ປະເທດອົດສະຕຣາລີ ປິດເມືອງທົ່ວປະເທດ ແບບບໍ່ມີກຳນົດ ເນື່ອງຈາກປະຊາຊົນບໍ່ໃຫ້ຄວາມຮ່ວມມື - Laoedaily

ປະເທດອົດສະຕຣາລີ ປິດເມືອງທົ່ວປະເທດ ແບບບໍ່ມີກຳນົດ ເນື່ອງຈາກປະຊາຊົນບໍ່ໃຫ້ຄວາມຮ່ວມມື

ນາຍົກລັດຖະມົນຕີປະເທດອົດສະຕຣາລີ ປະກາດມາດຕະການປິດເມືອງທົ່ວປະເທດ “ຈົນກວ່າຈະມີການປ່ຽນແປງ” ເພື່ອຄວບຄຸມສະຖານະການແຜ່ລະບາດໂຄວິດ-19 ຫຼັງຈາກມາດຕະການກ່ອນໜ້ານີ້ ບໍ່ໄດ້ຮັບການຮ່ວມມືຈາກປະຊາຊົນ.

ສຳນັກຂ່າວຕ່າງປະເທດລາຍງານຈາກນະຄອນຫຼວງແຄນເບີຣາ ປະເທດອົດສະຕຣາລີ ເມື່ອວັນຈັນ ທີ 23 ມີນາ ວ່າ ນາຍົກລັດຖະມົນຕີສະກັອດ ມໍຣິສັນ ໄດ້ຖະແຫຼງການເມື່ອວັນຈັນ ວ່າ ການແຜ່ລະບາດຂອງເຊື້ອໄວຣັສໂຄໂຣນາສາຍ ພັນໃໝ່ ຫຼື ໂຄວິດ-19 ສ້າງຄວາມທ້າທາຍລະດັບໂລກທັງດ້ານສາທາລະນະສຸກ ແລະ ເສດຖະກິດ ແນ່ນອນ ວ່າ ອົດສະຕຣາລີ ເປັນໜຶ່ງໃນບັນດາປະເທດທີ່ຜະເຊີນກັບວິກິດດັ່ງກ່າວ.

ເຖິງວ່າລັດຖະບານເຄີຍໃຊ້ມາດຕະການຜ່ອນຜັນມາຕະຫຼອດ ໂດຍຍົກລະດັບຄວາມເຂັ້ມງວດເທື່ອລະກ້າວຄ່ອຍເປັນຄ່ອຍໄປ ແຕ່ບໍ່ໄດ້ຮັບການຮ່ວມມືຢ່າງຈິງຈັງ ເຊັ່ນ ຍັງມີປະຊາຊົນເຕົ້າໂຮມກັນຢູ່ແຄມຫາດຊາຍບອນໄດ ໃນນະຄອນຊິດນີ ເຊິ່ງໄດ້ສັ່ງໃຫ້ປິດກ່ອນໜ້າແລ້ວ ຕັ້ງແຕ່ວັນເສົາ ຜ່ານມາ.

ດ້ວຍເຫດນີ້, ຈຶ່ງເຖິງເວລາທີ່ຊາວອົດສະຕຣາລີ “ຕ້ອງປັບປ່ຽນວິທີການດຳລົງຊີວິດ” ໂດຍນັບຕັ້ງແຕ່ໄລຍະທ່ຽງຕາມເວລາທ້ອງຖິ່ນຂອງວັນຈັນ ທີ 23 ມີນາ ນີ້ ເປັນຕົ້ນໄປ ຮ້ານອາຫານ, ໂຮງຮູບເງົາ, ຮ້ານກິນດື່ມ, ສູນອອກກຳລັງກາຍ ແລະ ສະຖານທີ່ທາງສາສະໜາ ຕ້ອງປິດໃຫ້ບໍລິການ. ການຈຳໜ່າຍອາຫານ ແລະ ເຄື່ອງດື່ມ ແມ່ນຕ້ອງຊື້ກັບເມືອກິນຢູ່ເຮືອນເທົ່ານັ້ນ ຍົກເວັ້ນຮ້ານສັບພະສິນຄ້າ, ປໍ້ານໍ້າມັນ, ທະນາຄານ ແລະ ຮ້ານຂາຍຢາ ແມ່ນເປີດໃຫ້ບໍລິການປົກກະຕິ.

ในภาพอาจจะมี 1 คน, ฝูงชน, ตาราง และ สถานที่กลางแจ้ง

ເຖິງຢ່າງໃດກໍ່ຕາມ, ທ່ານມໍຣິສັນ ກ່າວວ່າ ລັດຖະບານບໍ່ມີນະໂຍບາຍປິດໂຮງຮຽນ ແຕ່ຜູ້ປົກຄອງສາມາດປະສານກັບສະຖນບັນການສຶກສາ ເພື່ອຮ້ອງຂໍໃຫ້ລູກຫຼານຂອງພວກເຂົາພັກຮຽນຊົ່ວຄາວໄດ້. ນອກຈາກນີ້, ລັດຖະບານອົດສະຕຣາລີໄດ້ກຳນົດພື້ນຖານ “ໄລຍະຫ່າງທາງສັງຄົມ” ໃນຂອບເຂດ 4 ຕາແມັດຕໍ່ 1 ຄົນ ໃນພື້ນທີ່ປິດ.

ທັງນີ້, ມາດຕະການດັ່ງກ່າວ ມີຜົນບັງຄັບໃຊ້ “ຈົນກວ່າຈະມີການປ່ຽນແປງ” ແຕ່ ທ່ານມໍຣິສັນ ກ່າວດ້ວຍວ່າ ລັດຖະບານມີມາດຕະການສຸກເສີນເພື່ອຮອງຮັບການປິດເມືອງຄັ້ງນີ້ “ທີ່ອາດຈະໃຊ້ເວລາເຖິງ 6 ເດືອນ” ແລະ ກ່າວວ່າ ຕ້ອງໃຊ້ມາດຕະການທີ່ເຂັ້ມງວດຂຶ້ນກວ່າເກົ່າ ເນື່ອງຈາກຜູ້ເສຍຊີວິດ ແລະ ຜູ້ປ່ວຍຈາກໂຄວິດ-19 ໃນປະເທດອົດສະຕຣາລີເພິ່ມຂຶ້ນຢ່າງຕໍ່ເນື່ອງ ໂດຍຜູ້ປ່ວຍສະສົມ ຢ່າງໜ້ອຍ 1.353 ຄົນ, ປິ່ນປົວເຊົາແລ້ວ 88 ຄົນ ແລະ ເສຍຊີວິດຢ່າງໜ້ອຍ 7 ຄົນ. ນັບຕັ້ງແຕ່ການຢືນຢັນກວດພົບຜູ້ປ່ວຍຄົນທຳອິດ ເມື່ອວັນທີ 25 ມັງກອນ ແລະ ເສຍຊີວິດຄົນທຳ ອິດ ເມື່ອວັນທີ 1 ມີນາ ຜ່ານມາ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ