ສິງກະໂປ ມີຜູ້ຕິດເຊື້ອໂຄວິດ-19 ໃນປະເທດ 9 ພັນກວ່າຄົນ - Laoedaily

ສິງກະໂປ ມີຜູ້ຕິດເຊື້ອໂຄວິດ-19 ໃນປະເທດ 9 ພັນກວ່າຄົນ

ປະເທດສິງກະໂປ ລາຍງານຈຳນວນຜູ້ຕິດເຊື້ອພະຍາດໂຄວິດ-19 ໃນປະເທດເພິ່ມຂຶ້ນ 9 ພັນກວ່າຄົນ ສ່ວນໃຫຍ່ເປັນແຮງງານຕ່າງດ້າວ.

ສຳນັກຂ່າວຕ່າງປະເທດລາຍງານຈາກປະເທດສິງກະໂປ ເມື່ອວັນອັງຄານ ທີ 21 ເມສາ ວ່າ ກະຊວງສາທາລະນະສຸກສິງກະໂປ ອອກຖະແຫຼງການ ເມື່ອວັນອັງຄານ ເປັນການລາຍງານສະພາບການໂຄວິດ-19 ໃນຮອບປະຈຳວັນ ຜ່ານມາ ວ່າ ຈຳນວນຜູ້ເສຍຊີວິດຍັງຄົງທີ່ 11 ຄົນ ແຕ່ໄດ້ຢືນຢັນມີຜູ້ປ່ວຍໃໝ່ 1.111 ຄົນ ເພິ່ມຈຳນວນຜູ້ຕິດເຊື້ອເປັນ 9.125 ຄົນ ແລະ ປິ່ນປົວເຊົາແລ້ວ 801 ຄົນ.

ທັງນີ້, ຜູ້ຕິດເຊື້ອສ່ວນໃຫຍ່ເປັນກຸ່ມແຮງງານຕ່າງດ້າວ ເຊິ່ງອາໄສຢູ່ໃນຫໍພັກແຮງງານທີ່ແອອັດ ແລະ ປັດຈຸບັນ ລັດຖະບານ ໄດ້ປະກາດໃຫ້ຫໍພັກທີ່ເປັນສະພາບແອອັດ ຢ່າງໜ້ອຍ 19 ແຫ່ງ ເປັນພື້ນທີ່ຄວບຄຸມດ້ານສາທາລະນະສຸກແລ້ວ ຂະນະດຽວກັນ ລາຍງານຂອງກະຊວງສາທາລະນະສຸກສິງກະໂປ ໄດ້ຄາດການຈຳນວນຜູ້ຕິດເຊື້ອໄວຣັສໂຄວິດ-19ໃນປະເທດຈະເພິ່ມຂຶ້ນອີກຫຼາຍ ເນື່ອງຈາກທາງການໄດ້ຂະຫຍາຍຂອບເຂດ ແລະ ເພິ່ມຄວາມເຂັ້ມງວດໃນການກວດຫາເຊື້ອ.

ຂະນະດຽວກັນ, ໄອຍະການຂອງສິງກະໂປ ໄດ້ດຳເນີນຄະດີຜູ້ຕ້ອງຫາ 3 ຄົນ ໜຶ່ງໃນນັ້ນເປັນຄົນສະຫະລັດ ໂດຍທຸກຄົນມີປະຫວັດຫາກໍ່ເດີນທາງກັບຈາກຕ່າງປະເທດ ແຕ່ລະເມີດຄຳສັ່ງກັກຕົວ 14 ວັນ. ຖ້າສານຕັດສິນວ່າມີຄວາມຜິດ ທັງ 3 ຄົນ ອາດຕ້ອງຈຳຄຸກສູງສຸດ 6 ເດືອນ, ປັບໄໝ 10 ພັນໂດລາສິງກະໂປ (ປະມານ 62,8 ລ້ານກີບ) ຫຼື ທັງຈຳທັງປັບ.

ນອກຈາກນີ້, ຄະນະກຳມະການສະເພາະກິດ ລະຫວ່າງ ກະຊວງຂອງສິງກະໂປ ເພື່ອຕອບສະໜອງວິກິດການໂຄວິດ-19 ໄດ້ລາຍງານວ່າ ເຈົ້າໜ້າທີ່ສັ່ງປັບໄໝຜູ້ລະເມີດ 9 ຄົນ ຈຳນວນ 1 ພັນໂດລາ (ປະມານ 6,28 ລ້ານກີບ) ຕໍ່ຄົນ ໂທດຖານລະເມີດມາດຕະການໄລຍະຫ່າງທາງສັງຄົມຊ້ຳເປັນຄັ້ງທີ 2.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ