ເພື່ອເປັນການສົ່ງເສີມວຽກງານ SME ພ້ອມອໍານວຍຄວາມສະດວກຕ່າງໆໃນດ້ານການຄ້າ ພະແນກອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ຈຶ່ງໄດ້ຈັດກອງປະຊຸມຫາລືການປະຕິບັດວຽກງານສົ່ງເສີມ SME, ການອຳນວຍຄວາມສະດວກການຄ້າ ແລະ ວຽກງານຕ້ານພະຍາດໂຄວິດ-19 ຂຶ້ນ.
ໃນວັນທີ 21 ເມສາ 2020 ທີ່ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ (ອຄ.ນວ) ໄດ້ຈັດກອງປະຊຸມຫາລືການຈັດຕັ້ງປະຕິບັດວຽກງານສົ່ງເສີມ SME, ວຽກງານອຳນວຍຄວາມສະດວກທາງດ້ານການຄ້າ, ວຽກງານສະເພາະກິດຕ້ານພະຍາດໂຄວິດ-19 ແລະ ທິດທາງແຜນການຕໍ່ໜ້າ ພາຍໃຕ້ການເປັນປະທານຂອງ ທ່ານ ອາດສະພັງທອງ ສີພັນດອນ ຮອງເຈົ້າຄອງນະຄອນຫຼວງວຽງຈັນ, ມີ ທ່ານ ນາງ ວັນມະນີ ພິມມະສານ ຫົວໜ້າພະແນກ ອຄ.ນວ ພ້ອມດ້ວຍບັນດາຂະແໜງການກ່ຽວຂ້ອງ 9 ຕົວເມືອງເຂົ້າຮ່ວມ.
ທ່ານ ນາງ ວັນມະນີ ພິມມະສານ ໄດ້ກ່າວບົດສະຫຼບໂດຍຫຍໍ້ ໃນການຈັດຕັ້ງປະຕິບັດວຽກງານສົ່ງເສີມ SME, ການອຳນວຍຄວາມສະດວກທາງດ້ານການຄ້າ ແລະ ວຽກງານສະເພາະກິດຕ້ານພະຍາດໂຄວິດ-19 ແລະ ທິດທາງແຜນການຕໍ່ໜ້າ ໃຫ້ປະທານກອງປະຊຸມ ແລະ ຄະນະກໍາມະການທີ່ກ່ຽວຂ້ອງຮັບຮູ້ ພ້ອມຮ່ວມປືກສາຫາລືຫາທາງແກ້ໄຂໃນຕໍ່ໜ້າ.
