12 ເມສາ! ພົບຜູ້ຕິດເຊື້ອໂຄວິດ-19 ເພີ່ມອີກ 1ຄົນ ມີປະຫວັດໃກ້ຊິດກັບກໍລະນີ 16 - Laoedaily

12 ເມສາ! ພົບຜູ້ຕິດເຊື້ອໂຄວິດ-19 ເພີ່ມອີກ 1ຄົນ ມີປະຫວັດໃກ້ຊິດກັບກໍລະນີ 16

ວັນທີ 12 ເມສາ 2020 ສາທາຢືນຢັນ ພົບຜູ້ຕິດເຊື້ອໂຄວິດເພີ່ມອີກ 1ຄົນ ເພດຊາຍ ມີປະຫວັດພົວພັນໃກ້ຊິດກັບກໍລະນີທີ 16 ເຮັດໃຫ້ປັດຈຸບັນຍອດລວມຜູ້ຕິດເຊື້ອໃນລາວມີທັງມົດ 19 ຄົນ.

ໃນວັນທີ 12 ເມສາ 2020 ເວລາ 14:30ໂມງ, ທີ່ສູນປະຕິບັດງານ ຄະນະສະເພະກິດ ຄວບຄຸມພະຍາດໂຄວິດ-19, ກະຊວງສາທາລະນະສຸກ ທ່ານ ຮສ ດຣ. ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ຜູ້ປະຈຳການຄະນະສະເພາະກິດຄວບຄຸມພະຍາດໂຄວິດ-19 ພ້ອມດ້ວຍຄະນະໄດ້ຖະແຫຼ່ງຂ່າວ ກ່ຽວກັບສະພາບການລະບາດຂອງພະຍາດໂຄວິດ-19 ໃນ ສປປ ລາວ ໂດຍມີສື່ມວນຊົນຈາກຫຼາຍພາກສ່ວນເຂົ້າຮ່ວມ.

ທ່ານ ຮສ.ດຣ ພູທອນ ເມືອງປາກ ໃຫ້ຮູ້ວ່າ: ການເຝົ້າລະວັງ ໂຄວິດ-19 ປະຈຳດ່ານ ໃນ ສປປ ລາວ ຮອດ 5 ໂມງແລງ ຂອງວັນທີ 11 ເມສາ 2020 ຕາມດ່ານຊາຍແດນ ແລະ ສະໜາມບິນສາກົນ ມີຈໍານວນຜູ້ເດີນທາງເຂົ້າມາ ມີທັງໝົດ 1.678 ຄົນ; ຜູ້ເດີນທາງ ຜ່ານ ດ່ານລາວ-ໄທ ທັງໝົດ 842 ຄົນ, ໃນນັ້ນ ມີແຮງງານລາວ ທີ່ກັບມາແຕ່ໄທ 28 ຄົນ ເຫຼືອນັ້ນແມ່ນ ຄົນຂັບລົດບັນທຸກຂົນສິນຄ້າ; ຜູ້ເດີນທາງຜ່ານດ່ານລາວ-ຈີນ ທັງໝົດ 290 ຄົນ, ທັງໝົດ ແມ່ນພະນັກງານຂັບລົດບັນທຸກຂົນສິນຄ້າ; ຜູ້ເດີນທາງ ຜ່ານ ດ່ານລາວ-ຫວຽດ ທັງໝົດ 546 ຄົນ, ທັງໝົດແມ່ນພະນັກງານຂັບລົດບັນທຸກຂົນສິນຄ້າ; ຜູ້ເດີນທາງ ຜ່ານ ສະໜາມບິນ 00 ຄົນ. ໃນທຸກດ່ານ ແມ່ນໄດ້ກວດວັດອຸນຫະພູມຮ່າງກາຍ ແລະ ບໍ່ມີຄົນເປັນໄຂ້.

ສຳລັບການເຝົ້າລະວັງ ແລະ ວິເຄາະໃນວັນທີ 11 ເມສາ 2020, ໄດ້ເກັບຕົວຢ່າງມາກວດທັງໝົດ 46 ຄົນ, ໃນນັ້ນ ມີຜູ້ສຳຜັດໃກ້ຊິດກັບຜູ້ຕິດເຊື້ອ 18 ຄົນ, ກໍລະນີມີອາການສົງໄສ 28 ຄົນ, ແຮງງານລາວ ທີ່ກັບມາແຕ່ໄທ 0 ຄົນ. ໃນຈຳນວນ 46 ຄົນທີ່ມາກວດນັ້ນ ມີນະຄອນຫຼວງວຽງຈັນ 32 ຄົນ ແລະ ຕ່າງແຂວງ 14 ຄົນ, ເຊິ່ງຜົນກວດທັງໝົດ ແມ່ນພົບເຊື້ອ 01 ກໍລະນີ ເຊິ່ງແມ່ນຜູ້ສຳຜັດໃກ້ຊິດກັບກໍລະນີທີ 16, ເຮັດໃຫ້ຍອດລວມຜູ້ຕິດເຊື້ອໃນລາວເພີ່ມເປັນ 19ຄົນ.

ປະຫວັດການເຄື່ອນໄຫວຂອງກໍລະນີທີ 19: ເພດຊາຍ ອາຍຸ 21 ປີ, ອາຊີບ ນັກສຶກສາ, ບ້ານ ໂພນປ່າເປົ້າ, ເມືອງສີສັດຕະນາກ, ນະຄອນຫຼວງວຽງຈັນມີດັ່ງນິ້:

-ຜູ້ກ່ຽວໄດ້ພັກຢູ່ຫ້ອງດຽວກັນກັບຜູ້ຕິດເຊື້ອກໍລະນີທີ 16 ຕັ້ງແຕ່ວັນທີ 27 ມີນາ 2020 ຫາ 08 ເມສາ 2020

-ໃນຊ່ວງວັນທີ 29 ມີນາ ແລະ ວັນທີ 04 ເມສາ ໄດ້ມີການຊຸມແຊວກັນ ເປັນໄລຍະກັບໝູ່ຜູ້ຕິດເຊຶື້ອກໍລະນີທີ 16, 17, 18 ທີ່ຢູ່ຫ້ອງແຖວດຽວກັນ

-ວັນທີ 08 ເມສາ 2020 ຜູ້ກ່ຽວໄດ້ກັບຄືນຫ້ອງແຖວຂອງຕົນທີ່ຂຶ້ນກັບ ບ້ານ ໂພນປ່າເປົ້າ, ເມືອງສີສັດຕະນາກ, ນະຄອນຫຼວງວຽງຈັນ.

-ທີມງານໄດ້ຕິດຕໍ່ຫາຜູ້ກ່ຽວ ແລະ ແນະນຳໃຫ້ໄປກວດຢູ່ໂຮງໝໍ ມາຮອດວັນທີ 11 ເມສາ ຜູ້ກ່ຽວຈຶ່ງໄດ້ມາກວດ ແລະ ພົບວ່າຕິດເຊື້ອ COVID-19 ແລະ ໄດ້ຮັບການເຂົ້ານອນ ປິ່ນປົວຢູ່ໂຮງໝໍມິດຕະພາບ.

-ສັງລວມຜູ້ສໍາຜັດໃກ້ຊິດ ກັບກໍລະນີີທີ 19 ແມ່ນກຸ່ມຄົນດຽວກັນກັບ ກໍລະນີ16, 17, 18 ລວມມີ 13 ຄົນ, ປັດຈຸບັນ ໄດ້ເຂົ້ານອນຕິດຕາມຢູ່ ໂຮງໝໍ 103.

ດັ່ງນັ້ນ, ນັບແຕ່ເດືອນມັງກອນ ຮອດ ວັນທີ 11 ເມສາ 2020 ໄດ້ເກັບຕົວຢ່າງມາກວດ ທັງໝົດ ມີ 1.140 ຄົນ, ກວດພົບເຊື້ອທັງໝົດ 19 ຄົນ (ມື້ນີ້ມີລາຍງານເພີ່ມອີກ 01 ຄົນ) ແລະ ທັງໝົດ 19 ຄົນ ແມ່ນນອນປິ່ນປົວຕິດຕາມອາການຢູ່ໂຮງໝໍ. ສ່ວນຈໍານວນຜູ້ສໍາຜັດໃກ້ຊິດທັງໝົດ ທີ່ໄດ້ຕິດຕາມ ແຕ່ວັນທີ 23 ມີນາ – 11 ເມສາ 2020 ມີ ທັງໝົດ 429 ຄົນ, ໝົດກໍານົດຕິດຕາມ ທັງໝົດ 346 ຄົນ.

ພ້ອມນີ້ ຍັງສືບຕໍ່ຕິດຕາມທັງໝົດ 83 ຄົນ ເຊິ່ງມີລາຍລະອຽດ ດັ່ງລຸມນີ້: ນະຄອນຫຼວງວຽງຈັນ 41 ຄົນ, ແຂວງ ໄຊສົມບູນ 37 ຄົນ, ແຂວງ ຫຼວງພະບາງ 02 ຄົນ, ແຂວງ ຄຳມ່ວນ 02 ຄົນ, ແຂວງ ວຽງຈັນ 01 ຄົນ, ພະນັກງານພູເບ້ຍທີ່ຢູ່ໃນແຄ້ມ ມີທັງໝົດ 1.700 ຄົນ, ໃນນັ້ນ ຈຳນວນຜູ້ທີ່ສຳຜັດໃກ້ຊິດກັບ ຜູ້ຕິດເຊື້ອ 2 ກໍລະນີ ຢູ່ພູເບ້ຍ ມີທັງໝົດ 61 ຄົນ, ຜູ້ສຳຜັດໃກ້ຊິດ ກັບ ກໍລະນີທີ 11 ມີ 34 ຄົນ, ຜູ້ສຳຜັດໃກ້ຊິດ ກັບ ກໍລະນີທີ 13 ມີ 27 ຄົນ (ຢູ່ພູເບ້ຍ 18 ຄົນ, ນະຄອນຫຼວງ 08 ຄົນ, ແຂວງວຽງຈັນ 01 ຄົນ).

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ
error: Content is protected !!