ຂ່າວດີມື້ທີ6! ສປປ ລາວ ບໍ່ພົບຜູ້ຕິດເຊື້ອໂຄວິດເພີ່ມ ແຕ່ກໍ່ຍັງຕ້ອງເຝົ້າລະວັງຢ່າງເຂັ້ມງວດ

17

ຂ່າວດີມື້ທີ 6 ທີ່ຫຼາຍຄົນລໍຖ້າຟັງ ມື້ນີ້ ວັນທີ 18 ເມສາ 2020 ກະຊວງສາທາລະນະສຸກອອກມາຢືນຢັນ ບໍ່ພົບຜູ້ຕິດເຊື້ອໂຄວິດ-19 ເພີ່ມ ຈາກການເກັບຕົວຢ່າງມາກວດ 27ຄົນ, ເຮັດໃຫ້ຍອດຍັງຄົງທີ່ 19 ກໍລະນີ.

ໃນວັນທີ 18 ເມສາ 2020 ທີ່ກະຊວງສາທາລະນະສຸກ ໄດ້ມີພິທີຖະແຫຼງຂ່າວລາຍງານສະພາບການລະບາດຂອງພະຍາດໂຄວິດ-19 ໃນ ສປປ ລາວ ໂດຍການຖະແຫຼງຂອງທ່ານ ຮສ.ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ພ້ອມດ້ວຍຄະນະ ແລະ ສື່ມວນຊົນຈາກຫຼາຍພາກສ່ວນເຂົ້າຮ່ວມ.

ທ່ານ ຮສ. ດຣ ພູທອນ ເມືອງປາກ ໃຫ້ຮູ້ວ່າ: ໃນວັນທີ 17 ເມສາ 2020, ໄດ້ເກັບຕົວຢ່າງມາກວດທັງໝົດ 27 ຄົນ, ໃນນີ້ມີ ນະຄອນຫຼວງວຽງຈັນ 23 ຄົນ, ຫຼວງພະບາງ 1 ຄົນ, ສະຫວັນນະເຂດ 3 ຄົນ (ທັງ 3 ຄົນແມ່ນແຮງງານລາວທີ່ກັບມາແຕ່ໄທ). ຜົນກວດທັງໝົດ 17 ກໍລະນີ ບໍ່ພົບເຊື້ອ, ໝາຍຄວາມວ່າໃນວັນທີ 17 ເມສາ 2020 ບໍ່ມີກໍລະນີໃໝ່.

Slide
Slide
Slide

ສ່ວນຜູ້ທີ່ຢູ່ໃນກຸ່ມກໍລະນີສົງໄສ ນັບແຕ່ເດືອນມັງກອນຮອດວັນທີ 17 ເມສາ 2020 ໄດ້ເກັບຕົວຢ່າງມາກວດທັງ ໝົດ ມີ 1.318 ຄົນ, ກວດພົບເຊື້ອທັງໝົດ 19 ຄົນ. ຈໍານວນຜູ້ສໍາຜັດໃກ້ຊິດທັງໝົດ ທີ່ໄດ້ຕິດຕາມ ແຕ່ວັນທີ 9 ມີນາ – 17 ເມສາ 2020 ມີທັງໝົດ 313 ຄົນ, ໝົດກໍານົດຕິດຕາມ ທັງໝົດ 263 ຄົນ, ຍັງສືບຕໍ່ຕິດຕາມທັງໝົດ 50 ຄົນ, ໃນນີ້ ຢູ່ນະຄອນຫຼວງວຽງຈັນ 24 ຄົນ (ໃນນັ້ນ 13 ຄົນ ແມ່ນຕິດຕາມຢູ່ໂຮງໝໍ 103, ຕິດຕາມຢູ່ເຮືອນ 10 ຄົນ ແລະ ອີກ 1 ຄົນ ແມ່ນຕິດຕາມຢູ່ເຮືອນສວນ (ໂດຍສະເລ່ຍຍັງອີກ 7ມື້ ຈີ່ງຄົບກຳນົດຕິດຕາມ 14 ວັນ); ຢູ່ແຂວງ ໄຊສົມບູນ 26 ຄົນ ທັງໝົດຕິດຕາມຢູ່ແຄ້ມພູຄຳ (ຍັງອີກ 1 ມື້ຈະໝົດກຳນົດ).

ດ້ານການຕິດຕາມປິ່ນປົວຜູ້ປ່ວຍຢູ່ໂຮງໝໍ ປັດຈຸບັນຍັງມີຜູ້ຕິດເຊື້ອນອນຢູ່ໂຮງໝໍ 17 ຄົນ; ຈຳນວນ 3 ຄົນຢູ່ໂຮງໝໍແຂວງຫຼວງພະບາງ ເຫັນວ່າມີອາການຄົງຕົວ ຂັ້ນເບົາບາງ ຍັງຕິດຕາມການກວດຫາເຊື້ອເພື່ອຢັ້ງຢືນ. ສ່ວນຈຳນວນ 14 ຄົນຢູ່ໂຮງໝໍມິດຕະພາບ ທັງໝົດເຫັນວ່າ ມີອາການເບົາບາງ ແລະ ຍັງຕິດຕາມການກວດຫາເຊື້ອເພື່ອຢັ້ງຢືນ.

ທ່ານ ຮສ.ດຣ ພູທອນ ເມືອງປາກ ກ່າວຕື່ມວ່າ: ເຖິງແມ່ນວ່າສະພາບການຕິດເຊື້ອຢູ່ປະເທດຂອງເຮົາ ໄດ້ເວັ້ນໄລຍະຫ່າງມາໄດ້ 6 ວັນແລ້ວ ຜູ້ຕິດເຊື້ອປິ່ນປົວຢູ່ໂຮງໝໍ ກໍ່ໄດ້ອອກໂຮງໝໍ 2 ຄົນແລ້ວ ແຕ່ພວກເຮົາ ຈະບໍ່ໄດ້ລົດລະການເຝົ້າລະວັງ ຕິດຕາມຄົ້ນຫາ ຜູ້ສົງໄສທີ່ຈະຕິດເຊື້ອ ໂດຍສະເພາະຜູ້ທີ່ຍັງຈຳກັດບໍລິເວນຕົນເອງຢູ່ສູນ ແລະ ຢູ່ເຮືອນ ລວມທັງຜູ້ເດີນທາງຜ່ານຊາຍແດນເຂົ້າມາໃໝ່ ເພື່ອມາກວດວິເຄາະ ຢັ້ງຢືນພະຍາດໃຫ້ໄດ້ໄວ ແລະ ປິ່ນປົວຢ່າງທັນການ.