ຊົມເຊີຍ! ບໍລິສັດ ໄຟຟ້ານ້ຳກົງ 3 ຈຳກັດ ມອບເງິນມູນຄ່າ 250 ລ້ານກີບ ໃຫ້ແຂວງອັດຕະປື - Laoedaily

ຊົມເຊີຍ! ບໍລິສັດ ໄຟຟ້ານ້ຳກົງ 3 ຈຳກັດ ມອບເງິນມູນຄ່າ 250 ລ້ານກີບ ໃຫ້ແຂວງອັດຕະປື

ເພື່ອປະກອບສ່ວນຊ່ວຍເຫຼືອ ເຂົ້າໃນການປ້ອງ ຕໍ່ຕ້ານ ແລະ ສະກັດກັ້ນການແຜ່ລະບາດຂອງພະຍາດ ໂຄວິດ-19 ຢ່າງເຂັ້ມງວດທີ່ສຸດບໍລິສັດ ໄຟຟ້າ ນ້ຳກົງ 3 ຈຳກັດ ໄດ້ນໍາເອົາເງິນສົດ ມູນຄ່າ 250.000.000 ກີບ ມາມອບໃຫ້ຄະນະສະເພາະກິດ ຂັ້ນແຂວງ ເຂົ້າໃນການຊື້ອຸປະກອນການເເພດຊ່ວຍຫາຍໃຈ ເພື່ອຮອງຮັບໄວ້ປິ່ນປົວກໍລະນີຄົນຕິດເຊື້ອ ພະຍາດ ໂຄວິດ-19.

ພິທີມອບ-ຮັບດັ່ງກ່າວ ມີຂຶ້ນໃນວັນທີ 8 ເມສາ 2020 ກ່າວມອບໂດຍ ທ່ານ ທອງໄສ ທຳມະວົງ ຕາງຫນ້າ ໃຫ້ບໍລິສັດ ໄຟຟ້າ ນ້ຳກົງ 3 ຈຳກັດ ແລະ ກ່າວຮັບໂດຍ ທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງ ຮອງປະທານຄະນະສະເພາະກິດ ປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ສາຍພັນໃຫມ່ ໂຄວິດ19 ຂັ້ນແຂວງ ພ້ອມດ້ວຍພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.

ປັດຈຸບັນ ພະຍາດ ໂຄວິດ19 ກໍາລັງກາຍເປັນໄພຄຸກຄາມຮ້າຍແຮງທີ່ລະບາດໄປທົ່ວໂລກ ໂດຍສະເພາະປະເທດ ສປປ ລາວ ກຳລັງພົບກັບບັນຫາເຊັ່ນດຽວກັນກັບຫຼາຍໆປະເທດໃນໂລກ ລ້າສຸດ ມີຜູ້ຕິດເຊື້ອໂຄວິດ-19 ເພີ່ມອີກ 2 ຄົນ, ລວມເປັນ 14 ຄົນແລ້ວ ດັ່ງນັ້ນ ເພື່ອຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ບໍ່ໃຫ້ຂະຫຍາຍເປັນບໍລິເວນກວ້າງນັ້ນ ເຊິ່ງຜ່ານມາແຂວງ ອັດຕະປື ກໍ່ໄດ້ຮັບການຊ່ວຍເຫຼືອດ້ານອຸປະກອນການເເພດ ເຊັ່ນ: ຈັກຜົ່ນ, ນ້ຳຢາຂ້າເຊື້່ອ ແລະ ຊຸດປ້ອງກັນພະຍາດຈຳນວນໜຶ່ງ ຈາກ ບໍລິສັດ ວັງຕັດ ຂຸດຄົ້ນບໍ່ແຮ່ ຈຳກັດ ມູນຄ່າ 20 ກວ່າລ້ານກີບ ແລະ ບໍລິສັດ ໄຟຟ້າ ນ້ຳກົງ 3 ຈຳກັດ 250.000.000 ກີບ ນີ້ຈະກາຍເປັນການປະກອບສ່ວນອັນສຳຄັນ, ເປັນແຮງຜັກດັນອັນຮີບຮ້ອນທີ່ສຸດ ເພື່ອຮັບມືພ້ອມກັນຜ່ານຜ່າວິກິດການຄັ້ງນີ້ໄປໄດ້ດ້ວຍຄວາມປອດໄພ.

ໃນໂອກາດນີ້ ທ່ານ ອຸ່ນຫຼ້າ ໄຊຍະສິດ ຮອງປະທານຄະນະສະເພາະກິດຂັ້ນແຂວງ ຕາງຫນ້າໃຫ້ພັກ-ລັດ ຝາກຄວາມເປັນຫວ່ງເປັນໄຍ ເຖິງພໍ່ແມ່ປະຊາຊົນໃນທົ່ວແຂວງ, ບັນດາແຮງງານລາວ ແລະ ຕ່າງປະເທດ ທີ່ດຳລົງຊີວິດ ໃນແຕ່ລະ ບໍລິສັດ ຕ່າງໆໃນທົ່ວແຂວງ ອັດຕະປື ຈົ່ງເພີ່ມທະວີ ເອົາໃຈໃສ່ ຮັກສາບົວລະບັດຕົນເອງ ແລະ ປະຕິບັດຕາມມາດຕະຖານ ຄໍາແນະນໍາ ແລະ ມາດຕະການປ້ອງກັນ ຂອງລັດຖະບານລາວ ວາງອອກ ຢ່າງເຄັ່ງຄັດ ພ້ອມທັງໃຫ້ຄຳຫມັ້ນສັນຍາຈະນຳໃຊ້ເຄື່ອງຊ່ວຍເຫລືອ ຈາກບັນດ າບໍລິສັດ ມອບໃຫ້ນັ້ນ ໄປນຳໃຊ້ ເຂົ້າໃນວຽກງານ ປ້ອງກັນ ຄວບຄຸມ ແລະ ສະກັດກັ້ນພະຍາດໂຄວິດ-19 ໃຫ້ເກີດຜົນປະໂຫຍດສູງສຸດ.

ໂດຍ: ມາລາທິບ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ