“ ຮັກຊີວິດຢ່າຄິດອອກເຮືອນ ” ຜົນງານເພງທີ່ປຸກລະດົມໃຫ້ຄົນຢູ່ເຮືອນຕ້ານພະຍາດໂຄວິດ – 19

13

ດັ່ງທີ່ເຮົາຮູ້ກັນດີວ່າປັດຈຸບັນເປັນໄລຍະທີ່ປະເທດລາວເຮົາ ແລະ ທົ່ວໂລກຕ້ອງປະເຊີນໜ້າຕໍ່ສູ້ກັບພະຍາດຮ້າຍ “ ໂຄວິດ – 19 ” ເຊິ່ງ ໜຸ່ມໂຊນ່ານ ແຈັກເກັດ ກໍໄດ້ແຕ່ງຜົນງານເພງ “ ຮັກຊີວິດຢ່າຄິດອອກເຮືອນ ” ເພື່ອເປັນການປຸກລະດົມໃຫ້ຜູ້ຄົນຢູ່ພາຍໃນເຮືອນ, ບໍ່ອອກໄປເລາະຫຼິ້ນ ເພື່ອເປັນກໍາລັງໃຈໃຫ້ລັດຖະບານລາວ, ໜ່ວຍງານສະເພາະກິດໃນການປະຕິບັດໜ້າທີ່ເຝົ້າລະວັງ ແລະ ຄວບຄຸມພະຍາດຮ້າຍເພື່ອໃຫ້ພວກເຮົາຜ່ານພົ້ນວິກິດຮ້າຍນີ້ໄປພ້ອມໆກັນ.

ໂຊນ່ານ ແຈັກເກັດ ໃຫ້ສໍາພາດວ່າ: ສໍາລັບຜົນງານເພງ “ ຮັກຊີວິດຢ່າຄິດອອກເຮືອນ ” ເປັນອີກຜົນງານເພງໜຶ່ງທີ່ໄດ້ປະພັນຂຶ້ນມາດ້ວຍຕົນເອງ ເຊິ່ງໃຊ້ເວລາຂຽນເພງປະມານ 1 ຊົ່ວໂມງເທົ່ານັ້ນ ແລະ ໃຊ້ເວລາໃນການຜະລິດພຽງ 2 ວັນ, ຈຸດປະສົງຂອງການຜະລິດຜົນງານເພງດັ່ງກ່າວແມ່ນຍ້ອນອີງໃສ່ສະພາບບ້ານເມືອງພົບກັບພະຍາດຮ້າຍນັ້ນກໍຄືພະຍາດປອດອັກເສບຈາກເຊື້ອຈຸລະໂລກສາຍພັນໃໝ່ ຫຼື ໂຄວິດ – 19 ຈຶ່ງໄດ້ຂຽນເພງເພື່ອປຸກລະດົມຈິດໃຈຂອງປະຊາຊົນທຸກຄົນໃຫ້ຢູ່ເຮືອນ, ບໍ່ໃຫ້ອອກເຄື່ອນໄຫວ ຫຼື ອອກຈາກເຮືອນໃນໄລຍະທີ່ພະຍາດລະບາດ ເພາະຢ້ານວ່າຈະຕິດພະຍາດຮ້າຍດັ່ງກ່າວ ພ້ອມທັງອາດຈະນໍາເອົາພະຍາດມາຕິດໃສ່ກັບຄົນພາຍໃນຄອບຄົວນໍາອີກ.

Slide
Slide
Slide

ຜົນງານເພງດັ່ງກ່າວໄດ້ອອກອາກາດຜ່ານທາງຊ່ອງຢູທູບຂອງ Toeng Studio ແລະ ເພຈ໌ເຟສບຸ໊ກ Toeng Studio ໃນ 2 ວັນຜ່ານມາ ແລະ ໄດ້ປ່ອຍມິວສິກວິດີໂອປະກອບເພງໄປເປັນທີ່ຮຽບຮ້ອຍ ເຊິ່ງໃນມິວສິກວີດິໂອເພງຕົນເອງກໍເປັນຄົນຖ່າຍທໍາ, ຕັດຕໍ່ ແລະ ສະແດງດ້ວຍຕົນເອງ.

ສຸດທ້າຍກໍຂໍຝາກຜົນງານເພງ “ ຮັກຊີວິດຢ່າຄິດອອກເຮືອນ ” ໄວ້ກັບອ້ອມເອິກອ້ອມໃຈຂອງພີ່ນ້ອງຊາວລາວທຸກທ່ານ ແລະ ຢ່າລືມແຊຣ໌ເພງນີ້ເພື່ອເຕືອນສະຕິຄົນທີ່ທ່ານຮັກນໍາເດີ.

ຂ່າວ: ນຸ້ມນິ້ມ, ຮູບ: ໂຊນ່ານ ແຈັກເກັດ