະດວກທາງດ້ານການຄ້າ, ວຽກງານສະເພາະກິດຕ້ານພະຍາດໂຄວິດ – 19 ແລະ ທິດທາງແຜນການຕໍ່ໜ້າ ທີ່ຈັດຂຶ້ນຢູ່ພະແນກອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ( ອຄ.ນວ ) ໃນວັນທີ 21 ເມສາ 2020.  ທ່ານ ນາງ ວັນມະນີ ພິມມະສານ ຫົວໜ້າພະແນກ ອຄ.ນວ ໄດ້ກ່າວວ່າ: ການປະຕິບັດວຽກງານສະກັດກັ້ນການລະບາດຂອງພະຍາດໂຄວິດ – 19 ໂດຍການປະຕິບັດຕາມຄໍາສັ່ງເລກທີ 06/ນຍ, ພະແນກ ອຄ.ນວ ໄດ້ອອກຂໍ້ຕົກລົງວ່າດ້ວຍການແຕ່ງຕັ້ງຄະນະຮັບຜິດຊອບຄຸ້ມຄອງ ແລະ ກວດກາສິນຄ້າປະເພດເຄື່ອງບໍລິໂພກຢູ່ໃນນະຄອນຫຼວງວຽງຈັນ ເຊິ່ງຄະນະດັ່ງກ່າວປະກອບດ້ວຍພະນັກງານຈາກກົມການຄ້າພາຍໃນ, ພະແນກ ອຄ.ນວ ແລະ ຫ້ອງການ ອຄ ເມືອງ 6 ຕົວເມືອງ  ໂດຍສົມທົບກັບຕໍາຫຼວດເສດຖະກິດ ນວ ໄດ້ອອກແຈ້ງການວ່າດ້ວຍການແຈ້ງລາຄາສິນຄ້າ ໃນໄລຍະມີສະພາບການແຜ່ລະບາດພະຍາດໂຄວິດ – 19 ພ້ອມທັງໄດ້ອອກຂໍ້ຕົກລົງວ່າດ້ວຍການແຕ່ງຕັ້ງຄະນະສະເພາະກິດສະກັດກັ້ນ, ກັນການລະ ບາດພະຍາດໂຄວິດ – 19 ແລະ ໄດ້ແຈ້ງການໃຫ້ເຈົ້າຂອງຕະຫຼາດ, ຄະນະຈັດສັນຕະຫຼາດ 8 ຕະຫຼາດໃຫຍ່ ລາຍງານສະພາບການຊື້ – ຂາຍ, ການຄຸ້ມຄອງລາຄາສິນຄ້າ, ການສະໜອງສິນຄ້າ, ການປ້ອງກັນ ແລະ ສະກັດກັ້ນການລະບາດພະຍາດໂຄວິດ – 19 ພາຍໃນຕະຫຼາດຂອງຕົນ.

ນອກຈາກນີ້, ກໍຍັງໄດ້ລົງໃຫ້ຄໍາແນະນໍາບັນດາຕະຫຼາດໃຫ້ມີມາດຕະການປ້ອງກັນການລະບາດພະຍາດໂຄວິດ – 19 ໂດຍໃຫ້ແຕ່ລະຕະຫຼາດມີການຂ້າເຊື້ອພາຍໃນຕະຫຼາດ, ຊາວຄ້າຂາຍ ຫຼື ຜູ້ມາຊື້ – ຂາຍຕ້ອງໃສ່ຜ້າອັດປາກ – ດັງ, ເຂົ້າ – ອອກຕະຫຼາດ ຫຼື ພາຍໃນຕະຫຼາດໃຫ້ມີເຈລລ້າງມືໄວ້ບໍລິການ, ໃຫ້ປະກາດທາງໂທລະໂຄ່ງກ່ຽວກັບຄໍາສັ່ງ, ແຈ້ງການຕ່າງໆຂອງຂັ້ນເທິງ ເພື່ອໃຫ້ຊາວຄ້າຂາຍ ຫຼື ຜູ້ມາຊື້ – ຂາຍສິນຄ້າໃຫ້ຊາບ ແລະ ເຂົ້າໃຈ.

ນອກຈາກ 8 ຕະຫຼາດ   ໃຫຍ່ແລ້ວຍັງມີຕະຫຼາດອື່ນໆພາຍໃນນະຄອນຫຼວງວຽງຈັນ ແມ່ນທາງຄະນະສະເພາະກິດຂອງພະແນກ ອຄ.ນວ ໄດ້ປະສານກັບຫ້ອງການ ອຄ ເມືອງ ລົງຕິດຕາມ, ກວດກາ ແລະ ແນະນຳໃຫ້ບັນດາຕະຫຼາດເອົາໃຈໃສ່ຕິດຕາມລາຄາສິນຄ້າ, ການສະໜອງສິນຄ້າ, ມາດຕະການປ້ອງກັນການລະບາດພະຍາດໂຄວິດ – 19 ຢ່າງເຂັ້ມງວດ ແລະ ມີຄວາມຮັບປະກັນສູງຕໍ່ຜູ້ມາຊື້ – ຂາຍ ຫຼື ຊົມໃຊ້ພາຍໃນຕະຫຼາດ ໂດຍມີລາຍລະອຽດຂອງການຈັດຕັ້ງປະຕິບັດ ຄື:

1 ໄດ້ມີການລົງຕິດຕາມກວດກາລາຄາສິນຄ້າ, ການສວຍໂອກາດຂຶ້ນລາຄາສິນຄ້າ, ການກັກຕຸນສິນຄ້າ ຢູ່ບັນດາຕະຫຼາດ, ຫ້າງຮ້ານໃນ ນວ ສ່ວນຫຼາຍເຫັນວ່າມີການຂາຍສິນຄ້າຕາມລາຄາທີ່ລັດກໍານົດ ຫຼື ຂາຍສິນຄ້າໃນລາຄາຕາມກົນໄກຕະຫຼາດ, ມີລາຄາທີ່ສົມເຫດສົມຜົນບໍ່ເປັນການເອົາປຽບຜູ້ຊົມໃຊ້; ສ່ວນວຽກງານການສະໜອງສິນຄ້າໂດຍລວມແລ້ວ ການສະໜອງສິນຄ້າເຫັນວ່າສາມາດຕອບສະໜອງກັບຄວາມຕ້ອງການຂອງຕະຫຼາດ ແລະ ໄດ້ກວດກາພົບເຫັນການນຳເຂົ້າສິນຄ້າທີ່ບໍ່ມີເອກະສານອະນຸຍາດນຳເຂົ້າ ເຊັ່ນ: ຜ້າອັດປາກ – ດັງ ຈຳນວນ 5 ແກັດ, ເຈລລ້າງມື 47 ແກັດ ມີມູນຄ່າປະມານ 35 ລ້ານກວ່າກີບ ເຊິ່ງເຈົ້າໜ້າທີ່ກວດກາການຄ້າ, ພະແນກ ອຄ.ນວ ກໍໄດ້ອາຍັດມາໄວ້ ແລະ ໄດ້ປະຕິບັດການປັບໃໝຕາມລະບຽບການແລ້ວຈຶ່ງໄດ້ສົ່ງຄືນໃຫ້ເຈົ້າຂອງ ເພາະວ່າສິນຄ້າດັ່ງກ່າວໄດ້ຮັບການຢັ້ງຢືນວ່າສາມາດນໍາໃຊ້ເຂົ້າໃນການປ້ອງກັນພະຍາດໂຄວິດ – 19 ໄດ້.

ພ້ອມກວດກາເຫັນການສວຍໂອກາດຂຶ້ນລາຄາສິນຄ້າຕາມລຳພັງໃຈ ເຊິ່ງບໍ່ປະຕິບັດຕາມແຈ້ງການກຳນົດລາຄາສິນຄ້າທີ່ລັດຄວບຄຸມ ເຊັ່ນ: ຊີ້ນໝູ, ຊີ້ນງົວ, ອາຍແກ໊ສ, ໝີ່ສໍາເລັດຮູບໄດ້ທັງໝົດ 29 ຫົວໜ່ວຍ ເຊິ່ງໄດ້ເຮັດບົດບັນທຶກຕັກເຕືອນ ແລະ ປັບໃໝຕາມລະບຽບການ.

ໄດ້ປະສານສົມທົບກັບບັນດາບໍລິສັດນຳເຂົ້າ ສິນຄ້າປະເພດເຄື່ອງອຸປະໂພກ ແລະ ບໍລິໂພກ ເພື່ອກວດກາສິນຄ້າທີ່ຄ້າງສາງຈຳນວນທີ່ຍັງມີຢູ່ຕົວຈິງເປັນແຕ່ລະຊະນິດ ແລະ ຊອກຫາວິທີທາງໃນການສະໜອງໃຫ້ພຽງພໍກັບຄວາມຕ້ອງການຂອງຕະຫຼາດ; ໄດ້ແນະນຳ, ກ່າວເຕືອນ ແລະ ສຶກສາອົບຮົມຫົວໜ່ວຍທຸລະກິດຮ້ານຕົວແທນຈໍາໜ່າຍເຄື່ອງດື່ມທີ່ມີທາດເຫຼົ້າ ເປັນຕົ້ນແມ່ນຮ້ານຄ້າຂາຍຍົກ – ຂາຍຍ່ອຍທົ່ວໄປໃຫ້ປະຕິບັດຕາມແຈ້ງການຂອງກະຊວງອຸດສາຫະກໍາ ແລະ ການຄ້າ ສະບັບເລກທີ 0393/ອຄ.ກຄພນ ລົງວັນທີ 14 ເມສາ 2020 ວ່າດ້ວຍຫ້າມຈຳໜ່າຍເຫຼົ້າ, ເບຍ ແລະ ເຄື່ອງດື່ມທີ່ມີທາດເຫຼົ້າທຸກປະເພດໃນໄລຍະບຸນປີໃໝ່ລາວ ເຫັນວ່າມີຫຼາຍຫົວໜ່ວຍໄດ້ປະຕິບັດຕາມແຈ້ງການດັ່ງກ່າວ.

2 ໄດ້ລົງຕິດຕາມກວດກາ, ຊຸກຍູ້ ແລະ ອອກແຈ້ງການໃຫ້ບັນດາໂຮງງານປະຕິບັດຕາມຄໍາສັ່ງເລກທີ 06/ນຍ ຢ່າງເຂັ້ມງວດ ແລະ ໄດ້ອອກແຈ້ງການໃຫ້ບັນດາໂຮງງານທີ່ສະເໜີຂໍດຳເນີນກິດຈະການຊົ່ວຄາວ 7 ໂຮງງານ ໃຫ້ຢຸດເຊົາກິດຈະການຊົ່ວຄາວ ພ້ອມທັງໄດ້ຊຸກຍູ້ໃຫ້ໂຮງງານທີ່ສະເໜີສ້າງຕັ້ງກິດຈະການຜະລິດຜ້າອັດປາກ – ອັດດັງ 3 ໂຮງງານ ໃຫ້ເລັ່ງຂະບວນການຕິດຕັ້ງເຄື່ອງຈັກເພື່ອສາມາດຜະລິດສະໜອງໃຫ້ຕະຫຼາດຕາມຄວາມຮຽກຮ້ອງຕ້ອງການຂອງສັງຄົມໂດຍໄວ.

3 ໄດ້ປະສານຂໍ້ມູນການນໍາເຂົ້າສິນຄ້າປະເພດເຄື່ອງອຸປະໂພກ ແລະ ບໍລິໂພກ ຈາກກອງຄຸ້ມຄອງພາສີເຂດ 5, ດ່ານພາສີຂົວມິດຕະພາບ ເຊິ່ງມີຕົວເລກການນໍາເຂົ້າ ໃນໄລຍະວັນທີ 1 ຫາ 13 ເມສາ 2020 ມີມູນຄ່າທັງໝົດ 132,5 ຕື້ກວ່າກີບ ແລະ ມີລົດຂົນສົ່ງສິນຄ້າຂາເຂົ້າ 2.749 ຖ້ຽວ ແລະ ຂາອອກ 174 ຖ້ຽວ.

ສຳລັບທິດທາງໃນຕໍ່ໜ້າ:

1 ສືບຕໍ່ລົງຕິດຕາມ, ກວດກາລາຄາສິນຄ້າ, ການສະໜອງສິນຄ້າຕາມຮ້ານຄ້າ ແລະ ຕະຫຼາດ ເພື່ອບໍ່ໃຫ້ມີການສວຍໂອກາດຂຶ້ນລາຄາສິນຄ້າຕາມລຳພັງໃຈ, ກັກຕຸນສິນຄ້າເພື່ອເກັງກຳໄລ.

2 ສືບຕໍ່ລົງກວດດາບັນດາໂຮງງານອຸດສາຫະກຳ ໂດຍສົມທົບກັບຫ້ອງການອຸດສາຫະກຳ ແລະ ການຄ້າເມືອງ ເພື່ອປະຕິບັດຄຳສັ່ງເລກທີ 06/ນຍ ຢ່າງເຂັ້ມງວດ.

ກອງປະຊຸມຄັ້ງນີ້ພາຍໃຕ້ການເປັນປະທານຂອງ ທ່ານ ອາດສະພັງທອງ ສີພັນດອນ ຮອງເຈົ້າຄອງນະຄອນຫຼວງວຽງຈັນ, ມີຫົວໜ້າພະແນກ ອຄ.ນວ, ປະທານສະພາການຄ້າ ແລະ ອຸດສາຫະກຳ ນວ, ພ້ອມດ້ວຍບັນດາຂະແໜງການກ່ຽວຂ້ອງ 9 ຕົວເມືອງເຂົ້າຮ່ວມ.

ຂ່າວ: ສັນຕິ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ