ສະໜອງເງິນທຶນບ້ວງທຳອິດ 100 ຕື້ກີບ ເພື່ອສົ່ງເສີມ SME ໃນລາວ - Laoedaily

ສະໜອງເງິນທຶນບ້ວງທຳອິດ 100 ຕື້ກີບ ເພື່ອສົ່ງເສີມ SME ໃນລາວ

ເພື່ອເປັນການສົ່ງເສີມ SME ກອງທຶນສົ່ງເສີມວິສາຫະກິດຂະໜາດນ້ອຍ ແລະ ກາງ (ທສວ) ສະໜອງເງິນທຶນບ້ວງທຳອິດ 100 ຕື້ກີບ ໃຫ້ແກ່ 4 ທະນາຄານທຸລະກິດ ກຽມປ່ອຍກູ້ໃຫ້ບັນດາວິສາຫະກິດ ທີ່ຕ້ອງການທຶນ ດ້ວຍອັດຕາດອກເບ້ຍຕ່ຳ.

ໃນວັນທີ 20 ມີນາ 2020, ທີ່ກະຊວງອຸດສາຫະກຳ ແລະ ການຄ້າ (ອຄ), ກອງທຶນສົ່ງເສີມວິສາຫະກິດຂະໜາດນ້ອຍ ແລະ ກາງ (ທສວ) ໄດ້ຈັດພິທີເຊັນສັນຍາສະໜອງທຶນຂຶ້ນ ລະຫວ່າງ ທສວ ແລະ 4 ທະນາຄານທຸລະກິດຄື: ທະນາຄານພັດທະນາລາວ, ທະນາຄານໄຊງ່ອນເທືອງຕິນ ລາວ (ຊາຄອມແບັງ ລາວ), ນາຄານຮ່ວມທຸລະກິດ ລາວຫວຽດ ແລະ ທະນາຄານມາຣູຮານ ເຈແປນລາວ ໂດຍການເຂົ້າຮ່ວມເປັນສັກຂີພະຍານຂອງ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງ ອຄ, ທ່ານ ສົມຈິດ ອິນທະມິດ ຮອງລັດຖະມົນຕີກະຊວງ ອຄ, ປະທານສະພາບໍລິຫານ ທສວ ພ້ອມດ້ວຍຜູ້ບໍລິຫານ 4 ທະນາຄານ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ຈຸດປະສົງ ເພື່ອເປັນການສະໜອງແຫຼ່ງທຶນໄລຍະຍາວໃຫ້ ວິສາຫະກິດຂະໜາດນ້ອຍ ແລະ ກາງ ຫຼື SME ທີ່ມີເປົ້າໝາຍນໍາໃຊ້ເປັນທຶນໜູນວຽນ ເພື່ອຂະຫຍາຍການຜະລິດ ແລະ ເພີ່ມການຈ້າງງານ, ທຶນຄົງທີ່ ເພື່ອປ່ຽນຖ່າຍເຄື່ອງຈັກ ຫຼື ປັບປຸງເຕັກໂນໂລຊີ, ການນຳໃຊ້ເຕັກໂນໂລຊີ ເພື່ອເພີ່ມຜະລິດຕະພາບການຜະລິດ ແລະ ການບໍລິການ ເຊັ່ນ: ການນໍາໃຊ້ ICT ຊ່ວຍການບໍລິຫານຈັດການ ຫຼື ບັນຊາຂະບວນການຜະລິດ, ການສ້າງນະວັດຕະກໍາໃນການຜະລິດ, ການອອກແບບ ແລະ ການຄຸ້ມຄອງທຸລະກິດ; ທຶນໝູນວຽນ ຫຼື ທຶນຄົງທີ່ ເພື່ອການຜະລິດເປັນສິນຄ້າສົ່ງອອກ ແມ່ນຖືເປັນບູລິມະສິດຫຼັກ ໃຫ້ SME ທີ່ນອນໃນຂະແໜງການ ແລະ ຂົງເຂດບູລິມະສິດ ຂອງລັດຖະບານ ທີ່ກໍານົດໃນແຕ່ລະໄລຍະ.

ທ່ານ ນາງ ລັດທະນາ ດວງບຸຜາ ຜູ້ອຳນວຍການ ທສວ ກ່າວວ່າ: 4 ທະນາຄານທຸລະກິດທີ່ໄດ້ຮັບທຶນສະໜອງ ແລະ ທີ່ເຊັນສັນຍາໃນມື້ນີ້ ແມ່ນໄດ້ມີຄວາມສົນໃຈເຂົ້າຮ່ວມໂຄງການ ແລະ ໄດ້ຜ່ານການຄັດເລືອກ ໂດຍອີງໃສ່ເງື່ອນໄຂ 13 ຂໍ້ ຈາກສະພາບໍລິຫານກອງທຶນ SME ເຊິ່ງທຶນທີ່ສະໜອງໃນຄັ້ງນີ້ ເປັນເງິນທີ່ລັດຖະບານປະກອບໃຫ້ ທສວ ງວດທຳອິດ ຈຳນວນ 100 ຕື້ກີບ ຂອງບ້ວງເງິນ 200 ຕື້ກີບ.

ໃນນີ້, ໄດ້ຈັດສັນໃຫ້ທະນາຄານຄື: ທະນາຄານ ພັດທະນາລາວ ໄດ້ຮັບທຶນ ມູນຄ່າ 27 ຕື້ກີບ, ທະນາຄານ ໄຊງ່ອນເທືອງຕິ່ນ ລາວ ໄດ້ຮັບມູນຄ່າ 30 ຕື້ກີບ, ທະນາຄານ ຮ່ວມທຸລະກິດລາວຫວຽດ ໄດ້ຮັບທຶນມູນຄ່າ 30 ຕື້ກີບ ແລະ ທະນາຄານ ມາຣູຮານເຈ ແປນລາວ ໄດ້ຮັບທຶນ ມູນຄ່າ 13 ຕື້ກີບ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ