ແຈ້ງເປັນທາງການ ຂະຫຍາຍເວລາປ້ອງກັນພະຍາດໂຄວິດ-19 ທຸກຄົນຕ້ອງຮ່ວມປະຕິບັດ - Laoedaily

ແຈ້ງເປັນທາງການ ຂະຫຍາຍເວລາປ້ອງກັນພະຍາດໂຄວິດ-19 ທຸກຄົນຕ້ອງຮ່ວມປະຕິບັດ

ອີງຕາມແຈ້ງການ ຂອງ ຫ້ອງວ່າການສໍານັກງານນາຍົກລັດຖະມົນຕີສະບັບເລກທີ 481/ຫສນຍ ລົງວັນທີ 15 ເມສາ 2020 ກ່ຽວກັບການຕໍ່ເວລາ ແລະ ການແນະນໍາເພີ່ມເຕີມ ກ່ຽວກັບການຈັດຕັ້ງປະຕິບັດຄໍາສັ່ງຂອງນາຍົກລັດຖະມົນຕີ ສະບັບເລກທີ 06/ນຍ, ລົງວັນທີ 29 ມີນາ 2020 ວ່າດ້ວຍການເພີ່ມທະວີມາດຕະການສະກັດກັ້ນ, ກັນການລະບາດ, ຄວບຄຸມ ແລະກຽມຄວາມພ້ອມຮອບດ້ານ ເພື່ອຕ້ານພະຍາດ ໂຄວິດ-19.

ຫ້ອງວ່າການສໍານັກງານນາຍົກລັດຖະມົນຕີ ຂໍຖືເປັນກຽດແຈ້ງ ມາຍັງທ່ານ ຊາບດັ່ງນີ້: ຜ່ານການຈັດຕັ້ງປະຕິບັດ ຄໍາສັ່ງ ຂອງນາຍົກລັດຖະມົນຕີ ສະບັບເລກທີ 06/ນຍ, ລົງວັນທີ 29 ມີນາ 2020 ວ່າດ້ວຍການເພີ່ມທະວີມາດຕະການສະກັດກັ້ນ, ກັນການລະບາດ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດ ໂຄວິດ-19 ໃນໄລຍະຜ່ານມາ, ຄະນະສະເພາະໃດ, ບັນດາຂະແຫນງການທີ່ກ່ຽວຂ້ອງ, ນະຄອນຫຼວງວຽງຈັນ ແລະ ບັນດາແຂວງ ໃນຂອບເຂດທົ່ວປະເທດກໍ່ໄດ້ເອົາໃຈໃສ່ ແລະ ສຸມທຸກກໍາລັງເຂົ້າໃນການຈັດຕັ້ງປະຕິບັດຄໍາສັ່ງສະບັບດັ່ງກ່າວ ຢ່າງມີປະສິດທິຜົນດີ, ທຸກຄົນ ໃນສັງຄົມໄດ້ເຂົ້າຮ່ວມ ແລະ ຮັບຜິດຊອບ ຕາມພາລະບົດບາດຂອງຕົນເອງ ແຕ່ເທິງລົງລຸ່ມ, ສ້າງໄດ້ຂະບວນການທີ່ເປັນ ຮູບປະທໍາຢ່າງແທ້ຈິງ, ບັນດາອົງການຈັດຕັ້ງສາກົນ ແລະ ປະເທດຕ່າງໆ ກໍໄດ້ຕີລາຄາສູງວ່າ ສປປ ລາວ ມີມາດຕະຖານ ປ້ອງກັນແຕ່ຫົວທີໄດ້ດີ ຈຶ່ງສາມາດຄວບຄຸມການລະບາດ ບໍ່ໃຫ້ຂະຫຍາຍອອກສູ່ວົງກວ້າງ.

ພາບປະກອບ

ເຖິງແນວໃດກໍຕາມ ອີງຕາມການລາຍງານ ຂອງຄະນະສະເພາະກິດ, ສະພາບການແຜ່ລະບາດ ຂອງພະຍາດໂຄວິດ19 ຢູ່ຕ່າງປະເທດ ຍັງສືບຕໍ່ເພີ່ມຂຶ້ນ ແລະ ພາຍໃນ ສປປ ລາວ ພວກເຮົາ ກໍຍັງຈະມີຄວາມສ່ຽງ ແລະ ສິ່ງທ້າທາຍຈໍານວນບໍ່ຫນ້ອຍ. ສະນັ້ນ, ລັດຖະບານ ຈຶ່ງໄດ້ຕົກລົງ ແລະຊີ້ນໍາ ຄືດັ່ງນີ້:

1 ເຫັນດີໃຫ້ຕໍ່ເວລາ ໃນການຈັດຕັ້ງປະຕິບັດຕາມຄໍາສັ່ງຂອງນາຍົກລັດຖະມົນຕີ ສະບັບເລກທີ 06/ນຍ, ລົງວັນທີ 29 ມີນາ 2020, ບັນດານິຕິກໍາ, ຄໍາແນະນໍາ, ແຈ້ງການ ຂອງຄະນະສຸພະກິດໃນການປ້ອງກັນ, ສກັດກັ້ນ ແລະ ແກ້ ໄຂການລະບາດ ຂອງໂຄວິດ-19, ຫ້ອງວ່າການສໍານັກງານນາຍົກລັດຖະມົນຕີ ແລະ ຂະແຫນງການທີ່ກ່ຽວຂ້ອງ ອອກໄປຕື່ມອີກ 14 ວັນ ຈົນຮອດວັນທີ 03 ພຶດສະພາ 2020 ຢ່າງຖືກຕ້ອງ ແລະ ເຂັ້ມງວດ. ຖ້າມີການປ່ຽນແປງແນວໃດ ລັດຖະບານ ຈະແຈ້ງໃຫ້ຊາບຕາມພາຍຫຼັງ.

ພາບປະກອບ

2 ກ່ຽວກັບໄລຍະເວລາເປີດໂຮງຮຽນນັ້ນ, ໃຫ້ລໍຖ້າການປະເມີນສະພາບການລະບາດຂອງພະຍາດພາຍຫຼັງຕໍ່ເວລາ ການປະຕິບັດຄໍາສັ່ງເລກທີ 06/ນຍ ໄປຕື່ມ 14 ວັນ ກ່ອນ, ແລ້ວຈຶ່ງໃຫ້ກະຊວງສຶກສາທິການ ແລະ ກິລາ ປຶກສາຫາລືກັບ ຄະນະສະເພາະກິດໃຫ້ລະອຽດຕື່ມ, ຈາກນັ້ນ ຈຶ່ງສະເຫນີລັດຖະບານ ພິຈາລະນາຕົກລົງວ່າ ຈະເລີ່ມເປີດຮຽນແຕ່ລະຊັ້ນໄດ້ເມື່ອໃດ ເພື່ອຮັບປະກັນວ່າ ຈະບໍ່ມີຄວາມສ່ຽງຕໍ່ການຕິດເຊື້ອ ທັງສ້າງຄວາມຫມັ້ນໃຈ ແລະ ອຸ່ນອ່ຽນໃຈໃຫ້ນັກຮຽນ ກໍຄືແມ່ຜູ້ປົກຄອງ.

3 ສໍາລັບການປະຕິບັດຫນ້າທີ່ ແລະ ການຈໍາການ ຂອງພະນັກງານລັດຖະກອນ ແມ່ນໃຫ້ສືບຕໍ່ຈໍາກັດຈໍານວນ ພະນັກງານ ໄປະຈໍາການຢູ່ສໍານັກງານອົງການຄືດັ່ງຜ່ານມາ ໂດຍໃຫ້ແປງເປັນຈຸ ແລະ ຜັດປ່ຽນກັນໄປະຈໍາການ, ຜູ້ທີ່ບໍ່ ໄດ້ໄປປະຈໍາການຢູ່ສໍານັກງານອົງການ ກໍ່ໃຫ້ເຮັດວຽກຢູ່ເຮືອນ ໂດຍຕິດຕໍ່ພົວພັນ ແລະ ແກ້ວຽກຜ່ານລະບົບໂທລະສັບມືຖື ແລະ ລະບົບອອນລາຍ, ຫ້າມເດັດຂາດບໍ່ໃຫ້ສວຍໂອກາດໄປວຽກສ່ວນຕົວທາງອື່ນ ໃນໂມງລັດຖະການ ເພື່ອຮັບປະກັນ ເຮັດຫຼ້ອນຫນ້າທີ່ທີ່ການຈັດຕັ້ງໄດ້ຮັບການມອບຫມາຍໃຫ້.

ພາບປະກອບ

4 ໃຫ້ສືບຕໍ່ເພີ່ມທະວີຄວາມເຂັ້ມງວດ ໃນການປະຕິບັດມາດຕະການຕ່າງໆ ທີ່ກໍານົດໃນຄໍາສັ່ງເລກທີ 06/ນຍ ແລ້ວ, ແຕ່ເຫັນວ່າ ຜ່ານມາພາກສ່ວນຕ່າງໆ ຍັງບໍ່ທັນປະຕິບັດໄດ້ດີເທົ່າທີ່ຄວນ ເປັນຕົ້ນ:

ມາດຕະການຫ້າມອອກຈາກເຮືອນ ຫຼື ບ່ອນພັກອາໄສ, ຫ້າມໄປເຂດທີ່ມີຄວາມສ່ຽງໃນການຕິດເຊື້ອ. ສ່ວນ ການໄປທໍາການຜະລິດກະສິກໍາ, ໄປນາ, ໄປສວນ ແລະ ໄປທໍາມາຫາກິນຂອງປະຊົນ ແມ່ນສາມາດໄປໄດ້, ແຕ່ໃຫ້ອໍານາດ ການປົກຄອງບ້ານ ເປັນຜູ້ຄຸ້ມຄອງ ຢ່າງຮັດກຸມ ເພື່ອຫຼີກລ່ຽງຄວາມສ່ຽງໃນການຕິດເຊື້ອ.

ມາດຕະການຫ້າມການຊຸມແຊວ ທີ່ມີຈໍານວນຄົນເກີນ 10 ຄົນຂຶ້ນໄປ ແລະ ການຈັດງານທຸກປະເພດ.

5 ໃຫ້ຄະນະສະເພາະກິດ, ບັນດາຂະແຫນງການທີ່ກ່ຽວຂ້ອງ, ນະຄອນຫຼວງວຽງຈັນ ແລະ ບັນດາແຂວງ ໃນຂອບ ເຂດທົ່ວປະເທດ ເອົາໃຈໃສ່ເປັນພິເສດຕໍ່ການຈັດຕັ້ງປະຕິບັດບາງວຽກງານຈໍານວນຫນຶ່ງ ຕາມທີ່ໄດ້ລະບຸໄວ້ໃນຄໍາສັ່ງ ຂອງນາຍົກລັດຖະມົນຕີ ສະບັບເລກທີ 06/ນຍ, ແຈ້ງການແນະນໍາເພີ່ມເຕີມໃນການປະຕິບັດຄໍາສັ່ງດັ່ງກ່າວ ຂອງຫ້ອງວ່າການ ສໍານັກງານນາຍົກລັດຖະມົນຕີ ສະບັບເລກທີ 461/ຫສນຍ, ລົງວັນທີ 8 ເມສາ 2020 ແລະ ນິຕິກໍາແນະນໍາ ຂອງຄະນະ ສະເພາະກິດ ແລະ ຂະແຫນງການທີ່ກ່ຽວຂ້ອງວາງອອກ ໃນໄລຍະຜ່ານມາ ເຊັ່ນ: ວຽກງານການຄຸ້ມຄອງລາຄາສິນຄ້າ, ວຽກງານການສົ່ງເສີມການຜະລິດກະສິກໍາເປັນສິນຄ້າ ໂດຍສະເພາະການຜະລິດສະບຽງອາຫານ, ວຽກງານການຂົນສົ່ງສິນຄ້າ ຜ່ານແດນ ແລະ ຂົນສົ່ງສິນຄ້າລະຫວ່າງແຂວງຕໍ່ແຂວງ, ເມືອງຕໍ່ເມືອງ, ວຽກງານການຄຸ້ມຄອງແຮງງານ ທີ່ກັບມາຈາກ ຕ່າງປະເທດ ແລະ ວຽກງານການໂຄສະນາເຜີຍແຜ່ຂໍ້ມູນຂ່າວສານ ເພື່ອຕອບໂຕ້ ແລະ ຕີຖອຍ ຂ່າວລວງ, ຂ່າວອະກຸສົນ ແລະ ຂ່າວປັ່ນປ່ວນ.

ພາບປະກອບ

6 ກ່ຽວກັບການຮັບເອົາການຊ່ວຍເຫຼືອຈາກຕ່າງປະເທດນັ້ນ ໃຫ້ຄະນະເພາະກິດ ແລະ ຂະແຫນງການກ່ຽວຂ້ອງ ສືບຕໍ່ຈັດຕັ້ງປະຕິບັດຕາມທິດຊີ້ນໍາ ຂອງລັດຖະບານ ທີ່ລະບຸໃນຂໍ້ທີ 6 ຂອງແຈ້ງການຫ້ອງວ່າການສໍານັກງານນາຍົກລັດຖະມົນຕີ ສະບັບສະບັບເລກທີ 461/ຫສນຍ, ລົງວັນທີ 8 ເມສາ 2020 ໂດຍໃຫ້ອີງໃສ່ຄວາມຕ້ອງການຕົວຈິງຂອງປະເທດ.

7 ເຫັນດີໃຫ້ມີການໂຍະຍານບາງມາດຕະການທີ່ ຕິດພັນກັບການເຄື່ອນໄຫວ ຂອງພາກທຸລະກິດ ໂດຍສະເພາະ ແມ່ນບັນດາໂຄງການ ຫຼື ກິດຈະການ ທີ່ມີຄວາມຈໍາເປັນຈໍານວນຫນຶ່ງ ເພື່ອເປັນການຫຼຸດຜ່ອນຜົນກະທົບຈາກການຕໍ່ເວລາ ການຈັດຕັ້ງປະຕິບັດຄໍາສັ່ງເລກທີ 06/ນຍ ຕໍ່ເສດຖະກິດຂອງລາວ, ແຕ່ຕ້ອງບົນພື້ນຖານມີຄວາມຮັບປະກັນບໍ່ໃຫ້ມີຄວາມສ່ຽງໃນການຕິດເຊື້ອ. ສະນັ້ນ, ຈຶ່ງເຫັນຄວນມອບໃຫ້ຄະນະສະເພາະກິດ ທັງສອງຄະນະ ແລະ ຂະແຫນງການກ່ຽວຂ້ອງ ຮີບຮ້ອນສົມທົບກັນກຳນົດເງື່ອນໄຂ ແລະ ມາດຕະການປ້ອງກັນຄວາມສ່ຽງຕ່າງໆ ໂດຍໃຫ້ສ້າງເປັນນິຕິກຳແນະນຳ ຢ່າງລະອຽດ ສຳລັບນະໂຍບາຍຕົວຈິງ ແມ່ນໃຫ້ລົງກວດກາເປັນແຕ່ລະກໍລະນີ, ຖ້າກໍລະນີໃດປະຕິບັດຖືກຕ້ອງຕາມເງື່ອນໄຂ ແລະ ມາດຕະຖານທີ່ຄະນະສະເພາະກິດວາງອອກ ຈຶ່ງອະນຸຍາດໃຫ້ເຄື່ອນໄຫວ.

8 ເຫັນດີໃຫ້ປະຕິບັດນະໂຍບາຍເງິນອູດໜູນໃຫ້ພະນັກງານແພດໝໍ, ເຈົ້າໜ້າທີ ປກສ-ປກຊ ແລະ ປະນັກງານລັດຖະກອນ ທີ່ປະຕິບັດໜ້າທີ່ຕົວຈິງ ໃນການປ້ອງກັນ ແລະ ຮັບມືກັບການລະບາດ ພະຍາດໂຄວິດ-19 ຕາມຄວາມເໝາະສົມສົມ ໂດຍສອດຄ່ອງກັບລະບຽບການເພື່ອເປັນການໃຫ້ກຳລັງໃຈແກ່ບຸກຄົນເຫຼົ່ານັ້ນ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ