ປີ 2019 ສ່ວຍສາອາກອນ ແຂວງອຸດົມໄຊ ຈັດເກັບລາຍຮັບໄດ້ລື່ນແຜນ - Laoedaily

ປີ 2019 ສ່ວຍສາອາກອນ ແຂວງອຸດົມໄຊ ຈັດເກັບລາຍຮັບໄດ້ລື່ນແຜນ

ໃນປີຜ່ານມາ ຂະແໜງສ່ວຍສາອາກອນ ແຂວງອຸດົມໄຊ ໄດ້ເອົາໃຈໃສ່ຄຸ້ມຄອງເກັບລາຍຮັບມອບເຂົ້າງົບປະມານ ໂດຍສະເພາະການຈັດເກັບລາຍຮັບຈາກບັນດາພະແນກການອ້ອມຂ້າງແຂວງ, ເມືອງ, ບັນດາຫົວໜ່ວຍວິສາຫະກິດຫ້າງຮ້ານຕ່າງໆ ແລະ ການປະກອບສ່ວນຂອງພົນລະເມືອງ ແຂວງອຸດົມໄຊ ໄດ້ລື່ນຄາດໝາຍທີ່ກຳນົດໄວ້.

ອີງຕາມບົດສະຫຼຸບການເຄື່ອນໄຫວຈັດຕັ້ງປະຕິບັດວຽກງານສ່ວຍສາອາກອນ ປະຈຳປີ 2019 ແລະ ທິດທາງແຜນການ 2020 ຂອງສ່ວຍສາອາກອນ ແຂວງອຸດົມໄຊ ໃຫ້ຮູ້ວ່າ: ແຜນການດັດແກ້ເກັບລາຍຮັບສ່ວຍສາອາກອນທົ່ວແຂວງໃນປີຜ່ານມາທັງໝົດ 106,29 ຕື້ກີບ ທຽບໃສ່ແຜນການດັດແກ້ ປີ 2018 ຫຼຸດລົງ 8,92% ຫຼື ເທົ່າກັບ 116,70 ຕື້ກີບ. ໃນນີ້, ສ່ວຍສາອາກອນປະຈຳແຂວງ ຮັບຜິດຊອບ ຈຳນວນ 58,7 ຕື້ ກີບ ແລະ ບັນດາເມືອງຮັບຜິດຊອບ 47,59 ຕື້ກີບ.

ຜ່ານການຈັດຕັ້ງປະຕິບັດຕົວຈິງຕາມຕົວເລກສະຫຼຸບຂາດຕົວໝົດປີ ສາມາດຈັດເກັບລາຍຮັບໄດ້ທັງໝົດ 114,25 ຕື້ກີບ ເທົ່າກັບ 107,49% ຂອງແຜນການດັດແກ້ ແລະ ທຽບໃສ່ປີຜ່ານມາ ຫຼຸດລົງ 4,74% ຫຼື ເທົ່າກັບ 5,69 ຕື້ກີບ. ໃນນັ້ນ, ສ່ວຍສາອາກອນປະຈໍາແຂວງ ເກັບໄດ້ 70,69 ຕື້ກີບ ເທົ່າກັບ 110,27% ຂອງແຜນການດັດແກ້ ແລະ ບັນດາເມືອງ ເກັບໄດ້ 43,29 ຕື້ກີບ.

ເມື່ອທຽບໃສ່ແຜນການຈັດເກັບລາຍຮັບຕົວຈິງແລ້ວ ເຫັນວ່າປະຕິບັດໄດ້ລື່ນຄາດໝາຍ ໂດຍສະເພາະແມ່ນລາຍຮັບຈາກອາກອນປະເພດຕ່າງໆ 88,29 ຕື້ກີບ ເທົ່າກັບ 109,07%, ລາຍຮັບຈາກຄ່າທໍານຽມປະຕິບັດໄດ້ 5,52 ຕື້ກີບ ເທົ່າກັບ 153,87%, ລາຍຮັບວິຊາການ ແຕ່ກໍຍັງມີບາງປະເພດອາກອນທີ່ຍັງຈັດຕັ້ງປະຕິບັດບໍ່ທັນໄດ້ຕາມເປົ້າໝາຍ ເປັນຕົ້ນແມ່ນລາຍຮັບວິຊາການຄ່າບໍລິການ ປະຕິບັດໄດ້ 16,74 ຕື້ກີບ ເທົ່າກັບ 98,73% ທຽບໃສ່ປີ 2018 ຫຼຸດລົງ 13,95%, ລາຍຮັບຈາກທີ່ດິນ ປະຕິບັດໄດ້ 3,69 ຕື້ກີບ ເທົ່າກັບ 76,98% ທຽບໃສ່ປີ 2018 ຫຼຸດລົງ 9,66%.

 

[ ຂ່າວ: ຄານມະນີ ຮຽນດໍຈັນ ]

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ