ກະຊວງສາທາ ຖະແຫຼງຂ່າວຢັ້ງຢືນ ລາວພົບຜູ້ຕິດເຊື້ອໂຄວິດ-19 ຈຳນວນ 2 ກໍລະນີ - Laoedaily

ກະຊວງສາທາ ຖະແຫຼງຂ່າວຢັ້ງຢືນ ລາວພົບຜູ້ຕິດເຊື້ອໂຄວິດ-19 ຈຳນວນ 2 ກໍລະນີ

ໃນເວລາ14ໂມງ ວັນທີ 24 ມີນາ 2020 ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19  ໄດ້ຖະແຫຼງຂ່າວປະຈຳວັນຂຶ້ນທີ່ກະຊວງສາທາລະນະສຸກ ໂດຍຢັ້ງຢືນວ່າ: ມາຮອດປັດຈຸບັນ ສປປລາວ ກວດພົບຜູ້ຕິດເຊື້ອໂຄວິດ-19 ຈຳນວນ 2 ຄົນ ຢູ່ນະຄອນຫຼວງວຽງຈັນ.

ທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກກ່າວວ່າ: ໃນວັນທີ 23 ມີນາ ໄດ້ມີການກວດຕົວຢ່າງຜູ້ສົງໄສຕິດເຊື້່ອຈຳນວນ14 ກໍລະນີ; ໃນນີ້12 ກໍລະນີ ທີ່ເປັນແຮງງານລາວເດີນທາງມາຈາກປະເທດໄທກວດບໍ່ພົບກໍລະນີຕິດເຊື້ອ(ແບ່ງເປັນທີ່ແຂວງຈຳປາສັກ 7 ຄົນ, ສະຫວັນນະເຂດ1ຄົນ, ຄຳມ່ວນ1 ຄົນ, ສາລະວັນ2 ຄົນ, ໄຊຍະບູລີ 1ຄົນ).

ສ່ວນອີກ2 ກໍລະນີຢູ່ນະຄອນຫຼວງວຽງຈັນຜົນກວດວິເຄາະແມ່ນພົບການຕິດເຊື້ອ; ໃນນີ້ກໍລະນີທີ 1 ເປັນເພດຍິງ ອາຍຸ36 ປີ ສັນຊາດລາວ ເປັນພະນັກງານນຳທ່ຽວ ໂດຍນຳພານັກທ່ອງທ່ຽວທີ່ມາຈາກປະເທດທີ່ມີການລະບາດ ໄປທ່ຽວ ວັງວຽງ, ຫຼວງພະບາງ ແລ້ວນຳສົ່ງນັກທ່ອງທ່ຽວໄປກຳປູເຈຍ ເມື່ອເວລານັກທ່ອງທ່ຽວໄປກຳປູເຈຍ ກໍໄດ້ມີການຄັດກອງແລ້ວພົບວ່າກຸ່ມນັກທ່ອງທ່ຽວດັ່ງກ່າວຕິດໂຄວິດ-19 ຈິ່ງປະສານມາຫາພວກເຮົາ, ພວກເຮົາຈິ່ງນຳສົ່ງພະນັກງານຍິງຄົນດັ່ງກ່າວເຂົ້າກວດເຊື້ອ ແລະ ປິ່ນປົວ.

ກໍລະນີທີ2 ເປັນເພດຊາຍ ອາຍຸ 28 ປີ  ສັນຊາດລາວ ເຮັດວຽກຢູ່ໂຮງແຮມໃນນະຄອນຫຼວງວຽງຈັນ ມີປະຫວັດເດີນທາງໄປສຳມະນາທີ່ບາງກອກປະເທດໄທ, ເມື່ອກັບມາແລ້ວກໍໄດ້ກັກຕົວເອງຢູ່່ເຮືອນ. ຕໍ່ມາໄດ້ມີອາການໄຂ້ ຈິ່ງເຂົ້າມາກວດທີ່ໂຮງໝໍມິດຕະພາບ ຈິ່ງໄດ້ເກັບຕົວຢ່າງມາກວດຢັ້ງຢືນ ແລ້ວຜົນອອກມາວ່າພົບການຕິດເຊື້ອ.

ປັດຈຸບັນຜູ້ຕິດເຊື້ອທັງສອງແມ່ນໄດ້ຮັບການປິ່ນປົວຕາມລະບຽບຫຼັກການ ທີ່ໂຮງໝໍມິດຕະພາບ

ທ່ານ ຮອງລັດຖະມົນຕີ ຍັງຮຽກຮ້ອງໃຫ້ພໍ່ແມ່ປະຊາຊົນ ຢ່າແຕກຕື່ນ ຢ້ານກົວເກີນເຫດ ແຕ່ກໍຢ່າປະໝາດ. ໃຫ້ພ້ອມກັນປະຕິບັດມາດຕະຖານການຕ່າງໆໃນການປ້ອງກັນຕົວເອງ ຕາມທີ່ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ວາງອອກຢ່າງເຂັ້ມງວດ ແລະ ເປັນເຈົ້າການ.

 

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ