ຈາກສະພາບພະຍາດໂຄວິດ – 19 ກຳລັງລະບາດຂະຫຍາຍເປັນວົງ ກວ້າງສູ່ປະເທດຕ່າງໆ ໂດຍມາຮອດເວລາ 6:00 ໂມງເຊົ້າ ຂອງວັນທີ 18 ມີນາ 2020 ມີ 165 ປະເທດ ທີ່ລາຍງານຜູ້ຕິດເຊື້ອ ໂດຍມີຜູ້ຕິດເຊື້ອທັງໝົດ 198.229 ກໍລະນີ, ເສຍຊີວິດ 7.965 ກໍລະນີ, ປິ່ນປົວຫາຍດີ 81.109 ກໍລະນີ.
ເຖິງວ່າປະເທດລາວຍັງບໍ່ພົບກໍລະນີຕິດເຊື້ອແຕ່ຖືວ່າມີຄວາມສ່ຽງສູງ. ສະນັ້ນ, ເພື່ອປ້ອງກັນຕົນເອງ ແລະ ຜູ້ອື່ນ. ມື້ນີ້ຈຶ່ງຂໍນຳເອົາຂໍ້ແນະນຳຈາກກະຊວງສາທາລະນະສຸກ ເຖິງຂັ້ນຕອນທີ່ທ່ານສາມາດປະຕິບັດເພື່ອຮັກສາສຸຂະພາບດັ່ງນີ້:
1 ໝັ່ນລ້າງມືໃສ່ສະບູ ແລະ ນໍ້າສະອາດ ຫຼື ເຈລລ້າງມືເປັນປະຈໍາ.
2 ເມື່ອທ່ານມີອາການໄອ ແລະ ຈາມ ຕ້ອງປິດປາກ ແລະ ດັງ ດ້ວຍເຈ້ຍອະນາໄມ ຫຼື ກົກແຂນຂອງທ່ານ. ຈາກນັ້ນ, ຖິ້ມເຈ້ຍອະນາໄມລົງຖັງຂີ້ເຫຍື້ອທັນທີ.
3 ຫຼີກລຽງການສໍາຜັດໃກ້ຊິດກັບຄົນທີ່ມີອາການ ໄຂ້, ໄອ, ເຈັບຄໍ ຫຼື ຫາຍໃຈຍາກ.
4 ຫຼີກລຽງການສຳຜັດຕາ, ດັງ ແລະ ປາກ ຖ້າບໍ່ໄດ້ລ້າງມື.
5 ຫຼີກລຽງການສໍາຜັດກັບສັດທີ່ເຫງົາ ຫຼື ສັດບໍ່ມີເຈົ້າຂອງ ໂດຍສະເພາະແມ່ນຢູ່ຕະຫຼາດສົດ ຖ້າຈໍາເປັນແມ່ນຕ້ອງລ້າງມືໃຫ້ສະອາດທຸກຄັ້ງພາຍຫຼັງສໍາຜັດສັດຕ່າງໆ.
6 ຫຼີກລຽງການເດີນທາງໄປສະຖານທີ່ແອອັດ, ການສໍາຜັດກັບບຸກຄົນອື່ນໆ ແລະ ບໍ່ຄວນໄປເຮັດວຽກ ຫຼື ໄປໂຮງຮຽນຖ້າທ່ານຮູ້ສຶກບໍ່ສະບາຍ.
7 ຖ້າທ່ານມີອາການໄຂ້, ໄອ, ເຈັບຄໍ ຫຼື ຫາຍໃຈຍາກ ຫຼື ທ່ານຕ້ອງເບິ່ງແຍງບຸກຄົນທີ່ມີອາການສະແດງອອກດັ່ງກ່າວຄວນໃສ່ຜ້າອັດປາກ – ດັງ ທ່ານຕ້ອງຮັບປະກັນວ່າຕົນເອງຮູ້ວິທີການໃສ່ ແລະ ຖິ້ມຜ້າອັດປາກ – ດັງຢ່າງຖືກຕ້ອງ.
ຄຳແນະນຳໃນການນຳໃຊ້ຜ້າອັດປາກ:
ບຸກຄົນທີ່ຈຳເປັນຕ້ອງໃສ່ຜ້າອັດປາກ ແລະ ດັງ.
ຖ້າທ່ານມີອາການທາງລະບົບຫາຍໃຈ ເຊັ່ນ: ໄອ ຫຼື ຫາຍໃຈຍາກ.
ຖ້າທ່ານເປັນບຸກຄົນທີ່ກຳລັງເບິ່ງແຍງຄົນເຈັບທີ່ມີອາການທາງລະບົບຫາຍໃຈ.
ຖ້າທ່ານເປັນພະນັກງານແພດໝໍ.
ຖ້າທ່ານເດີນທາງໄປໃນເຂດທີ່ມີການລະບາດ ຫຼື ຊຸມຊົນແອອັດທີ່ມີ ຄວາມສ່ຽງ.
ບຸກຄົນທີ່ບໍ່ຈຳເປັນຕ້ອງໃສ່ຜ້າອັດປາກ – ດັງ.
ທ່ານບໍ່ຈຳເປັນຕ້ອງໃສ່ຜ້າອັດປາກ – ດັງ ຖ້າບຸກຄົນ ຫຼື ປະຊາຊົນທົ່ວໄປຜູ້ທີ່ບໍ່ມີອາການທາງລະບົບຫາຍໃຈ.
ຫາກທ່ານມີອາການຄ້າຍຄືໄຂ້ຫວັດ ເຊັ່ນ: ໄຂ້, ໄອ, ເຈັບຄໍ ຫຼື ຫາຍໃຈຍາກບວກກັບໄດ້ເດີນທາງໄປໃນເຂດທີ່ມີການລະບາດ ພາຍໃນ 14 ວັນ ກ່ອນເລີ່ມຕົ້ນເຈັບ ຫຼື ສໍາຜັດໃກ້ຊິດກັບກໍລະນີຢັ້ງຢືນຕິດເຊື້ອໂຄ ວິດ – 19. ໃນຂະນະທີ່ກໍລະນີດັ່ງກ່າວກໍາລັງມີອາການໃຫ້ໂທຫາສາຍດ່ວນ 166 ແລະ ກະລຸນາໄປພົບແພດໝໍໃກ້ບ້ານທ່ານ ໂດຍແຈ້ງປະຫວັດການເດີນທາງຂອງທ່ານຖ້າໄດ້ໄປເຂດທີ່ມີການລະບາດພະຍາດດັ່ງກ່າວໃນໄລຍະ 14 ວັນ.
( ຂໍ້ມູນຈາກ: ກະຊວງສາທາລະນະສຸກ )
[ ຮຽບຮຽງ: ນຸ້ມນິ້ມ; ຮູບ: ສຸກສະຫວັນ ]