ດ່ວນ! 11 ເມສາ ພົບຜູ້ຕິດເຊື້ອໂຄວິດ-19 ເພີ່ມອີກ 2​ຄົນ ບີບຍອດລວມຂຶ້ນເປັນ 18ຄົນໃນລາວ - Laoedaily

ດ່ວນ! 11 ເມສາ ພົບຜູ້ຕິດເຊື້ອໂຄວິດ-19 ເພີ່ມອີກ 2​ຄົນ ບີບຍອດລວມຂຶ້ນເປັນ 18ຄົນໃນລາວ

ເວັ້ນໃຫ້ໄດ້ຟັງຂ່າວດີພຽງ 1ມື້ ຕ້ອງພົບຂ່າວຮ້າຍອີກແລ້ວ, ໃນວັນທີ 11 ເມສາ 2020 ສາທາຢືນຢັນ ພົບຜູ້ຕິດເຊື້ອໂຄວິດ-19 ໃນລາວ ເພີ່ມອີກ 2ຄົນ ຢູ່ຫ້ອງແຖວດຽວກັນກັບກໍລະນີທີ 16 ເຮັດໃຫ້ປັດຈຸບັນຍອດລວມຜູ້ຕິດເຊື້ອໃນລາວມີທັງໝົດ 18ກໍລະນີ.

ວັນທີ 11 ເມສາ 2020 ເວລາ 14:30, ທີ່ສູນປະຕິບັດງານ ຄະນະສະເພະກິດ ຄວບຄຸມພະຍາດໂຄວິດ-19, ກະຊວງສາທາລະນະສຸກ ໄດ້ມີພິທີຖະແຫຼງຂ່າວລາຍງານສະພາບການລະບາດຂອງພະຍາດໂຄວິດ-19 ໃນ ສປປ ລາວ ໃຫ້ຮູ້ວ່າ: ໃນວັນທີ 10 ເມສາ 2020, ໄດ້ ເກັບຕົວຢ່າງມາກວດທັງໝົດ 62 ຄົນ, ໃນນັ້ນ ມີຜູ້ສຳຜັດໃກ້ຊິດ ກັບຜູ້ຕິດເຊື້ອ 21 ຄົນ, ກໍລະນີສົງໄສໃໝ່ ມີ 40 ຄົນ, ແຮງງານລາວ ທີ່ກັບມາແຕ່ໄທ 01 ຄົນ.

ໃນຈຳນວນ 62 ຄົນທີ່ມາກວດນັ້ນ ມີ ນະຄອນຫຼວງວຽງຈັນ 40 ຄົນ ແລະ ຕ່າງແຂວງ 22 ຄົນ (ຫຼວງພະບາງ 03 ຄົນ, ໄຊສົມບູນ 02 ຄົນ, ຄຳມ່ວນ 02 ຄົນ, ໄຊຍະບູລີ 03 ຄົນ, ບໍລິຄຳໄຊ 03 ຄົນ, ວຽງຈັນ 04 ຄົນ, ສະຫວັນນະເຂດ 02 ຄົນ ແລະ ສາລະວັນ 01 ຄົນ) ເຊິ່ງຜົນກວດທັງໝົດ ແມ່ນພົບເຊື້ອ 02 ກໍລະນີ, ເຊີ່ງທັັງ 02 ກໍລະນີແມ່ນຜູ້ສຳຜັດໃກ້ຊິດກັບ ກໍລະນີທີ່ 16 ໂດຍມີລາຍລະອຽດຄື:

ກໍລະນີ ທີ່ 17: ເພດຍິງ ອາຍຸ 32 ປີ, ອາຊີບ ຫວ່າງງານ, ໜ່ວຍ 01, ຢູ່ຫ້ອງແຖວ ຂື້ນກັບບ້ານໜອງດ້ວງທົ່ງ, ເມືອງສີໂຄດຕະບອງ, ນະຄອນຫຼວງວຽງຈັນ (ຢູ່ຫ້ອງແຖວ ເບີ 7). ຜູ້ກ່ຽວສໍາຜັດໃກ້ຊິດກັບກໍລະນີທີ 16 (ເພດຍິງ ອາຍຸ 23 ປີ ຢູ່ຫ້ອງແຖວດຽວກັນ, ຫ້ອງແຖວເບີ 8.

ປະຫວັດການເດີນທາງ ຫຼື ໃຊ້ຊີວິດຂອງຜູ້ກ່ຽວມີດັ່ງນີ້:

ວັນທີ 4 ເມສາ 2020 ຜູ້ກ່ຽວໄດ້ກີນເຂົ້າຮ່ວມກັບ ກໍລະນີທີ 16

ວັນທີ 5-6 ເມສາ 2020 ເຂົາເຈົ້າຍັງໄດ້ມີການພົວພັນໄປມາຫາສູ່ກັນເປັນປົກກະຕິ

ວັນທີ 7 ເມສາ 2020 ຜູ້ກ່ຽວເລີ່ມຮູ້ສຶກຄີງຮ້ອນ, ໄອແຫ້ງ ແລະ ປວດຕົນໂຕ, ໄດ້ໄປຊື້ຢາຢູ່ຮ້ານຂາຍຢາມາກິນເອງ ແລະ ຍັງໄດ້ກິນເຂົ້າກັບເພື່ອນຢູ່ຫ້ອງແຖວດຽວກັນຈໍານວນ 04 ຄົນ

ວັນທີ 08-09 ເມສາ 2020 ຍັງມີອາການບໍ່ດີຂື້ນ ແຕ່ຜູ້ກ່ຽວໄດ້ພັກຜ່ອນຢູ່ຫ້ອງແຖວ;

ວັນທີ 10 ເມສາ 2020 ພາຍຫຼັງທີ່ກໍລະນີທີ່ 16 ຖືກຢັ້ງຢືນວ່າຕິດເຊື້ອໃນວນທີ 09 ທີມງານແພດໄດ້ໂທຕິດຕໍ່ຫາຜູ້ກ່ຽວ ແລະ ສົ່ງລົດອໍາບູລັງ ໄປຮັບເອົາຜູ້ກ່ຽວມາກວດຫາເຊື້ອ ແລະ ເຂົ້ານອນຕິດຕາມ, ປິ່ນປົວ ຢູ່ໂຮງໝໍມິດຕະພາບ. ສັງລວມຜູ້ສໍາຜັດໃກ້ຊິດກັບກໍລະນີີທີ 17 ມີທັງໝົດ 6 ຄົນ (ເຊີ່ງເປັນໝູ່ຢູ່ຫ້ອງແຖວດຽວກັນ ທີ່ກີນເຂົ້າຮ່ວມກັນ ແລະ ໝູ່ທີ່ກີນເຂົ້ານຳກັນຢູ່ບ້ານສາລາຄຳ)

ກໍລະນີທີ 18: ເພດຍິງ, ອາຍຸ 32 ປີ, ອາຊີບ ຫວ່າງງານ (ເປັນໝູ່ໃກ້ຊິດໃຊ້ຊິວິດຮ່ວມກັນ ຢູ່ຫ້ອງດຽວກັນ ກັບກໍລະນີຢັ້ງຢືນຜູ້ທີ 17) ການເຄື່ອນໄຫວທັງໝົດ ແມ່ນຄືກັນ, ລົດອໍາບູລັງ ໄດ້ມາຮັບໄປໂຮງໝໍໃນເວລາດຽວກັນ.

ດັ່ງນັ້ນ, ນັບແຕ່ເດືອນມັງກອນ ຮອດ ວັນທີ 10 ເມສາ 2020 ໄດ້ເກັບຕົວຢ່າງມາກວດ ທັງໝົດ ມີ 1.094 ຄົນ, ກວດພົບເຊື້ອທັງໝົດ 18 ຄົນ (ມື້ນີ້ພົບເຊື້ອເພີ່ມອີກ 2 ຄົນ) ແລະ ທັງໝົດ 18 ຄົນ ແມ່ນນອນປິ່ນປົວຕິດຕາມອາການຢູ່ໂຮງໝໍ. ສ່ວນຈໍານວນຜູ້ສໍາຜັດໃກ້ຊິດທັງໝົດ ທີ່ໄດ້ຕິດຕາມ ແຕ່ວັນທີ 23 ມີນາ ຫາ 10 ເມສາ 2020 ມີ ທັງໝົດ 388 ຄົນ, ໝົດກໍານົດຕິດຕາມທັງໝົດ 307 ຄົນ, ຍັງສືບຕໍ່ຕິດຕາມທັງໝົດ 81 ຄົນ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ