ເຖິງເວລາກັບບ້ານແລ້ວ! ຮ່ວມສົ່ງທີມຊ່ຽວຊານແພດຈີນ ຂອບໃຈທີ່ຊ່ວຍເຫຼືອ - Laoedaily

ເຖິງເວລາກັບບ້ານແລ້ວ! ຮ່ວມສົ່ງທີມຊ່ຽວຊານແພດຈີນ ຂອບໃຈທີ່ຊ່ວຍເຫຼືອ

ເປັນເວລາ 2ອາທິດພໍດີ ທີ່ທີມຊ່ຽວຊານແພດຈາກ ສປ ຈີນ ເຂົ້າມາຊ່ວຍເຫຼືອແລກປ່ຽນບົດຮຽນໃນການຕໍ່ສູ້ກັບພະຍາດໂຄວິດ-19 ໃຫ້ແກ່ ສປປ ລາວ, ແຕ່ເນື່ອງຈາກເວລາອັນສັ້ນ ແລະ ຈໍາກັດເຫຼືອເກີນ ເຮັດໃຫ້ບໍ່ໄດ້ເນັ້ນໜັກເລື່ອງການປິ່ນປົວ, ເຖິງຢ່າງໃດກໍ່ຕາມ ມາຮອດມື້ນີ້ ວັນທີ 12 ເມສາ 2020 ຖືເປັນວາລະຄົບກໍານົດທີ່ທີມແພດດັ່ງກ່າວຕ້ອງເດີນທາງກັບ ສປ ຈີນ ໂດຍມີການນໍາຂອງລາວຮ່ວມສົ່ງທາງຢູ່ສະໜາມບິນສາກົນວັດໄຕຢ່າງສົມກຽດ.

ພາຍຫຼັງທີ່ ສປ ຈີນເລີ່ມຫຼຸດພົ້ນຈາກວິກິດໂຄວິດ-19 ບັນດາແພດໝໍຈີນແມ່ນບໍ່ໄດ້ພັກຜ່ອນນອນເຊົາເມື່ອຍແຕ່ຢ່າງໃດ ແຕ່ກົງກັນຂ້າມພວກເຂົາເດີນສາຍຊ່ວຍເຫຼືອຊາວໂລກໄປຫຼາຍປະເທດ ຄວບຄູ່ກັບການສົ່ງບຸກຄະລາກອນແພດໝໍໄປຊ່ວຍກູ້ຊີວິດແລ້ວທາງການຈີນຍັງຈັດເຄື່ອງມືອຸປະກອນການແພດພ້ອມເໝົາຍົນໄປລຳໄປສົ່ງເຖິງບ່ອນເຖິງທີ່ອີກດ້ວຍ ລວມເຖິງລາວເຮົາເອງ ເຊິ່ງທີມຊ່ຽວຊານແພດພ້ອມອຸປະກອນການແພດຊ່ວຍເຫຼືອຕ່າງທເດີນທາງມາຮອດລາວຕັ້ງແຕ່ວັນທີ 29 ມີນາ 2020.

ສໍາລັບແຜນການເຮັດວຽກຢູ່ ສປປ ລາວ ຂອງຄະນະແພດ ແລະຊ່ຽວຊານ ແມ່ນໄດ້ມາຮ່ວມເຮັດວຽກເປັນເວລາ 14ວັນ ດ້ວຍການແບ່ງປະສົບການກັບຝ່າຍລາວ ໃນການປ້ອງກັນ ແລະ ຄວບຄຸມພະຍາດດັ່ງກ່າວ, ກວດຄັດກອງຫາຜູ້ຕິດເຊື້ອ, ກວດວິເຄາະເຊື້ອພະຍາດຢູ່ຫ້ອງທົດລອງ ແລະປິ່ນປົວຄົນເຈັບ ພ້ອມທັງໄດ້ແລກປ່ຽນບົດຮຽນກັບກະຊວງສາທາລະນະສຸກ ແລະໂຮງໝໍສູນກາງຂອງ ສປປ ລາວ ລວມເຖິງທ້ອງຖິ່ນອີກ 2 ແຂວງຄື ຈຳປາສັກ ແລະຫຼວງພະບາງ.

ຕາມຂ່າວ cri ໃນໄລຍະທີ່ທີມແພດຈາກ ສປ ຈີນ ມາເຄື່ອນໄຫວວຽກຢູ່ລາວນັ້ນ ເລີ່ມຕົ້ນຈາກການປະຕິບັດວຽກງານໃນເບື້ອງຕົ້ນຢູ່ທີ່ນະຄອນຫຼວງວຽງຈັນ, ໃນວັນທີ 7 ເມສາ 2020 ຄະນະແພດຜູ້ຊ່ຽວຊານ ຈາກ ສປ ຈີນທັງ 12 ຄົນ ໄດ້ສືບຕໍ່ລົງເຄື່ອນໄຫວຢູ່ຕ່່າງແຂວງ ໂດຍໄດ້ແບ່ງເປັນ 2 ທີມເພື່ອລົງພື້ນທີ່ແຂວງຫຼວງພະບາງ ແລະ ແຂວງຈຳປາສັກ.

ການເຄື່ອນໄຫວຫຼັກກໍແມ່ນລົງສຳຫຼວດ-ປະເມີນໃນພື້ນທີ່ສ່ຽງເປັນຕົ້ນແມ່ນຂົງເຂດນະຄອນຫຼວງພະບາງ, ນະຄອນປາກເຊ ແລະອື່ນໆ ພ້ອມທັງເຂົ້າຮ່ວມປຶກສາຫາລື ແລະແລກປ່ຽນຄວາມຮູ້ວິຊາການ ກັບບຸກຄະລາກອນການແພດຝ່າຍລາວທີ່ປະຈຳຢູ່ໂຮງໝໍແຂວງ ກໍຄືບັນດາຄະນະນຳ, ເຈົ້າໜ້າທີ່ພາກສ່ວນທີ່ກ່ຽວຂ້ອງກັບວຽກງານຕ້ານການແຜ່ລະບາດຂອງພະຍາດໂຄວິດ 19.

ໜ້າວຽກຫຼັກໃນໄລຍະທີ່ຜ່ານມາຂອງທີມແພດ ແລະຜູ້ຊ່ຽວຊານ ແມ່ນລົງພື້ນທີ່ເພື່ອຕິດຕາມ, ເກັບກຳຂໍ້ມູນ ແລະສຳຫຼວດຕາມຈຸດທີ່ມີຄວາມສ່ຽງຕໍ່ການແຜ່ລະບາດຂອງພະຍາດ ໂດຍສະເພາະກໍແມ່ນບັນດາໂຮງໝໍສູນກາງທີ່ຮັບຮອງຄົນເຈັບຜູ້ຕິດເຊື້ອພະຍາດ ແລະກໍລະນີສົງໄສ ເຊັ່ນ: ໂຮງໝໍ ມິດຕະພາບ, ໂຮງໝໍ 103, ໂຮງໝໍເສດຖາທີຣາດ.

ນອກຈາກນັ້ນ, ກໍໄດ້ມີການປະຊຸມປຶກສາຫາລືກັບບັນດາເຈົ້າໜ້າທີ່ທີ່ກ່ຽວຂ້ອງ ເປັນຕົ້ນກໍແມ່ນ ກົມຄວບຄຸມພະຍາດຕິດຕໍ່, ສູນວິເຄາະ ແລະລະບາດວິທະຍາ, ກະຊວງສາທາລະນະສຸກ. ແຕ່ທັງນີ້ທັງນັ້ນ, ດ້ວຍໄລຍະເວລາອັນສັ້ນ. ສະນັ້ນ, ຈຸດປະສົງຂອງການມາປະຕິບັດພາລະກິດໃນຄັ້ງນີ້ບໍ່ແມ່ນການປິ່ນປົວຄົນເຈັບໂດຍກົງ ແຕ່ຄືການຖ່າຍທອດວິຊາການ ແລະປະສົບການແກ່ທີມແພດຝ່າຍລາວເພື່ອນຳໄປໝູນໃຊ້ໃນການປິ່ນປົວຄົນເຈັບ ເຊິ່ງຖືເປັນສິ່ງທີ່ມີຄວາມໝາຍຄວາມສຳຄັນ ແລະເປັນການຍົກລະດັບຄວາມຮູ້ຄວາມສາມາດໃຫ້ແກ່ບຸກຄະລາກອນທາງການແພດຂອງລາວ.

ເຖິງຢ່າງໃດກໍ່ຕາມ ມາຮອດມື້ນີ້ ຖືເປັນເວລາຄົບກໍານົດ 14ວັນພໍດີທີີ່ທີມແພດດັ່ງກ່າວ ໄດ້ເຂົ້າມາຊ່ວຍເຫຼືອຫຼາຍທຢ່າງແກ່ ສປປ ລາວ ແອັດມິນເອງໃນຖານະທີ່ເປັນຄົນລາວຜູ້ໜຶ່ງຂໍສະແດງຄວາມຂອບໃຈ ແລະ ຮູ້ບຸນຄຸນຢ່າງສູງຕໍ່ການຊ່ວຍເຫຼືອໃນຄັ້ງນີ້ ເຖິງແມ່ນວ່າຈະເປັນເວລາອັນສັ້ນແຕ່ມັນສະແດງເຖິງມິດຕະພາບ ໄມຕີຈິດອັນດີງາມຂອງ ສປປ ລາວ ແລະ ສປຈີນ ໂດຍສະເພາະໃນຍາມວິກິດແບບນີ້ ດັ່ງຄໍາຂວັນທີ່ວ່າ ຮ່ວມມືກັນຕ້ານພະຍາດ ຮ່ວມທຸກຮ່ວມຍາກ”.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ