ຕະຫຼອດ 5 ປີ ຜ່ານມາ ການຂະຫຍາຍຕົວຂອງເສດຖະກິດເມືອງ ນາກາຍຢູ່ໃນລະດັບ 6,17% ຕໍ່ປີ, ລວມຍອດຜະລິດຕະພັນພາຍໃນບັນລຸ 248 ຕື້ກີບ, ສະເລ່ຍລາຍຮັບຕໍ່ຫົວຄົນເທົ່າກັບ 1.173 ໂດລາ ຫຼື ເທົ່າກັບ 10 ລ້ານກວ່າກີບ ທຽບໃສ່ແຜນການ 5 ປີ ລື່ນຄາດໝາຍ 7,3%. ສຳລັບແຜນການພັດທະນາເສດຖະກິດ-ສັງຄົມໃນ 5 ປີ ຕໍ່ໜ້າ (2020-2024) ຈະໃຫ້ບັນລຸໃນລະດັບ 6,45% ຕໍ່ປີ ສາມາດສ້າງລາຍຮັບໃຫ້ປະຊາຊົນໄດ້ 1.405 ໂດລາສະຫະລັດ ຫຼື ເທົ່າກັບ 12 ລ້ານກວ່າກີບຕໍ່ຄົນຕໍ່ປີ.
ກອງປະຊຸມໃຫຍ່ ຄັ້ງທີ VI ຂອງອົງຄະນະພັກເມືອງນາກາຍ ແຂວງຄໍາມ່ວນ ໄດ້ໄຂຂຶ້ນໃນລະຫວ່າງວັນທີ 16-17 ມີນາ 2020 ໂດຍການເປັນປະທານຂອງ ສະຫາຍ ສົມພົງ ວັນໄພທອງ ກໍາມະການພັກແຂວງ, ເລຂາພັກເມືອງ ເຈົ້າເມືອງນາກາຍ, ເປັນກຽດເຂົ້າຮ່ວມມີສະຫາຍ ພົມມາ ພັນທະລັງສີ ຮອງເລຂາພັກແຂວງ, ຫົວໜ້າຄະນະຈັດຕັ້ງແຂວງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ກອງປະຊຸມ ໄດ້ພ້ອມຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໃນໄລຍະ 5 ປີຜ່ານມາ ແລະ ວາງທິດທາງແຜນການ 5 ປີ 2020-2024 ໃນຕໍ່ໜ້າ ເຊິ່ງໃນໄລຍະ 5 ປີຜ່ານມາ ການຂະຫຍາຍຕົວທາງດ້ານເສດຖະກິດຢູ່ໃນລະດັບ 6,17% ຕໍ່ປີ, ລວມຍອດຜະລິດຕະພັນພາຍໃນບັນລຸ 248 ຕື້ກີບ, ສະເລ່ຍລາຍຮັບຕໍ່ຫົວຄົນເທົ່າກັບ 1.173 ໂດລາສະຫະລັດ ທຽບໃສ່ແຜນການ 5 ປີ ລື່ນຄາດໝາຍ 7,3%. ສຳລັບວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ສ້າງບ້ານພັດທະນາໄດ້ 22 ບ້ານ ເທົ່າກັບ 70,96% ຂອງຈໍານວນບ້ານທັງໝົດ, ສ້າງຄອບຄົວພັດທະນາໄດ້ 5.079 ຄອບຄົວ ກວມເອົາ 86%, ມີກອງທຶນພັດທະນາບ້ານ 8 ກອງທຶນ ລວມມີທຶນທັງໝົດ 3,7 ຕື້ກີບ. ປັດຈຸບັນຄອບຄົວທຸກຍາກຍັງເຫຼືອ 275 ຄອບຄົວ ເທົ່າກັບ 5% ທຽບໃສ່ແຜນ 5 ປີ ປະຕິບັດໄດ້ 95,43%.
ສ່ວນຄາດໝາຍສູ້ຊົນໃນ 5 ປີຕໍ່ໜ້າ ແມ່ນສືບຕໍ່ສ້າງເມືອງນາກາຍໃຫ້ມີສະຖຽນລະພາບທາງດ້ານການເມືອງທີ່ໜັກແໜ້ນ ຕິດພັນກັບການຫັນລົງກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານ, ຊຸກຍູ້ບັນດາວິສາຫະກິດຂະໜາດນ້ອຍ-ຂະໜາດກາງ, ພັດທະນາດ້ານກະສິກຳ-ຫັດຖະກຳ ຫັນເປັນອຸດສາຫະກຳປຸງແຕ່ງທີ່ທັນສະໄໝ, ຜະລິດສະບຽງອາຫານໃຫ້ພຽງພໍ ສາມາດຄໍ້າປະກັນຕາມແຜນທີ່ຂັ້ນເທິງມອບໝາຍ ແລະ ຜະລິດສົ່ງອອກເປັນສິນຄ້າ.
ພ້ອມທັງສ້າງເງື່ອນໄຂອຳນວຍໃຫ້ເສດຖະກິດມີການຂະຫຍາຍຕົວໃນລະດັບ 6,45% ຕໍ່ປີ ຕາມ 6 ແຜນງານ, 56 ໂຄງການບູລິມະສິດ ແລະ 93 ໂຄງການຍ່ອຍ ເຊິ່ງຮອດປີ 2024 ລາຍຮັບລວມປະຕິບັດໃຫ້ບັນລຸ 375 ຕື້ກີບ, ສະເລ່ຍ 1.405 ໂດລາສະຫະລັດ ຫຼື ເທົ່າກັບ 12 ລ້ານກວ່າກີບຕໍ່ຄົນຕໍ່ປີ ແລະ ບັນດາວຽກງານອື່ນໆ ກໍ່ສູ້ຊົນຈັດຕັ້ງປະຕິບັດໃຫ້ບັນລຸຕາມຄາດໝາຍທີ່ວາງໄວ້.
ທີ່ມາ: Medialaos
