ເພື່ອເປັນການປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ພ້ອມທັງຕິດຕາມ, ກວດກາ ແລະ ປະເມີນສະພາບການຢ່າງໃກ້ຊິດ ພ້ອມກະກຽມຄວາມພ້ອມຮັບມືຕອບໂຕ້ການລະບາດໃຫ້ມີປະສິດທິພາບ ແລະ ປະສິດທິຜົນໃນຂົງເຂດສຶກສາ ແລະ ກິລາ ໃນທົ່ວປະເທດ, ກະຊວງສຶກສາທິການ ແລະ ກິລາ ໄດ້ແຕ່ງຕັ້ງຄະນະຮັບຜິດຊອບວຽກງານສະກັດກັ້ນ, ກັນການລະບາດ, ຄວບຄຸມ ແລະ ກຽມພ້ອມຮອບດ້ານ ເພື່ອຕ້ານພະຍາດໂຄວິດ-19 ຂອງກະຊວງ, ໂດຍ ທ່ານລັດຖະມົນຕີກະຊວງສຶກສາທິການ ແລະ ກິລາ ເປັນປະທານ.
ອີງຕາມຂໍ້ຕົກລົງ ຂອງກະຊວງສຶກສາທິການ ແລະ ກິລາ ເລກທີ 1120/ສສກ ລົງວັນທີ 30 ມີນາ 2020 ໂດຍໄດ້ຕົກລົງແຕ່ງຕັ້ງຄະນະຮັບຜິດຊອບຊີ້ນຳລວມສະກັດກັ້ນ, ກັນການລະບາດ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດດັ່ງກ່າວ, ໂດຍ ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີ ກະຊວງ ສສກ ເປັນປະທານ ເພື່ອຊີ້ນໍາບັນດາຫ້ອງການ, ກົມ, ສະຖາບັນ, ສູນ, ມະຫາວິທະຍາໄລ, ວິທະຍາໄລ, ໂຮງຮຽນ ແລະ ພະແນກສຶກສາທິການ ແລະ ກິລາ ແຂວງ-ນະຄອນຫຼວງ ໃນທົ່ວປະເທດ ເປັນເຈົ້າການໃນການປ້ອງກັນ ແລະ ຄວບຄຸມ ການລະບາດພະຍາດໂຄວິດ-19. ພ້ອມທັງຕິດຕາມ, ກວດກາ ແລະ ປະເມີນສະພາບການຢ່າງໃກ້ຊິດ ແລະ ລາຍງານແກ່ຄະນະສະເພາະກິດຮັບຊາບເປັນປົກກະຕິ ແລະ ທັນການ.
ເຊິ່ງງົບປະມານຮັບໃຊ້ໃນການປະຕິບັດໜ້າທີ່ຂອງຄະນະຮັບຜິດຊອບສະກັດກັ້ນ, ກັນການລະບາດ, ຄວບຄຸມ ແລະ ກຽມພ້ອມຮອບດ້ານ ຕ້ານພະຍາດໂຄວິດ-19 ແມ່ນນໍາໃຊ້ງົບປະມານລັດ ຂອງກະຊວງສຶກສາທິການ ແລະ ກິລາ ໂດຍຈະເບິກຈ່າຍຕາມລະບຽບຫຼັກການຂອງກະຊວງການເງິນຢ່າງເຂັ້ມງວດ.
ນອກນັ້ນ, ຍັງໄດ້ແຕ່ງຕັ້ງກອງເລຂາປະສານງານສະກັດກັ້ນ, ກັນການລະບາດ, ຄວບຄຸມ ແລະ ກຽມພ້ອມຮອບດ້ານ ໂດຍທ່ານ ຮສ ປອ ກອງສີ ແສງມະນີ ຮອງລັດຖະມົນຕີກະຊວງ ສສກ ເປັນຫົວໜ້າຄະນະ ເພື່ອເປັນເສນາທິການໃກ້ແກ່ຄະນະຊີ້ນໍາລວມ ໃນການປະສານງານ, ຕິດຕາມ, ຊຸກຍູ້ຢ່າງໃກ້ຊິດ, ປະຕິບັດໜ້າທີ່ຕາມການມອບໝາຍ ລວມເຖີງສັງລວມສະພາບການປະຈໍາວັນ, ມາດຕະການ ແລະ ກິດຈະກຳຕ່າງໆ, ບັນຫາ, ສາເຫດ ແລະ ຂໍ້ສະເໜີຕ່າງໆ ເພື່ອສະເໜີຂໍທິດຊີ້ນໍາຈາກຄະນະຊີ້ນໍາລວມ ແລະ ຄະນະສະເພາະກິດ.
ພາບຈາກ: Edu-Sport TV online