ແຂວງຄຳມ່ວນ ມີຜົນສຳເລັດຫຼາຍດ້ານພາຍໃຕ້ການຊີ້ນຳ - ນຳພາຂອງອົງຄະນະພັກ - Laoedaily

ແຂວງຄຳມ່ວນ ມີຜົນສຳເລັດຫຼາຍດ້ານພາຍໃຕ້ການຊີ້ນຳ – ນຳພາຂອງອົງຄະນະພັກ

ພາຍໃຕ້ການຊີ້ນຳ – ນຳພາຂອງອົງຄະນະພັກ ແຂວງຄຳມ່ວນ ມີຜົນສຳເລັດຫຼາຍດ້ານ ໂດຍສະເພາະດ້ານເສດຖະກິດມີການຂະຫຍາຍຕົວຢູ່ໃນລະດັບ 6,64% ຕໍ່ປີ, ຈີດີພີ ບັນລຸ 8.369 ຕື້ກີບ.

ສະຫາຍ ບຸນມີ ພິມມະສອນ ຮອງເລຂາພັກແຂວງ, ຮອງເຈົ້າແຂວງຄຳມ່ວນ ໄດ້ສະແດງ ຄວາມຮູ້ສຶກຕໍ່ການຊີ້ນຳ – ນຳພາຂອງອົງຄະນະພັກ ແຂວງຄຳມ່ວນ ໃນໄລຍະ 1 ປີຜ່ານມາ ໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 65 ປີ ວ່າ: ແຂວງຄຳມ່ວນ ແມ່ນມີສະຖຽນລະພາບທາງດ້ານການເມືອງທີ່ໜັກແໜ້ນ, ມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍໃນທົ່ວສັງຄົມໂດຍພື້ນຖານ, ດ້ານເສດຖະກິດແມ່ນມີການຂະຫຍາຍຕົວຢູ່ໃນລະດັບ 6,64% ຕໍ່ປີ ລວມຍອດມູນຄ່າຜະລິດຕະພັນພາຍໃນ GDP ບັນລຸໄດ້ 8.369 ຕື້ກີບ.

ພ້ອມກັນນັ້ນ, ກໍໄດ້ເອົາໃຈໃສ່ຊຸກຍູ້ຕິດຕາມ, ກວດກາການຈັດຕັ້ງປະຕິບັດແຕ່ລະຂະແໜງການມີຫຼາຍດ້ານໄດ້ຮັບຜົນສຳເລັດ, ດ້ານການລົງທຶນຂອງລັດ ແລະ ການລົງທຶນຂອງເອກະຊົນພາຍໃນ ແລະ ຕ່າງປະເທດໄດ້ຫັນເຂົ້າສູ່ລະບຽບກົດໝາຍຢ່າງເຂັ້ມງວດຮັດກຸມຂຶ້ນ ໂດຍການຄົ້ນຄວ້າປັບປຸງຂັ້ນຕອນພິຈາລະນາການອະນຸມັດໂຄງການລົງທຶນໃຫ້ມີຄວາມວ່ອງໄວຂຶ້ນ.

ດ້ານຂົງເຂດວັດທະນະທຳ – ສັງຄົມ ສາມາດຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ( SDGs ) ບັນລຸ 8 ຕົວຊີ້ວັດຈາກທັງໝົດ 10 ຕົວຊີ້ວັດຂອງຂົງເຂດສາທາລະນະສຸກ, ດ້ານການກໍ່ສ້າງພັກ – ພະນັກງານ ໄດ້ກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໄດ້ທັງໝົດ 312 ໜ່ວຍ. ປັດຈຸບັນພວມຢູ່ໃນຂັ້ນຕອນການຈັດຕັ້ງປະຕິບັດ ເພື່ອປະເມີນຕີລາຄາໃນຂັ້ນຂອງຕົນ ຄາດວ່າໃນປີ 2020 ໃຫ້ສາມາດຈັດຕັ້ງປະຕິບັດໄດ້ 1.118 ໜ່ວຍໃນທົ່ວແຂວງ.

ຂົງເຂດແນວລາວສ້າງຊາດ ແລະ ອົງການຈັດຕັ້ງມະຫາຊົນ ປັດຈຸບັນແມ່ນໄດ້ສຳເລັດການດຳເນີນກອງປະຊຸມໃຫຍ່ຂອງອົງການຈັດຕັ້ງກຳມະບານ, ຊາວໜຸ່ມ, ສະຫະພັນແມ່ຍິງ, ນັກຮົບເກົ່າ ແລະ ກອງປະຊຸມຄະນະພັກກອງບັນຊາການ ປກຊ ແຂວງ.

 

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ