ໃຫ້ສະໜາມກ໊ອຟທົ່ວປະເທດ ປິດກິດຈະການຊົ່ວຄາວ - Laoedaily

ໃຫ້ສະໜາມກ໊ອຟທົ່ວປະເທດ ປິດກິດຈະການຊົ່ວຄາວ

ເຖິງວ່າການຕີກັອບຈະບໍ່ມີຄົນຈຳນວນຫຼາຍເຂົ້າຮ່ວມ ຖ້າທຽບໃສ່ກິລາປະເພດອື່ນ ແຕ່ເພື່ອເປັນການປ້ອງກັນ, ສະກັດກັ້ນ ແລະ ຕ້ານການແຜ່ລະບາດຂອງພະຍາດ ໂຄວິດ-19 ບໍ່ໃຫ້ແຜ່ລາມເປັນວົງກວ້າງ ກະຊວງສຶກສາທິການ ແລະ ກິລາ ຈິ່ງໄດ້ອອກແຈ້ງການສະບັບເລກທີ 1153/ຫກ ລົງວັນທີ 12 ເມສາ 2020 ໃຫ້ບັນດາ ສະຫນາມກິລາກ໊ອຟ, ສະຫນາມຝຶກຊ້ອມຕີກ໊ອຟໃນຂອບເຂດທົ່ວປະເທດ ປິດບໍລິການຊົ່ວຄາວ.

ພາບປະກອບ

ຫ້ອງການກະຊວງສຶກສາທິການ ແລະ ກິລາ ຂໍຖືເປັນກຽດແຈ້ງມາຍັງ ບັນດາຜູ້ປະກອບການ ສະຫນາມກິລາ ກ້ອຟ ແລະ ສະຫນາມຝຶກຊ້ອມຕີກ້ອຟ (ສະຫນາມໄດຣກັອຟ) ໃນຂອບເຂດທົ່ວປະເທດໃຫ້ຊາບວ່າ ເພື່ອເປັນການຜັນຂະຫຍາຍການຈັດຕັ້ງປະຕິບັດຄໍາສັງ 06/ນຍ, ລົງວັນທີ 29 ມີນາ 2020 ແລະ ແຈ້ງການຂອງລັດຖະມົນຕີ ກະຊວງສຶກສາທິການ ແລະ ກິລາ ສະບັບເລກທີ 400/ສສກ, ລົງວັນທີ 30 ມີນາ 2020, ຂໍ້ 5: ວ່າດ້ວຍການຫ້າມ ເຄື່ອນໄຫວທຸລະກິດກິລາກາຍຍະກໍາທຸກຮູບແບບເຊັ່ນ: ສູນອອກກໍາລັງກາຍ, ສະຫນຸກເກີ, ສັງວຽນໄກ່, ເດີ່ນກິລາ ກາງແຈ້ງ ແລະ ໃນຮົ່ມ, ການໃຫ້ບໍລິການ ແລະ ຝຶກຊ້ອມນັກກິລາຂອງແຕ່ລະສະຫະພັນ ແລະ ອື່ນໆ.

ພາບປະກອບ

ເພື່ອເປັນການປ້ອງກັນ, ສະກັດກັ້ນ ແລະ ຮັບມືກັບການແຜ່ລະບາດຂອງພະຍາດ ໂຄວິດ-19 ໃຫ້ໄດ້ຮັບຜົນສໍາ ເລັດຢ່າງມີປະສິດທິພາບ ແລະ ປະສິດທິຜົນ, ຫ້ອງການກະຊວງສຶກສາທິການ ແລະ ກິລາ ອອກແຈ້ງການເພີ່ມເຕີມ ດັ່ງນີ້:

ພາບປະກອບ

1 ໃຫ້ບັນດາຜູ້ປະກອບການສະຫນາມກີລາກ໊ອຟ, ສະຫນາມຝຶກຊ້ອມຕີກ້ອຟ ໃນຂອບເຂດທົ່ວປະເທດປິດການບໍລິການຊົ່ວຄາວ ສະຫນາມກີລາກ໊ອຟ ແລະ ສະຫນາມຝຶກຊ້ອມຕີກ້ອຟ.

ພາບປະກອບ

2 ສໍາລັບບາງສະຫນາມກີລາກ໊ອຟ ທີ່ລວມມີກິດຈະການໂຮງແຮມ, ຣີສອດ ແລະ ຮ້ານອາຫານນັ້ນ ແມ່ນອະນຸຍາດໃຫ້ເປີດບໍລິການສະເພາະໃນພາກສ່ວນ ທີ່ກ່ຽວຂ້ອງກັບທີ່ພັກອາໄສ ແລະ ຮ້ານອາຫານເທົ່າ ນັ້ນ, ສະຖານທີ ທີ່ອະນຸຍາດໃຫ້ເປີດນີ້ ຕ້ອງປະຕິບັດຕາມມາດຕະການປ້ອງກັນ ທິຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດ COVID-19 ວາງອອກຢ່າງເຂັ້ມງວດ, ພ້ອມທັງໃຫ້ຈັດຕັ້ງໃຫ້ພະນັກງານຜັດປ່ຽນກັນມາເຮັດວຽກ ເພື່ອຫລຸດຜ່ອນຄວາມແອອັດ.

ພາບປະກອບ

3 ໃຫ້ກົມກິລາລະດັບສູງ, ກະຊວງສຶກສາທິການ ແລະ ກິລາ ປະສານສົມທົບກັບ ສະຫະພັນກີລາກ໊ອຟ ແຫ່ງຊາດ ຈັດຕັ້ງໂຄສະນາເຜີຍແຜ່, ອະທິບາຍເນື້ອໃນຈິດໃຈແຈ້ງການສະບັບນີ້ ໃຫ້ຜູ້ປະກອບການສະຫນາມກີລາກ໊ອຟ, ສະຫນາມຝຶກຊ້ອມຕີກ໊ອຟໃຫ້ເຂົ້າໃຈ ແລະ ຮ່ວມມືຈັດຕັ້ງປະຕິບັດຢ່າງເຂັ້ມງວດ.

ພາບປະກອບ
ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ