ບໍລິສັດ ສິຣິ ຄອສເມຕິກ ໄດ້ມອບຜ້າອັດປາກ ຈໍານວນ 3 ພັນອັນ ໃຫ້ຄະນະແພດສາດ ມະຫາວິທະຍາໄລວິທະຍາສາດສຸຂະພາບ ( ຄພສ ) ເພື່ອຮັບໃຊ້ໃນວຽກງານຕ້ານ ແລະ ສະກັດກັ້ນພະຍາດໂຄວິດ – 19.
ພິທີມອບໄດ້ຈັດຂຶ້ນໃນວັນທີ 7 ເມສາ 2020 ຕາງໜ້າຮັບໂດຍ ທ່ານ ດຣ. ເກດສົມສຸກ ບຸບຜາວັນ ຄະນະບໍດີ ຄພສ ມອບໂດຍ ທ່ານ ນາງ ປານີ ວົງແກ້ວ ຕາງໜ້າບໍລິສັດ ແລະ ຍັງເປັນຕົວແທນຜູ້ນໍາເຂົ້າຜະລິດຕະພັນຍີ່ຫໍ້ ສິຣິ ຄອສເມຕິກ ໃນປະເທດລາວ.
ທ່ານ ດຣ. ເກດສົມສຸກ ບຸບຜາວັນ ກ່າວວ່າ: ຜ້າອັດປາກທີ່ໄດ້ຮັບໃນຄັ້ງນີ້ແມ່ນມີຄວາມຈໍາເປັນສໍາລັບນັກສຶກສາ ຄພສ ຈໍານວນ 800 ກວ່າຄົນ ທີ່ລົງປະຕິບັດຕົວຈິງໃນສະຖານທີ່ຕ່າງໆບໍ່ວ່າຈະເປັນໂຮງຮຽນ, ສູນກັກກັນ, ໂຮງໝໍ, ດ່ານສາກົນ ເພື່ອຮັບໃຊ້ເຂົ້າໃນວຽກງານວິຊາສະເພາະ ແລະ ເປັນສ່ວນໜຶ່ງທີ່ສະແດງຄວາມຮັບຜິດຊອບຕໍ່ສັງຄົມ ໃນນາມຕາງໜ້າ ຄພສ ຂໍ້ສະແດງຄວາມຂອບໃຈ ແລະ ຂໍໃຫ້ບໍລິສັດຈົ່ງມີຄວາມຈະເລີນກ້າວໜ້າຂຶ້ນໄປເລື້ອຍໆ.
ທ່ານ ນາງ ສິຣິກອນ ພັດຄົງສິນ ເຈົ້າຂອງ ບໍລິສັດ ສິຣິ ຄອສເມຕິກ ໄດ້ກ່າວວ່າ: ຂໍເປັນສ່ວນໜຶ່ງໃນການຊ່ວຍເຫຼືອສະໜັບສະໜູນໃຫ້ກຳລັງໃຈພີ່ນ້ອງ ສປປ ລາວ ຈຶ່ງໄດ້ມອບໃຫ້ ທ່ານ ນາງ ປານີ ວົງແກ້ວ ຕາງໜ້າມາເປັນຜູ້ມອບຜ້າອັດປາກ ຈຳນວນ 3.000 ອັນ ລວມມູນຄ່າ 14 ລ້ານກີບ ໂດຍເງິນຈຳນວນນີ້ທາງ ບໍລິສັດ ສິຣິ ຄອສເມຕິກ ( ປະເທດໄທ ) ສະໜັບສະໜູນ 10 ລ້ານກີບ. ສ່ວນ 4 ລ້ານກີບ ແມ່ນມາຈາກການຮ່ວມແຮງຮ່ວມໃຈຂອງການຈຳໜ່າຍສິນຄ້າທາງບໍລິສັດ ເປັນຕົ້ນແມ່ນລາຍໄດ້ຈາກການຂາຍສະບູເມືອກຫອຍທາກ, ສະບູສາຫຼ່າຍພວງອາງຸ່ນ, ໂລຊັນສາຫຼ່າຍພວງອາງຸ່ນ ແລະ ອື່ນໆ.
[ ຂ່າວ: ພຸດຕີ້ – ຂໍ້ມູນ: ບໍລິສັດສິຣິຄອສເມຕິກ ]
